Tơring bri 547A, 'long bri kơ Kŏng ti jang bri Buôn Ja Wầm (tơ̆ apŭng Cư M’gar, dêh char Đăk Lăk) dôm khei tơjê̆ âu bri hơnơ̆ng ƀơm phă pơrăm. Tơ̆ tơring ataih đơ̆ng Anih vei lăng bri kơsô̆ 1 tam mă truh 100m, kơtă ah jih trong teh, pơhlom 1ha bri 'nao ƀơm đe koh pơrăm, 'long bri oei kĕt keng.

Tăp dăr noh, lơ 'long ƀơm ot tơm hlôi lôch kro, hla honh pơđĭ. Ƀok Trần Hồng Minh, bơngai jang tơ̆ Anih vei lăng bri kơsô̆ 1 ăn tơbăt, dôm bơngai phă bri ưh kơ hli kơ bu hloi. Ưh kơ mơ̆ng tơjê̆ dah mă ataih, mưh đei bri noh oei phă pơrăm. Ah ƀôh băt, tang găn noh đe sư tơjră plơ̆ hloi, phŏ sô̆ khul năm truh pơjuă pơrăm. Kơdih po ƀok Minh ah blŭng khei 6 âu ki adoi ƀơm dôm jĭt ‘nu tơtông bri teh tôn mah mơ̆t ƀĭch tơ̆ hnam pơgang: “Kon pơlei kơdâu sơlah hơrih jâ̆p jang lơ̆m bri, đe sư tơgar iŏk teh bri kĕt keng noh tơnap kơ hơlen. Dang ei tôch tơnap tap, kơdih po inh ‘năr noh sơ̆ ‘nao brŏk đơ̆ng jang, đe sư blĕk kơ đon năm truh anih jang, đe sư teh tôn mah năm ƀĭch hnam pơgang, đe sư tôch khĕnh”

Atŭm hăm Tơring bri 547A, lơ tơring bri nai kơ Kŏng ti vei lăng bri Buôn Ja Wầm bri tŏk bŏk ƀơm phă pơrăm. Tơdrong khenh ưh kơ hli kơ đe ƀôh hơdah ah dôm hơgăt bri ƀơm pơrăm oei tơjê̆ dôm anih vei lăng bri, tơjê̆ hăm jăl trong tơm hơnơ̆ng đei bơngai vih vơ̆t.

Tơ̆ dôm teh bri ƀơm phă pơrăm, lơ ‘long pơm pơnăn sa đei pơtăm nhen tơh, hơƀo jing trong mă khul tơtông bri sơkơ̆t “tơdrong pơgơ̆r po”. Ƀok Nguyễn Công Thắng, Kơdră Anih vei lăng bri kơsô̆ 3 sơnhôi tơroi gah tơdrong phă pơrăm bri, tơgar iŏk teh. Tơdrong jang noh hrat, hli hlơt, mă lei jên khei jang ưh đei sơđơ̆ng. Tŏk 5 khei kơ âu, ‘nhŏng oh tơ̆ anih jang vei lăng bri ưh đei jên khei. Kơsô̆ bơngai pơdơh pơm jang roi năr roi tŏk lơ, kơlih tơdrong jang roi năr roi hrat hli: “Kon pơlei kơdâu sơlam truh noh đe phă pơrăm bri lơ, lơ̆m kơplah bơngai jang vei bri noh tŏ sĕt, tơnap tap ăn kơ đe ‘nhŏng oh. ‘Nhŏng oh năm jang noh ưh đei lơ bơngai, kon pơlei hơrih lơ̆m bri roi năr roi kơdrâ̆m noh ưh kĕ vei lăng tôm ôh. Jên khei jang noh minh ‘nu 3 trĭu đĕch, bơngai jang đunh noh đei 5 trĭu hlj, jang ưh kơ mơ̆ng ‘năr lêh, ‘năr giĕng adoi ưh đei pơdơh. Jên khei dang ei kŏng ti tam mă kla truh 5 khei bơih. Đei minh ƀar ‘nu pơdơh kơ jang bơih, tơdrong hơrih ‘nhŏng oh tam mă đei sơđơ̆ng”

Ƀok Nguyễn Tất Văn, Kơdră Kŏng ti jang gah bri Buôn Ja Wầm ăn tơbăt, jô̆ truh blŭng khei 9, lơ̆m tơring bri mă anih jang vei lăng đei ƀôh 303 ‘măng phă bri hăm hơgăt să hloh 96ha. Lơ̆m noh, 99% ‘măng phă ưh băt bơngai yơ. Lơ̆m kơsô̆ 8.800ha anih jang vei lăng, dang ei oei pơhlom 3.000ha đei bri, mă lei roi năr roi tơjur: “Phă bri, tơgar iŏk teh lơ̆m tơring bri kŏng ti vei lăng đơ̆ng blŭng sơnăm truh dang ei đei ƀôh tơnap tap hli hlơt, dôm tơdrong phă bri tŏk lơ. Tơpă bri tơ̆ Buôn Ja Wầm dang ei mă lơ noh bri ưh giơ̆ng ‘lơ̆ng păng bri hăm lơ hơdrĕch ‘long noh tơdrong phă pơrăm bri lơ̆m tŏ sĕt khei năr mă lei hơgăt bri să noh kơsô̆ ‘long tŏ sĕt păng ‘long iĕ”

Ƀok Trương Văn Dự, Kơdră Anih jang Vei lăng bri apŭng Cư M’Gar, dêh char Đăk Lăk ăn tơbăt, tơdrong jang vei lăng bri tơ̆ Kŏng ti jang gah bri Buôn Ja Wầm noh ưh đei sơđơ̆ng. Hăm 9 kăn ƀô̆, bơngai juăt jang, khul jang kơ kŏng ti âu ưh đei vei sơđơ̆ng vei lăng 8.800ha bri păng teh bri. Lơ̆m khei năr tơm, Anih jang athei apinh dơ̆ng đơ̆ng 7-8 kăn ƀô̆ truh atŭm vei lăng bri Buôn Ja Wầm, mă lei lơ̆m tŏ sĕt khei năr đĕch, ah khul jang vei lăng bri jăk vih noh bri pơtoi ƀơm phă pơrăm dơ̆ng. Dang ei Kŏng ti jang gah bri Buôn Ja Wầm hlôi đei asong jing 2 kŏng ti vang jang, đei tơ-‘ngla vang jang mă lei tam mă đei jơnei tơnăp: “Inh ƀôh tơdrong jang vei lăng bri kơ kŏng ti dang ei noh tôch tơjruh, ưh kơ kĕ vei lăng tơnăp bri ‘long. Dang ei kŏng ti pơma đam noh vă iŏk bơngai jang vei lăng bri mă lei hăm tơdrong oei hre jên khei jang noh ưh đei bơngai khĭn mơ̆t jang tơ̆ âu. Nhôn adoi pơkăl Anih jang Choh Pơtăm pơtruh nơ̆r hăm dêh char, bri noh kơyuơ dêh char pơjao noh athei đei nơ̆r pơtruh hăm anih jang bri asong jên jang, khul jang vă gơh jang kiơ̆ sơnong pơjao chă hơlen păng tang găn tơdrong phă pơrăm bri”

Lơ̆m lơ sơnăm kơ âu, bri tơ̆ Kŏng ti jang gah bri Buôn Ja Wầm hơnơ̆ng ƀơm phă pơrăm, teh bri jing hê̆ tơmam kăp gĭt ăn đe tơtông bri. Hloh 5.800ha lơ̆m kơsô̆ 8.800ha pă đei oei bri, pơhlom 3.000ha nai noh đei ‘long bri mă lei ưh đei giơ̆ng ‘lơ̆ng. Hăm tơdrong pơrăm hĕch mĕch thoi âu, khul tơtông bri ưh kơ hli hăm khôi luơ̆t tơchơ̆t nhen dang ei, bri tơ̆ Buôn Ja Wầm hơbŏ gô hiong răm đĕch bơih.