‘Nâu jĭ luơ̆t sơng đei tơdrong bơngơ̆t truh gĭt kăl đơ̆ng tơpôl, ƀơ̆t khei ‘năr âu ki, pơm glăi tĕch mơdro bơngai đei ƀôh krê hơmơt, đei roi tŏk, hăm tơdrong pơdăr hơlĕnh roi ‘năr roi dêh, đei ƀôh roi ‘năr roi lơ ‘măng tĕch mơdro bơngai tơ̆ lơ̆m teh đak mă bơngai răm ‘noh jĭ drŏ nglo.

Dôm sơnăm tơjê̆ âu, jô̆ păh lăp rim sơnăm teh đak bơ̆n chă ƀôh dang 100 ‘măng tĕch mơdro bơngai, hăm tơdrong hơlĕnh pơdăr nhen: “tơdrong jang hơiơch, jên khei lơ”, pơgơ̆r ăn bơngai răm năm ôn tơ̆ teh đak đe vă pơgŏ bơ̆jang glăi luơ̆t tơ̆ teh đak đe, ‘meh brŏk tơ̆ teh đak athei kla jên iŏk lơ. Dăh mă nhen iŏk yua lơ̆m tơdrong iŏk ŭnh om hăm bơngai teh đak đe, ăn iŏk kon rong đei ƀơm hăm teh đak đe, dăh mă tơmang lăng, năm ngôi tơ̆ ŭnh hnam, ‘nhŏng oh, bôl buăl... vă tĕch bơngai răm tơ̆ teh đak đe, pơgŏ bơ̆jang, pơđep tĕch hơkâu, tĕch klơm klak.