6 khei blŭng sơnăm, akŏm tơmam kơ Đắk Nông iŏk đei vă jê̆ 9.600 ti hlak jên, tŏk hloh 5%, dơ̆ng mă 2 tơring Tây Nguyên. Thu mong jên jang ăn teh đak đei vă jê̆ 1.500 ti hlak jên. Lơ̆m akŏp kơsô̆ 3.200 ti hlak jên tơmơ̆t jên jang teh đak sơnăm 2024, truh đĭ khei 6, dêh char mă tơlĕch đei dang 27%. Mă loi ‘noh jĭ jên 3 tơdrong jang tơm teh đak lơ̆m dêh char hrei ‘nâu klăh song păng tơlĕch oei hiơ̆. Jơnŭm pơgơ̆r kon pơlei  dêh char Đắk Nông hơlen lăng, đei lơ tơdrong oei đei, ưh kơ ‘lơ̆ng lơ̆m hơtŏk tơiung mŭk drăm - tơpôl kơ dêh char.

Lơ̆m noh, dôm tơdrong tơhlăk tơhlĭn, hơdrom băl chĕng hơmet teh tơmam, mă loi ‘noh jĭ bô xít tŏk bŏk ƀơm ưh kơ ‘lơ̆ng truh tơdrong jang kiơ̆ dôm hơnăp jang mŭk drăm kơ tơring. Dêh char Đắk Nông chih jô̆ đei truh hloh 1.000 tơdrong jang lơ̆m hơgăt teh să 6.700hek tar đei hơdrom băl hăm chĕng hơmet teh bô xít. Dêh char hlôi lơ ‘măng apĭnh truh Trung ương mă lei truh dang ei oei tam mă đei hơmet pơ ‘lơ̆ng.