Yă Võ Thị Bạch Nga, tơngla 1 anih tĕch tơmam tơ̆ phường Tân Lập, dêh char Đắk Lắk tơroi, hơnơ̆ng ƀât Tết Nguyên đán rim sơnăm, anih tĕch mơdro kơchăng ‘măn răk tơmam tôch lơ, đei tôm tơmam kăl vă tĕch ƀât têt nhen ƀĕng keo, ƀier, hơlăk, đak ‘ngam, phe, đak kho, đak măm, ƀôt ngok… Vă đei jên răt akŏm tơmam, yă tŏk iŏk đơ̆ng tơdrong jang vei sơđơ̆ng yă tĕch yoa teh đak tơlĕch, hăm jên đei tŏk iŏk dang 2 ti hlak jên.

“Tơdrong hơgăt, ‘mĕh vă đơ̆ng inh dang 2 ti, inh iŏk jên ‘nâu vă răt hơmet tơm adrol kơ Têt vă gơh đei măh mai tơmam tĕch mơdro sơđơ̆ng ‘lơ̆ng. Inh hơpơi ‘mĕh jên kon oei vei kơjăp dang hlŏh 6.0 nhen rim sơnăm, păng đei tơgŭm vei sơđơ̆ng ‘lơ̆ng thoi noh gơ̆h hiôk hian ăn anih tĕch mơdro păng bơngai răt tơmam. Mưh đei jên đơ̆ng tŏk iŏk vei sơđơ̆ng yă tĕch, hăm jên kon tŏ sĕt ‘nŏh anih tĕch mơdro ưh đei hơtŏk yă hlŏh tơdrong, đơ̆ng noh bơngai răt tơmam kŭm đei xa yoa lơ ƀiơ̆.”

Ƀok Bùi Quang Hoà, Kơdră chĕp kơ̆l siêu thị Co.opmart Buôn Ma Thuột tơroi, ƀât Tết Bính Ngọ sơnăm ‘nâu, tơdrong ‘mĕh vă răt yoa tơmam kăl găh 5 grŭp tơm đei ‘nhot, ƀum, plei ‘long, tơmam xa, phe, sĭk păng ƀoh đei tơdra tŏk dang 6% tơ̆ siêu thị. Vă đei măh mai tơmam, anih nhôn hlôi kơchăng bơ̆ jang hăm dôm anih tĕch tơmam, athei hơmet tôm tơmam, tơmam athei rơgoh ‘lơ̆ng, chih hơdăh khei ‘năr gơ̆h yoa, atŭm hăm ‘nŏh ưh gơ̆h hơtŏk yă tĕch glăi hăm tơdrong hơgăt.

“Bơ̆ jang hăm anih vei lăng jang kơmăy, tĕch mơdro dêh char Đắk Lắk, nhôn pơkăp tĕch kiơ̆ yă đei tơlĕch, pơklĕm mă rơđăh tơ̆ siêu thị, khei ‘năr pơm kiơ̆ lơ̆m 3 khei đơ̆ng ‘năr 15/12/2025 – 15/3/2026. Vă pơm kiơ̆ nơ̆r pơkăp âu, nhôn bơ̆ jang hăm dôm anih tĕch tơmam păng đe sư kŭm kĭ pơkăp ‘năi, lơ̆m khei ‘năr adrol, lơ̆m păng đơ̆ng rŏng kơ Têt tĕch tơmam ưh đei hơtŏk yă ngăl.”

Tơlĕch jang tơdrong jang vei sơđơng yă tech adrol, lơ̆m păng đơ̆ng rŏng kơ Têt Bính Ngọ 2026 kiơ nơ̆r pơtho đơ̆ng Khul kơdră teh đak, tơ̆ dêh char Đắk Lắk đei 16 anih asong tŏk iŏk jên vang jang. Ƀok Trần Minh Hoàng, Phŏ Kơdră Anih mong jên tĕch mơdro, tơmât jên jang păng atŏk tơiung dêh char Đắk Lắk (BIDV) ăn tơbăt, vang jang lơ̆m tơdrong ‘nâu, anih mong jên oei tơlĕch lơ trong asong tŏk iŏk hăm jên kon tŏ sĕt vă tơgŭm ăn dôm khul grŭp, rim bơngai pơdro dôm tơmam kăl pơyoa ăn anih tĕch mơdro ƀât Têt. Trong asong tŏk iok jên đei tơlĕch kiơ̆ tơdrong ‘mĕh vă, đei trong tŏk iŏk lăp ‘lơ̆ng, pơm hla ar hrĕnh, jên kon tŏ sĕt păng sơđơ̆ng, kiơ̆ đơ̆ng noh pơjing tơdrong hiôk hian vă anih tech mơdro, unh hnam tech mơdro păng bơngai pơdro gơ̆h tŏk iŏk, păng iŏk yoa jên ‘nâu đei yoa hlŏh kơplăh âu.

“Kiơ̆ trong jang đơ̆ng Anih mong jên tĕch mơdro, tơmât jên jang păng atŏk tơiung Việt Nam (BIDV), nhôn hơnơ̆ng pơ ‘nhŏ jên vă asong tŏk iŏk jang xa, tĕch mơdro, mă loi hăm tơdrong pơm tơlech, tĕch mơdro tơmam. Hăm dôm tơdrong ‘nâu, anih mong jên tơlĕch lơ jên tŏk iŏk, hăm jên kon tŏ sĕt hlŏh lơ̆m rim tơdrong asong tŏk iŏk jên. Mưh dôm anih jang, unh hnam tĕch mơdro păng bơngai pơdro ‘mĕh tŏk iŏk, nhôn hơnơ̆ng tơlĕch trong asong tŏk iŏk vă tơgŭm ăn đe jang xa.”

Kiơ̆ kơsô̆ chih jô̆ đơ̆ng Anih vei lăng jang kơmăy, tĕch mơdro dêh char Đắk Lắk, tơdrong ‘mĕh vă răt yoa tơmam jô̆ păh lăp rim khei tơ̆ dêh char dang 3.400 ti hlak jên. 1 khei adrol kơ Tết Nguyên đán Bính Ngọ 2026, tơdrong ‘mĕh răt tơmam tŏk dang 30%, hơtŏ hăm hlŏh 1.000 ti, akŏm lơ̆m dôm tơmam yoa kăl nhen: ‘nhot, ƀum, plei ‘long, tơmam xa, phe, sĭk, ƀoh, hơbăn ao, chơkhŏ, ƀier, hơlăk, đak ‘ngam…

Ƀok Nguyễn Hải Triều, Phŏ Kơdră Anih vei lăng jang kơmăy, tĕch mơdro dêh char Đắk Lắk tơroi, vă đei măh mai tơmam tĕch, yă tech lăp ‘lơ̆ng ƀât Têt, Anih vei lăng pơtho ăn khul jang vei lăng tech mơdro păng dôm anih jang ƀơm truh hơtŏk tơdrong dăr lăng anih pơtruh tơmam, atŭm hăm ‘nŏh roi tơƀôh ăn Anih vei lăng kon pơlei dêh char pơtho ăn dôm anih mong jên tĕch mơdro ‘măn hơmet jên asong tŏk iŏk hăm jên kon tŏ sĕt vă vei sơđơ̆ng yă tĕch tơmam.

“Lơ̆m tơdrong vei lăng ‘lơ̆ng, măh mai tơmam păng tĕch hăm yă sơđơ̆ng tơ̆ dêh char, Anih vei lăng kon pơlei dêh char Đắk Lắk đei hla ar chih pơtho ăn 13 anih tĕch mơdro đei rim siêu thị, anih tĕch mơdro tih, anih tĕch le nhen: Co.opmart, GO!, Bách Hóa Xanh, VinMart…, kŭm hăm 1,2 anih tĕch mơdro tơmam yoa kăl vang jang tơdrong ‘nâu. Găh noh dơ̆ng, Anih vei lăng asong ăn lơ anih jang, khul grŭp pơgơ̆r kơchơ tơ̆ Buôn Ma Thuột păng tơring jŭm dăr vă kon pơlei răt hơmet tơmam Têt.”

Tơ̆ hơnăp tơdrong răt tơmam roi tŏk ƀât Têt, mă lei hăm đon kơchăng đơ̆ng mong akŏm lơ tơmam, asong tŏk iŏk jên vă jang xa truh vei lăng anih tĕch mơdro, tơdrong tech mơdro, răt yoa tơmam Têt tơ̆ Đắk Lắk năng atŭm sơđơ̆ng ‘lơ̆ng. Tơmam jrăh jrai, yă tĕch đei vei kơjăp tơgŭm ăn kon pơlei hơđơ̆ng jơhngâm năm răt tơmam. Mĭnh pơyan Têt đei tôm tơmam, hiôk hian oei vă truh hăm mih ma duch nă tơ̆ dêh char Đắk Lắk./.