Kiơ̆ tơdrong tơproh trong jang kơ dêh char Đắk Lắk đơ̆ng 2021 - 2030, trong vă jang truh sơnăm 2050, thĭ xăh Buôn Hồ jĭ tơring kơdrâm rơgŏh ‘lơ̆ng tơ̆ Tây Nguyên. ‘Nâu kŭm jing anih tơƀưh trong tĕch mơdro gĭt kăl lơ̆m Trong jang mŭk drăm tơguăt tơring Tây Nguyên, tơring tơter đak dơsĭ găh Pơbăh Tơring tŏk bŏk păng tơring Hơlĕch kơtu Campuchia.

Đơ̆ng tơdrong tơproh trong jang atŭm, Anih vei lăng kon pơlei thĭ xăh Buôn Hồ hlôi pơjing Tơdrong jang chĕng hơmet ming thĭ xăh Buôn Hồ truh sơnăm 2045 păng hlôi đei Anih vei lăng kon pơlei dêh char kĭ ăn. Tơdrong tơm ‘nŏh vă pơjing păng atŏk tơiung thĭ xăh Buôn Hồ jing 1 lơ̆m dôm anih jang chinh trĭ, mŭk drăm, jŏh ayŏ kơ dŏ xoang, jang mŭk drăm, khoa hŏk ki thuơ̆t păng chă tơmang lăng tơ̆ găh Tu dêh char Đắk Lắk. Tơproh trong jang ưh lăp jing hla ar chih luơ̆t kăl vă vei lăng, tơmât jên jang atŏk tơiung tơring kơdrâm đĕch, mă oei tôch gĭt kăl lơ̆m trong jang tơiung pơjing, ming man păng jang tŏk ăn thĭ xăh dơ̆ng; pơjing jơhngâm pran, tơdrong ‘lơ̆ng ăn thĭ xăh Buôn Hồ jang tŏk păng iŏk yoa rim tơdrong ‘lơ̆ng, vă sơng iŏk jên tơmât jang.