Hơtăih đơ̆ng hơnih kơdrơ̆m Buôn Ma Thuột dang 12km găh Hơlĕch Pơbăh, dơnau Ea Kao, găh tơring Ea Kao, pơlei tơm Buôn Ma Thuột ‘noh jĭ hơnih tơmang pơhiơ̆ ‘lơ̆ng liĕm, hơvơn đei lơ tơmoi lơ̆m dêh char păng dêh char anai hăm cham char rơngơp.

Hui bơngai băt akhan, ‘nau jĭ pơnơ̆t đak kơ yươ kon bơngai ming man chă bơ̆ rim thoong đak glung, đak hơboong lơ̆m tơring vă tơgŭm ăn pơro tơruih ăn chŭn na tơring Hòa Xuân rơhŭ. Hơnih au đei ming man lăp đơ̆ng rŏng thĭ xah Buôn Ma Thuột (‘noh pơlei tơm Buôn Ma Thuột hrei au) đei rơngei. Kỹ sư Nguyễn Quyền, oei lơ̆m phường Tân Lợi, pơlei tơm Buôn Ma Thuột - lơ̆m mă noh sơ̆ đei Hơnih tơm jang Pơnơ̆t đak pơjao ăn năm tơ̆ Dak Lăk bơ̆ jang. Ƀok Nguyễn Quyền hơdơ̆r dơ̆ng: Ba ‘noh bơngai chă chhơ̆ pơjing păng pơrô̆ ming man pơnơ̆t đak au.“Ĭnh đei pơjao tơdrong jang chă tơchĕng hơlen vă pơjing đei mĭnh dơnau đak, pơm lơ liơ mă đei đak chă pơro tơruih ăn ‘long pơtăm măh mai. Pơnơ̆t đak au ming man lăp 2 sơnăm đĕch ‘noh hlôi jing dơnau păng chă pơro đak ăn tơring jang chŭn na kơ kon kông vă đei phe sa ƀa sŏng. Chăl mă noh sơ̆ ‘nao rơngei kơna găh phe ƀa ‘noh gĭt kăl hloh”.

Đơ̆ng rim hơnih jang ‘măng mă blŭng đei ming man hăm jơhngơ̆m kon bơngai, truh dang ei Buôn Ma Thuột hlôi đei hơyak atŏk tơ iung tĕnh koăng păng pran kơtang, đei jing Hơnih kơdrơ̆m kơ loăi 1 kơ dêh char hăm lơ hơnih ming man gĭt kăl ‘lơ̆ng liĕm hơtŏ lơm tơring păng Teh đak. Trong grung Võ Nguyên Giáp mă kon pơlei Buôn Ma thuột joăt chă krao akhan Trong grung Hơlĕch-Pơmơ̆t, pơm keh đang đơ̆ng vă đĭ sơnăm 2023 ‘noh jĭ trong tih să hloh kơ pơlei tơm truh khei năr hrei au, hăm akŏp kon jên tơmơ̆t jang hlŏh 1.200 ti hlak jên. Tơdrong pơm keh đak ăn rok hlôi pơjing ‘lơ̆ng hơ iă ăn gre chă kơdau mơ̆t lĕch tơ̆ găh Hơlĕch-Pơbăh pơlei tơm, pơ̆ih trong rơvơn hle lơ̆m atŏk tơ iung trong hnam adoi nhen tơ iung pơjing pơkeh đang trong nơnăm lơ̆m hơnih kơdrơ̆m Buôn Ma thuột.

Prăt 8 sơnăm ƀôh ming man trong, dang ei, ƀok Đặng Công Viên, oei tơ̆ phương Tự An, pơlei tơm Buôn Ma Thuột chơt hơ iă mưh rim năr oei hơnơ̆ng rok trong glung gơ glơng au.“Mưh đei trong au kon pơlei tôch kơ chơt hơ iă. Tơdrong mă au hlôi hơnhăk đei gơ glang păng pơm pơtrŭt atŏk tơ iung mŭk drăm kơ tơring atŏk tơ iung.”

Lơ̆m 49 sơnăm atŏk tơ iung, pơlei tơm Buôn Ma Thuột hlôi đei lơ hơnih jang ‘nao, đơ̆ng trong nơnăm, hơlŏng đak, găh viên thông truh hloi cham să, cham pơkao păng dôm tơdrong ‘lơ̆ng rŏ anai lơ̆m pơlei tơm. Tơring kơdrơ̆m ling lang pơih să, tơdrong pơtho pơhrăm, jang pơgang đei lăng ba, tơmơ̆t jên jang. Pơlei tơm roi năr roi tơplih kơtang găh mŭk drăm, hơrih sa kơ kon pơlei. Pơlei tơm Buôn Ma Thuột đei hơgăt teh să hloh 37.700ha, măt bơngai hloh 380.000 ‘nu, jang sa iŏk đei lơ̆m 1 sơnăm 1 ‘nu bơngai truh 100 triu hlak jên, lơ hloh vă jê̆ mĭnh poăt jô̆ hơtŏ lơ̆m dêh char.

Ƀôh hơdăh tơdrong tơplih ‘nao pơlei pơla, ƀok Đỗ Thành Tài, Việt kiều Mi păng kon pơlei oei lơ̆m pơlei tơm Buôn Ma Thuột jei ƀôh hơdăh lei lăi găh pơlei pơla Dak Lăk:“Lơ̆m mă ĭnh năm sơ̆ kon pơlei pơla oei tơnap tap, pơsel pơsŏ, tim mă đei trong ‘lơ̆ng, dang ei brŏk ngôi ‘noh ƀôh tơplih kơtang, tơdrong hơrih sa kơ kon pơlei sơđơ̆ng, mŭk drăm tŏk kơtang kơna ba chơt hơ iă dêh. Ba tôch hưch hnah hơmanh bơnê mưh đei brŏk vih tơ̆ pơlei pơla kơdih, atok tơ iung mŭk drăm păng vang tơgop ăn tơring păng tơpôl”.

Hưch hanh hơmanh bơnê găh tơdrong joăt joe kĕch mang nuih mơng pran kơtang kơ hơdrech hơdrung, mŏ H’Hương Bkrông, Bí thư Đoàn pơlei tơm Buôn Ma Thuột sơkơ̆t hơdăh, hơdruh tơdăm Dak Lăk tŏk bŏk kiơ̆ yok rok jơ̆ng mĕ ƀă yă ƀok, hăm jơhngơ̆m đon mơlôh Groi kông kiơ̆ yok hơnăp jang tơm tơ-‘ngla tơ̆ hơnăp kơnh lơ̆m tơ iung pơjing pơlei pơla:“Hôn bơnê kơ mĕ ƀă yă ƀok, mih ma duch nă hlôi tơ iung pơjing đei rơngei keh kong.Hrei au, hăm jơhnơr mơlôh gô ling lang plang đĭ jơhngơ̆m đon kơdih vă iung jang lơ̆m tơdrong jang tơ iung pơjing păng vei lăng Teh đak lơ̆m chăl hle”.

Tơ̆ nơ̆r pơma pơtôch kơsô̆ 67, sơnăm 2019 găh “ Tơ iung pơjing păng atŏk tơ iung pơlei tơm Buôn Ma Thuột truh sơnăm 3030, lăng truh sơnăm 2045”, Hơnih tơm Chinh trĭ hlôi tơlĕch ăn trong jang tơ iung pơjing păng atŏk tơ iung pơlei tơm Buôn Ma Thuột jing Tơring kơdrơ̆m tơm tơring Tây Nguyên. Đơ̆ng noh truh dang ei, pơlei tơm tĕnh koăng jang kiơ̆ kơjăp dôm trong bơ̆ jang đei ƀơm truh vei lăng jên hu, kon jên jang teh đak; pơjao chĕp pơgơ̆r lơ̆m trong pơprŏ; hơvơn tơơt jên  jang; chă rơ̆ih păng krao tơmơ̆t bơngai hơgei. Ƀok Vũ Văn Hưng, Kơdră Hơnih vei lăng kon pơlei kơ pơlei tơm Buôn Ma Thuột tơbăt, trong atok tơ iung pơlei tơm lơ̆m khei năr kơnh gô akŏm xek tơlang dôm tơdrong tơhlăk tơhlĭn lơ̆m atŏk tơ iung; iung jang dôm tơdrong đei, kĕ jang păng hơvơn tơpôl tơmơ̆t jên jang ăn pơlei tơm; adoi hơdrin jang keh đang tơ iung pơjing tơring tơrang ‘nao chăl hle.“Lăng ba kơjăp rim tơdrong vă jang trong nơnăm, lơ̆m au akom jang keh đang pơtruh ăn rim hơnih tơm, hơnih jang vă pơdrơ̆ng kiơ̆ rim tơdrong vă jang hơmet ming pơ ‘lơ̆ng pơlei tơm. ‘Ngoăih kơ ‘noh, apĭnh athei rim Hơnih tơm, hơnih jang gô lăng ba tơmơ̆t jên jang pơm trong ver păh Hơlĕch kơ Buôn Ma Thuột vă pơjing đei trong nơnăm ‘lơ̆ng liĕm tăp dăr pơlei tơm. Hơnơ̆ng tơmơ̆t jên jang ming hơmet trong hnam tơring kơdrơ̆m, lơ̆m au găh dơnơm ‘long yơ̆p, jih trong, cham pơkao păng jang keh đang trong tơlĕch jang kơ 3 tơring uơ oei lơ̆m Tơ iung pơjing tơring tơrang ‘nao ‘lơ̆ng liĕm păng tơring tơrang ‘nao pơm jŭk yŭk trong hơlau lơ̆m sơnăm 2024”.

Buôn Ma Thuột hrei au hlôi đei hơyak pran kơtang, roi năr roi jing pơlei tơm rơgoh ‘lơ̆ng. Atŭm hăm tơdrong lăng ba đơ̆ng Đảng, Teh đak, tơdrong lăp đon, tơgoăt tơgoăl kơ 40 hơdrĕch hơdrung vang hơrih sa lơ̆m tơring, Buôn Ma Thuột hrei au tŏk bŏk kơrŭn tơ iung pơjing vă đei jing Hơnih Kơdrơ̆m rơgoh ‘lơ̆ng-gơ̆h hơgei-oei sa hơ iă, hơdrin đei jing Hơnih kơdrơ̆m tơm tơring Tây Nguyên./.