Đơ̆ng blŭng sơnăm truh dang ei Tơring chă tơmang lăng Măng Đen, apŭng Kon Plông, sơng đei tơmoi năm tơmang lăng tôch lơ, hăm hlŏh 374.000 ‘nu tơmoi, iŏk đei hlŏh 1 puăt kơsô̆ tơmoi năm chă tơmang lăng tơ̆ dêh char Kon Tum. Ƀok Đặng Quang Hà, Kơdră vei lăng kon pơlei apŭng Kon Plông, ăn tơbăt, 3 sơnăm tơjê̆ âu, tơdrong chă tơmang lăng lơ̆m apŭng tŏk pran, mă hơdăh sơnăm 2022 apŭng sơng đei 600.000 ‘nu tơmoi, sơnăm 2023 ‘nŏh 1 triu păng sơnăm 2024 ‘nŏh 1,2 triu ‘nu tơmoi truh chă tơmang lăng.

Mă lei kiơ̆ ƀok Đặng Quang Hà, tơdrong ‘nâu ưh kơsĭ, apŭng ưh jor vang tơgop hloi ăn tơdrong jang tŏk truh 2 kơsô̆ kơ dêh char ôh tơdăh ưh jăh tơlĕch jang ‘lơ̆ng hlŏh dôm trong jang vă sơng tơmoi truh tơmang lăng sơđơ̆ng ‘lơ̆ng: “Ưh đei trong jang, ưh đei tơlĕch đon pơhnŏng ‘nŏh ưh kĕ vei lăng ‘lơ̆ng cham char ‘lơ̆ng rŏ. Pơjing um rup chă tơmang lăng athei tơlĕch lơ tơdrong vei lăng teh đak, lơ̆m noh đei pơjing hơnăn, pơjing um ai ăn Tơring chă tơmang lăng Măng Đen. Tơdăh đơ̆ng dang ei ưh đei pơjing hơnăn tơmam, pơjing um rup păng pơjing tơdrong pơma xa ‘lơ̆ng hơiă tơ̆ Tơrong chă tơmang lăng Măng Đen ‘nŏh truh âu kơnh, bơ̆n hơnat vă gơ̆h hơmet pơ ‘lơ̆ng 1,2 tơdrong hơiă nhen hlôi đei lơ tơring”.

Vă tơgop ăn tơdrong jang tŏk truh 2 kơsô̆ kơ dêh char Kon Tum lơ̆m sơnăm 2025, Tơring chă tơmang lăng Măng Đen oei pơjing lơ tơdrong ‘lơ̆ng vă sơng tơmoi truh. Găh tơdrong vei lăng teh đak, rim khul kơdră pơgơ̆r tơring adrin jang ‘lơ̆ng tơdrong vei lăng, chĕng hơmet teh; iŏk yoa dôm tơdrong tơgŭm vă akŏm ‘lơ̆ng jên, tơmam tơmât jang man anih jang, pơm trong, hơmet tơmam pơyoa ăn tơdrong jang tŏk…

Hăm 139 anih pơvih găh tep pơdơ̆h tơ̆ tơring athei hơtŏk tơdrong ‘lơ̆ng păng jŏh ayŏ kơ dŏ xoang pơvih ăn tơmoi chă tơmang lăng. Ƀok Nguyễn Văn Tuấn, Kơdră chĕp kơ̆l Golden Boutique Hotel Măng Đen, ăn tơbăt: “Kơjă kăp gĭt hlŏh vă gơ̆t jơ̆ng tơmoi truh, vă tơmoi năm hơlơ̆k dơ̆ng tơ̆ Măng Đen ‘nŏh jĭ đĭ đăng bơngai jang athei bơ̆ jang hăm plei nuih, năng tơmoi nhen thoi kơtum kơtŏng ‘nhŏng oh păng bơngai lơ̆m hnam vă vei lăng, pơvih ‘lơ̆ng hlŏh. Nhôn ling lang đei đon tơchĕng păng tơtăm rim năr, hơnơ̆ng tơplih ‘nao vă pơjing um ai ‘nao. Hăm tơdrong gơ̆h jang nhôn hơnơ̆ng pơtho pơhrăm pơm hơtŏk tơdrong jang vă pơvih pơvăn, bơ̆ jang roi rơgei ‘lơ̆ng ƀiơ̆”.

Vă tơmoi chă tơmang lăng truh hăm Măng Đen ưh lăp tŏk lơ lơ̆m dôm năr pơdơ̆h, năr lêh têt đĕch mă đei hơnơ̆ng rim khei lơ̆m sơnăm, trong jang pơjing lơ tơmam chă tơmang lăng tŏk bŏk đei dêh char Kon Tum păng Khul jang chă tơmang lăng Măng Đen oei bơ̆ jang tôch pơnĕh. Kŭm hăm “7 dơnâu 3 chơkơi”, dôm Anih jang mŭk drăm kơmăng, Pơgar joh hơri hơxoang Măng Đen, anih chă tơmang lăng tơpôl Vi Rơ Ngheo, Kon Vơng Kia, tour chă tơmang lăng truh hăm tơdrong jŏh ayŏ kơ dŏ xoang, mât ngôi tơ̆ bri brăh... ‘nao đei pơjing roi pơm pơ ‘lơ̆ng hlŏh dơ̆ng tơdrong chă tơmang lăng tơgŭm ăn Măng Đen sơng păng gơ̆t đei jơ̆ng tơmoi truh.

Yă Bạch Thị Mân, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Kon Tum, pơma hơdăh, hăm đon pơhnŏng kŭm hăm dôm tơdrong ‘lơ̆ng hlôi đei, Măng Đen gô tơgop gĭt kăl ăn tơdrong vă jang tŏk truh 10% đơ̆ng dêh char lơ̆m sơnăm 2025: “Măng Đen akŏm đei tôm tơdrong ‘lơ̆ng. Nhôn oei tơlĕch jơhngâm pơjing dôm tơmam chă tơmang lăng ‘lơ̆ng, tơmang lăng găh jŏh ayŏ kơ dŏ xoang, tơmang lăng găh jơhnơr arih, tơmang lăng găh tơdrong et soi, tơmang lăng găh tơplŏng kơdâu… Đơ̆ng dôm tơdrong pran ‘lơ̆ng găm tơmam drăm, cham char bri brăh păng tơdrong juăt ‘lơ̆ng đơ̆ng kon pơlei, dôm anih vei lăng teh đak đei tơdrong jang hơdoi hăm anih jang xa, tĕch mơdro vang bơ̆ jang kiơ̆ dôm tơdrong hlôi đei tơlĕch”.

Chă tơmang lăng đei dêh char Kon Tum chih hơdăh jĭ tơdrong jang tơm gĭt kăl vă tưk tơiung tĕch mơdro-pơvih pơvăn tŏk dang 13% lơ̆m sơnăm 2025. Hăm tơdrong ‘lơ̆ng hlôi đei păng trong jang tŏk đunh đai tôch lăp, Anih chă tơmang lăng Măng Đen, apŭng Kon Plông kŭm hăm dôm apŭng, plt nai kơ dêh char Kon Tum oei akŏm jơhngâm khŏm sơng iŏk đei 3 triu ‘nu tơmoi chă tơmang lăng vă tơgop ăn tơdrong jang tŏk truh 10% đơ̆ng dêh char lơ̆m sơnăm ‘nâu. Rim tơmoi chă tơmang lăng truh hăm Măng Đen ưh lăp lăng ngôi cham char bri brăh ‘lơ̆ng rŏ đĕch mă vang tơgop ăn tơdrong jang tŏk mŭk drăm, tơpôl tơ̆ tơring hai./.