Tơdrong tôch hơiă kiơ̆ kơsô̆ chih jô̆ đơ̆ng Anih vei lăng tơdrong chă tơmang lăng kơ teh đak Việt Nam ăn ƀôh, đơ̆ng rŏng 11 khei sơnăm 2023, anih chă tơmang lăng Việt Nam sơng đei 11,2 triu tơmoi đơ̆ng teh đak đe păng dang 100 triu ‘nu bơngai chă tơmang lăng vih vât lơ̆m teh đak, hlŏh 11 triu ‘nu bơngai đơ̆ng apŭng plenh tĕh, lơ hlŏh 4 ‘măng pơting hăm sơnăm 2022. Lăp jô̆ truh đĭ khei 10/2023, iok yoa đơ̆ng anih chă tơmang lăng đei 556 rơbâu ti hlak jên. 

Ƀok Nguyễn Công Hoan – Kơdră Anih chă roi tơbăt kơ Khul jang chă tơmang lăng Việt Nam tơroi, đei 4 tơdrong vă gơ̆h jang đei đon pơhnŏng sơng đơ̆ng 12 –13 'nu triu tơmoi đơ̆ng teh đak đe lơ̆m sơnăm 'nâu: “Mă mônh ‘nŏh jĭ tơdrong tơgŭm ưh kăl pơm hla ar mât lĕch, tơdrong pơm hla ar hăm điên tư pơtơm đei yoa đơ̆ng ‘năr 15/8/2023. Mă 2, sơnăm 2023 tơdrong jang tơbôl đơ̆ng Việt Nam tôch ‘lơ̆ng. Dôm tơdrong ‘nâu jing tôch đei yoa vă roi tơbăt teh đak, kon bơngai Việt Nam păng sơng tơmoi truh. Mă 3, trong jang tơiung ming tơdrong jŏh ayŏ kơ dŏ xoang đơ̆ng hơdrĕch hơdrung kŭm hăm năng tơdrong chă tơmang lăng ‘noh jĭ tơdrong jang mŭk drăm tơm, lơ kơjă kăp gĭt đơ̆ng jŏh ayŏ kơ dŏ xoang Việt Nam hlôi đei pơjing lơ tơmam pơ yoa ăn tơdrong chă tơmang lăng tôch ‘lơ̆ng, pơm lăp đon tơmoi chă tơmang lăng păng gơ̆h pơjei băl. Mă 4, tơdrong chă tơmang lăng lơ̆m apŭng plenh tĕh oei vă tŏk hơlơ̆k dơ̆ng, dôm teh đak juăt chă tơmang lăng tơ̆ bơ̆n jang tŏk pran dơ̆ng păng bơngai đơ̆ng dôm teh đak ‘nâu năm tơmang lăng tơ̆ teh đak bơ̆n tŏk lơ ƀiơ pơting hăm adrol kơ đei jĭ hơbuh ki”.

Vă hơnơ̆ng jang tŏk pran lơ̆m sơnăm 2024, kiơ̆ dôm bơngai juăt jang păng anih chă tơmang lăng, dôm anih tĕch mơdro, dôm tơring păng anih jang kơpal athei akŏm jơhngâm ăn 1,2 tơdrong jang gĭt kăl. Blŭng a, athei băt dang ei jĭ khei ‘năr “tôch ‘lơ̆ng” vă sơng tơmoi đơ̆ng teh đak đe, yoa thoi nŏh athei hơtŏk jơhngâm bơ̆ jang ‘lơ̆ng Tơdrong tơchơ̆t 82 đơ̆ng Khul kơdră teh đak hăm lơ trong jang tôch pran. Kŭm hăm Hà Nội păng plt Hồ Chí Minh, dôm tơring oei pơgơ̆r lơ tơdrong vă sơng Tết tây, sơng tơmoi truh tơmang lăng.

Ƀok Nguyễn Trùng Khánh – Kơdră Anih vei lăng tơdrong chă tơmang lăng teh đak Việt Nam pơma: “Khei tơm kơ tơdrong chă tơmang lăng lơ̆m apŭng plenh teh ‘nŏh đơ̆ng khei 10 sơnăm adrol truh khei 4 sơnăm đơ̆ng rŏng. Dôm anih chă tơmang lăng Việt Nam oei hơmet lơ tơmam pơ ‘nhŏ ăn tơdrong chă tơmang lăng ‘nao păng hơtŏk tơdrong roi tơbăt tơ̆ dôm teh đak đei lơ bơngai đa chă tơmang lăng, mă loi chă tơmang lăng ƀât đei pơgơ̆r kơchơ tih, dôm kơchơ chă tơmang lăng lơ̆m apŭng plenh teh”.

Năng dơ̆ng sơnăm 2023, mă đơ̆ng sơng đei lơ tơmoi chă tơmang lăng đơ̆ng apŭng plenh teh ră mă lei, mă tơpă ưh kơmăh lơ mơ̆n pơting hăm dôm teh đak lơ̆m tơring. Kiơ̆ ƀok Vũ Thế Bình – Kơdră vei lăng Khul jang tơmang lăng Việt Nam, kŭm hăm hơnơ̆ng hơtŏk tơdrong sơng tơmoi đơ̆ng dôm teh đak boăl juăt so, athei hơtŏk tơdrong sơng iŏk tơmoi đơ̆ng châu Âu păng 1,2 teh đak nai hai: “Tơmoi chă tơmang lăng đơ̆ng teh đak đe ‘nŏh jĭ 1 lơ̆m dôm khul bơngai gĭt kăl mă anih chă tơmang lăng Việt Nam athei chă trong sơng. Vă sơng đei tơmoi đơ̆ng teh đak đe ‘nŏh athei đei lơ tơmam ‘nao, tơdrong pơvih ‘nao mă lăp hăm bơngai đơ̆ng teh đak đe. Anih jang xa kŭm đei tơplih, dang ei ưh pă chă sơng bơngai đơ̆ng teh đak jê̆ băl đĕch mă dôm teh đak hơtăih kŭm tôch gĭt kăl bơ̆n athei đei trong sơng iŏk ‘năi.”

Hăm tơdrong chă tơmang lăng lơ̆m teh đak, mă đơ̆ng sơnăm 2023 jang tŏk ‘lơ̆ng, mă lei kiơ̆ dôm công ty chă tơmang lăng, iŏk yoa đơ̆ng chă tơmang lăng lơ̆m teh đak tam mă nhen đon hơmĕng, yoa mŭk drăm oei pơmat tat, kon pơlei pơhuach jên ưh kơ lơ, lăp pơ ‘nhŏ ăn dôm tơdrong tĕch răt tơmam đei hơpăh đĕch, tam đei trong chă thông đunh năr păng huach lơ jên.

Vă sơng iŏk tơmoi lơ̆m teh đak, ƀok Bùi Thanh Tú – Kơdră Marketing Công ty chă tơmang lăng BestPrice akhan: “Mă mônh ‘nŏh kơjă vĕ gre păr truh tơ̆ dôm anih chă tơmang lăng lơ̆m teh đak athei tơjur ƀiơ̆ vă pơm hơtŏk tơdrong ‘mĕh năm chă tơmang lăng đơ̆ng tơmoi. Bơ̆n gơ̆h lăng ƀôh lơ̆m sơnăm 2023 đei khei 'năr kơjă vĕ gre păr năm tơ̆ Phú Quốc dăh mă Nha Trang tŏk tôch dêh, ƀơm ưh 'lơ̆ng truh tơdrong 'mĕh chă yak vih vât đơ̆ng tơmoi. Mă 2 'nŏh atŏk tơiung chă tơmang lăng kơjăp 'lơ̆ng, vei kơjăp dôm tơdrong 'lơ̆ng đơ̆ng cham char bri brăh, veh ver tơdrong tơlĕch jên jang druh kiơ̆ băl, đang kơ 'nŏh tơmoi lăp truh ngôi 1 vât đĕch kuă năm hơlơ̆k hloi. Mă 3 'nŏh jĭ dôm tơring athei bơ̆ jang 'lơ̆ng tơdrong roi tơbăt, tơlĕch trong chă tơmang lăng hơdai hăm pơjing 'nao tơmam pơyoa ăn chă tơmang lăng vă sơng tơmoi truh: lơ̆m dôm sơnăm âu ki, bơ̆n ƀôh Hà Nội hăm Festival Pơyan Puih Hà Nội, dăh mă Giĕng chă tơmang lăng HCM hlôi jang 'lơ̆ng dôm tơdrong ‘nâu vă sơng tơmoi truh hăm tơring kơdih”.

Tơ̆ Hop akŏm atŏk tơiung chă tơmang lăng Việt Nam hrĕnh, pran kơjăp ‘nao âu, Thủ tướng Phạm Minh Chính pơma hơdăh, chă tơmang lăng đei năng jĭ 1 anih jang mŭk drăm tơm, tơgop gĭt kăl ăn tơdrong chă tơdrong jang, sut pơđĭ pơngot, tơjur tơnuh hin, sơng iŏk jên jang, tưk tơiung tơdrong jang tŏk păng tơplih ming trong jang mŭk drăm, chĕp vei păng pơm hơtŏk kơjă kăp gĭt đơ̆ng tơdrong juăt, jŏh ayŏ kơ dŏ xoang ‘lơ̆ng đơ̆ng hơdrĕch hơdrung, pơm hơtŏk tơdrong arih xa găh tơmam drăm păng jơhngâm đon kon pơlei. Vă atŏk tơiung chă tơmang lăng jing tơdrong jang mŭk drăm tơm kiơ̆ nơ̆r pơtho đơ̆ng Anih tơm Chinh trĭ, đơ̆ng Thủ tướng teh đak, chă tơmang Việt Nam kăl đei tơplih ming đon tơchĕng, trong jang ‘nao hăm lơ tơdrong pơchĕh rơgei, ‘lơ̆ng hơiă, đei yoa; bơ̆ jang “hơdai mă kơjăp ‘lơ̆ng, jang hơdai tôm tơdrong”.