Hyưp ‘năr mât, lơ unh điên chô̆ hăm unh điên măt ‘năr đơ̆ng Tơdrong jang Tơ̆k hơdăh trong sơlam tơ̆ xăh Krông Na, apŭng Buôn Đôn, ƀrŭng ƀrăng ang hơdăh. Đại úy Y Hán Hwing – Bơngai vei lăng Khul krao hơvơn kon pơlei, Kơđông linh Sêrêpôk, Ƀô đô̆i vei lăng tơring sơlam Đắk Lắk, tơroi, đei unh điên tơ̆k hơdăh, hơyak jơ̆ng dăr joang đơ̆ng ‘nhŏng roi sơđơ̆ng mưh bơ̆ jang: "Đơ̆ng tơdrong jang Tơ̆k hơdăh trong sơlam đei chô̆ unh điên tơ̆ rim jăl trong dăr joang ‘nŏh tôch hiôk hian ăn đe kăn ƀô̆, linh tơ̆ kơđông mưh năm dăr joang, vei lăng kơjăp ‘lơ̆ng tơdrong sơđơ̆ng. Mă 2, tơgŭm chă ƀôh tơtom dôm bơngai ‘mĕh phă ngơ̆r trong sơlam, đơ̆ng noh tôch hiôk lơ̆m tơdrong vei lăng tơring sơlam đơ̆ng kơđông".

Tơdrong jang tơk hơdăh trong sơlam tơ̆ tơring sơlam yoa kơ đông linh Sêrêpôk vei lăng đei trong kơjung truh 3km, hăm 20 tŏ unh điên măt ‘năr, chô̆ tơ̆ tơring đei jrăng sơlam kơsô̆ 45 (2), 1,2 tŏ jrăng ie păng trong dăr joang đơ̆ng kơđông. Tơdrong jang âu yoa Anih jang đoan dêh char Đắk Lắk păng dôm anih tơgŭm vang bơ̆ jang lơ̆m khei 3 sơnăm ‘nâu, ƀlep ƀât tơbăt 65 sơnăm năr Ƀô đô̆i vei lăng tơring sơlam.

Mŏ H’Giang Niê, Bí thư Đoàn dêh char Đắk Lắk ăn tơbăt, Kơđông linh Sêrêpôk jĭ anih mă 2 tơ̆ dêh char đei tơlĕch tơdrong jang Tơ̆k hơdăh trong sơlam lơ̆m sơnăm ‘nâu. ‘Nâu kŭm jing 1 lơ̆m 2 tơdrong jang tơm đơ̆ng sơnăm mơlôh Đắk Lắk đei tơlĕch lơ̆m sơnăm vă pơjei băl bơ̆ jang hơiă kơ 120 sơnăm pơjing dêh char Đắk Lắk: "Sơnăm ‘nâu nhôn vă adrin pơjing 27km trong sơlam đei tơk hơdăh hăm unh điên. Truh dang ei nhôn krao hơvơn, mong akŏm jên tơmam đơ̆ng lơ khul grŭp lơ̆m păng ‘ngoăih kơ dêh char vang tơgop, tôch hơiă ‘nŏh đei lơ khul grŭp, bôl boăl đoàn viên, druh dăm păng tơdrong vang tơgŭm tôch pơnĕh đơ̆ng dôm anih tĕch mơdro, dôm dêh char boăl vă nhôn jang đei đon pơhnŏng đơ̆ng nhôn. ‘Nâu jĭ tơdrong jang vă yak hơdoi hăm đe linh tơ̆ tơring sơlam, rim jrăng unh điên jĭ 1 jrăng arih tơƀôh hơdăh tơdrong pơm tơm tơ̆ tơring sơlam teh đak Việt Nam".

Thượng tá Rơ Lan Ngân, Phó Chính ủy Ƀô đô̆i vei lăng tơring sơlam dêh char Đắk Lắk akhan: Dôm tơdrong jang Tơ̆k hơdăh trong sơlam ưh lăp tơƀôh hơdăh đon pơngơ̆t đơ̆ng Anih jang đoan hăm khul linh Ƀô đô̆i vei lăng tơring sơlam đĕch mă oei vang tơgop pơtho tơƀôh jơhngâm đon jang kăch mang, tơdrong pơm tơm, vei lăng sơđơ̆ng tơ̆ tơring sơlam ăn đe đoàn viên druh dăm dơ̆ng. Hăm rim tơdrong jang đei sơng iŏk, dôm kơđông linh hơnơ̆ng dăr lăng, hơmet ming vă gơ̆h đei yoa 'lơ̆ng păng đunh đai.

"Nhôn tôch hơiă iŏk đei tơdrong pơngơ̆t đơ̆ng kơdră chĕp kơ̆l rim anih jang. Lơ̆m noh, Anih jang đoan dêh char Đắc Lắc păng Anih jang đoan dêh char Bình Dương hlôi tơgŭm ăn nhôn kơƀŏng điên Tơk hơdăh trong sơlam. Nhôn vă iŏk yoa kơƀŏng unh điên âu trŏ hăm tơdrong jang păng vei lăng ‘lơ̆ng mưh bơ̆ jang, vang tơgop jang đei jơnei ‘lơ̆ng tơdrong jang chinh trĭ đơ̆ng dôm anih jang pơjao ăn Ƀô đô̆i vei lăng tơring sơlam dêh char, bơ̆jang 'lơ̆ng tơdrong jang tơ̆ hơnăp kơnh".

Dêh char Đắk Lắk đei dang 73km trong sơlam, tơtil hăm dêh char Mondulkiri, teh đak Campuchia. Hăm tơdrong jang Tơ̆k hơdăh trong sơlam tơ̆ tơring sơlam yoa druh dăm sơnăm mơlôh Đắk Lắk bơ̆ jang lơ̆m sơnăm 'nâu, tơchĕng adrol gô tơ̆k hơdăh tơ̆ dôm jrăng sơlam yoa Ƀô đô̆i vei lăng tơring sơlam Đắk Lắk vei lăng. Hăm rim jrăng unh sơlam đei chô̆ unh điên, ưh lăp pơjing tơdrong hiôk hian ăn kăn ƀô̆, linh tơ̆ tơring sơlam năm dăr joang, veo kơjăp tơdrong sơđơ̆ng đĕch, mă oei tơ̆k hơdăh tơdrong pơm tơm tơ̆ rim hơgăt teh gĭt kăl tơ̆ tơring sơlam kơ teh đak dơ̆ng.