Dêh char Kon Tum hăm 2 dêh char Attapư, Sê Kông teh đak CHDCND Lào đei trong sơlam teh đak kơjung hơtăih hloh 154km.

Hlŏh 3 sơnăm au ki, 3 dêh char hlôi tơlĕch jang kiơ̆ Hla bơar tơchơ̆t ƀlŏk hơdơ̆r găh jang hơdoi măt trân iŏk đei lơ tơdrong jơnei hơ iă. Mă kăl ‘nŏh pơrô̆ pơrôp, atŏk jơhngơ̆m đon hlôh vao kơ kon pơlei 3 dêh char tang găn jĭ hơbuh Covid-19; Sơnăm Tơgoăt tơgăl Việt Nam- Lào 2022; Atŭm hăm ‘nŏh jang kiơ̆ jơnei bơ̆ jang hơdoi năm tơchă, kôch akŏm đei 129 kơ̆l ƀô̆ đô̆i păng bơngai joăt jang Việt Nam lôch dŏng teh đak tơ̆ Lào chơ vih tơ̆ teh đak pơdong grong ƀŭ; tơ iung pơjing trong sơlam teh đak rơngei hiôk hian, tơgoăt tơgoăl, jang hơdoi păng atŏk tơ iung ... Tơ̆ hop akŏm, Hơnih bơ̆ jang Măt trân Tổ quốc Việt Nam dêh char Kon Tum atŭm hăm Hơnih bơ̆ jang Măt Trân Lào tơ iung pơjing teh đak 2 dêh char Attapư hăm Sê Kông hlôi pơma dơnuh dôm tơdrong jang hơ iă găh bơ̆ jang măt trân; drơ̆ng mĭnh nơ̆r hơnơ̆ng vei kơjăp păng atŏk tơ iung tơgoăt tơgoăl dih băl kơjăp iăp kơtang, lui ngêh dih băl kơtang. Măt trân teh đak 3 dêh char hơnơ̆ng iung jang hơdoi kơjăp tơdrong chă pơma dơnuh tơbăt dih băl trong jang hơ iă lơ̆m bơ̆ jang Măt trân; atŏk kơtang jang hơdoi lơ̆m rim tơdrong jang mŭk drăm, mơdro sa, khoa hŏk-kih thuơ̆t, pơrô̆ pơrôp kon pơlei ƀar teh đak jang kiơ̆ trong jang tơgoăt tơgoăl hơdrĕch hơdrung lơ̆m tơ iung pơjing păng vei lăng kơjăp iăp kơtang Teh đak kơ ƀar teh đak.