‘Nao chông tơmoi truh tơmam lăng tơ̆ lơ anih lơ̆m Buôn Trí B, xăh Krông Na, apŭng Buôn Đôn, mŏ Sáo Bun Trâm Adrơng tơroi, sơnăm ‘nâu mŏ vă jê̆ 30 sơnăm bơih, mŏ jĭ kon hơ ‘lơ̆p đei mĕ ‘nŏh bơngai Lào, ƀă ‘nŏh bơngai Rađe. Mŏ jang tơdrong jang chă chông tơmoi năm tơmam lăng yoa mŏ tôch ‘mĕh chông ba tơmoi năm lăng tơ̆ lơ jăl trong lơ̆m pơlei, roi tơƀôh ăn đe sư găh tơdrong arih xa, tơdrong joh ayŏ kơ dŏ xoang păng tơdrong juăt đơ̆ng kon pơlei oei arih xa tơ̆ groi tĕh Buôn Đôn âu:

“Lơ̆m sĕch pham inh đei 2 hơdrĕch Lào păng Rađe, inh rơih tơdrong jang chă chông tơmoi năm tơmang lăng âu yoa ‘mĕh roi tơbăt dôm tơdrong juăt ‘lơ̆ng đơ̆ng hơdrĕch nhôn ăn lơ bơngai ƀiơ̆. Tơ̆ hơnăp kơnh, inh ‘mĕh roi tơƀôh ăn lơ bơngai băt truh tơdrong juăt ‘lơ̆ng đơ̆ng 2 hơdrĕch hơdrung nhôn, mă loi jĭ hơdrĕch Lào, đei lơ tơdrong et soi, ưh lăp Têt bunpimay đĕch mă oei đei hloi lêh et soi khei 6, khei 12 rim sơnăm dơ̆ng.”

Tơ̆ Buôn Đôn, tơdrong bơngai Lào oei kơ bơngai M’Nông, Rađe tôch lơ. Đe sư hơnơ̆ng pơm kiơ̆ dôm tơdrong juăt đơ̆ng băl, chă pơma nơ̆r băl kơna tôch mơmat vă gơ̆h băt bơngai yơ jĭ bơngai Lào, bơngai yơ jĭ bơngai kơtă tơ̆ tơring. ‘Nhŏng Khăm Phon Lào, Kơdră Anih vei lăng choh jang xa apŭng Buôn Đôn, jang lơ̆m Khul jang tơbôl Việt – Lào apŭng Buôn Đôn tơroi: “Lơ̆m hnam dang ei chă klo, chă kăn jing 7 hơdrĕch hơdrung bơih. Bơngai Rađe đei, Jarai đei, H’rê đei, bơngai Yoăn đei mưh oei xa hơdai pôm jơhngâm, bĭ đei tơdrong kiơ. Đơ̆ng tơdrong sŏng xa, hơbăn ao hrŭk truh nơ̆r pơma hơnơ̆ng chă hŏk pơhrăm băl. Tơpă ‘nei đơ̆ng hơiŏh truh ‘lŏ tơ̆ plei Buôn Trí bu bu kŭm gơ̆h pơma đơ̆ng 2-3 nơ̆r phara băl, đei lơ bơngai gơ̆h pơma truh 5-6 nơ̆r hloi.”

Ƀok Bun Mi Lào, sơnăm ‘nâu văjê̆ 70 sơnăm, arih tơ̆ Buôn Trí B, xăh Krông Na, apŭng Buôn Đôn tơroi, mă dôm bơngai Lào chăl blŭng a truh oei tơ̆ groi tĕh Buôn Đôn đĭ lôch kiơ̆ yă ƀok sơ̆ lơ bơih, mă lei dôm chăl đơ̆ng rŏng kơ bơngai Lào tơ̆ xăh sơlam Krông Na oei hơnơ̆ng chĕp vei dôm tơdrong juăt ‘lơ̆ng đơ̆ng sơ̆ kơ bơngai Lào đĕch păng arih xa tôch gơ̆h, hŏk pơhrăm kiơ̆ dôm tơdrong juăt kơ dôm hơdrĕch nai hai kơna gơ̆h đei ƀĕnh jơhngâm đon ‘mêm băt băl: “Tơ̆ âu jang xa kŭm ƀônh, đang kơ ‘nŏh ‘nhŏng oh hơnơ̆ng tơgŭm băl, đei tơdrong kiơ pơmat tat ‘nŏh truh tơgŭm băl, groi tĕh ‘lơ̆ng sem truh oei. Bơngai Lào, bơngai Rađe, bơngai M’Nông, bơngai Yoăn nhen ‘nhŏng ŏh pôm hnam.”

Kiơ̆ ƀok Phạm Trung Nghĩa, Kơdră vei lăng kon pơlei apŭng Buôn Đôn, Buôn Đôn hrei ‘nâu đei 29 hơdrĕch hơdrung arih xa hơdai hăm dang 70 rơbâu ‘nu bơngai, lơ̆m nŏh bơngai Việt hơdrĕch Lào đei dang 300 ‘nu. Dôm bơngai Việt hơdrĕch Lào arih xa tơ̆ âu hơnơ̆ng đei Khul kơdră pơgơ̆r tơgŭm rim tơdrong vă kon pơlei sơđơ̆ng jơhngâm hŏk pơhrăm, bơ̆ jang, tưk tơiung mŭk drăm. Rim sơnăm, ƀlep ƀât Têt so kơ bơngai Lào, apŭng hơnơ̆ng pơgơ̆r ‘lơ̆ng hơiă păng trŏ tơdrong.

Ƀok Phạm Trung Nghĩa pơma: “Bơngai Lào arih xa tơ̆ apŭng đei 300 sơnăm ‘nâu. ‘Ngoăih kơ dôm tơdrong tơgŭm đơ̆ng Đảng păng tĕh đak, apŭng kŭm đei lơ tơdrong tơgŭm lăp ‘lơ̆ng hăm bơngai Lào tơ̆ tơring, pơm thoi yơ vă chă tơdrong jang xa vă kon pơlei gơ̆h jang tŏk tơ̆ groi tĕh kơdih. Nhôn dai tôch tơrĕk truh dôm trong chă tơmang lăng, mă loi hăm tơdrong chă tơmang lăng găh tơdrong jŏh ayŏ kơ dŏ xoang ‘lơ̆ng hơiă kơ dôm hơdrĕch kon kông, ‘nŏh bơngai Lào tơ̆ apŭng Buôn Đôn jĭ 1 hơdrĕch đei tơdrong jŏh ayŏ kơ dŏ xoang ‘lơ̆ng đơ̆ng kơdih ‘năi, nhôn oei adrin iŏk yoa dôm tơdrong ‘nŏh vă pơjing đei trong jang ‘lơ̆ng mưh jang atŏk tơiung chă tơmang lăng tơ̆ tơring.”

Dôm bơngai Việt hơdrĕch Lào tŏk bŏk arih xa hơdai ‘lơ̆ng, mât mĭnh ƀơ̆r đon hăm dôm hơdrĕch hơdrung nai tơ̆ groi tĕh Buôn Đôn, pơjing đei tơdrong pơvei ‘lơ̆ng hơiă lơ̆m tơdrong arih xa, jŏh ayŏ kơ dŏ xoang vang tơgop vei sơđơ̆ng chinh trĭ, tưk tơiung tơdrong jang mŭk drăm tơ̆ tơring.