Hlŏh 1 giĕng đơ̆ng rŏng kơ gre container tâm mât tơ̆ hnam kon pơlei pơm ăn 3 ‘nu bơngai lôch, kon pơlei arih xa tơter trong Hồ Chí Minh ƀât kơchơ 312, xăh Đắk R’la, apŭng Đắk Mil, dêh char Đắk Nông, oei tơtuei tôch hli đĕch. Yă Phạm Thị Ngọc Lan – 1 ‘nu bơngai arih tơ̆ tơring âu tơroi, jăl trong tôch ‘lơ̆ng âu pơm ăn lơ bơngai huơ̆r gre ưh kơchăng, kơdâu tôch hrĕnh. Yoa thoi noh mă lơ̆m dôm sơnăm âu ki, tơ̆ âu đĭ đei 8 ‘nu bơngai lôch, 6 ‘nu bơngai rơka yoa đơ̆ng gre tâm, preh băl: “Inh tĕch mơdro tơ̆ kơchơ âu đunh sơnăm bơih, ƀôh ƀât dâu hơnơ̆ng đei gre tâm preh băl tôch hơmơt. Dang ei inh hơpơi ‘mĕh khul linh kanh sat vei lăng trong gre hơtŏk tơdrong dăr joang tơ̆ jăl trong tôch hơmơt âu; anih jang kơpal athei jăh tơlĕch đei trong găn ƀiơ̆ gre kơdâu hrĕnh, chô̆ camera phak đơ̆ng rŏng, vă gơ̆h vei sơđơ̆ng ăn kon pơlei oei tĕch mơdro, arih xa tơter trong gre ‘nâu.”

Ƀok Lê Văn Hoàng – Kơdră vei lăng kon pơlei apŭng Đắk Mil, dêh char Đắk Nông, tơroi, trong Hồ Chí Minh kơdâu klĕch apŭng đei 2 “anih đa đei gre tâm preh băl” ‘nŏh jĭ jăl trong kơdâu klĕch xăh Thuận An păng tơring kơchơ 312 xăh Đắk R’la. Ƀar anih âu đei lơ ‘măng gre lăk, tâm preh băl tôch dêh, pơm ăn lơ bơngai lôch rơka păng gre hư pơchăh, hiong răm lơ găh mŭk drăm. Găh tơdrong vă hơmet ming dôm Anih đa đei gre tâm preh băl âu, ƀok Lê Văn Hoàng akhan, hơtŏk tơdrong roi tơbăt, pơtho đon ăn dôm bơngai hao gre kơdâu tơ̆ trong ‘nŏh tam mă tôm ‘mơ̆i, mă athei hơmet pơ ‘lơ̆ng ming trong ƀât dôm anih âu dơ̆ng:

“Apŭng hlôi hơtŏk tơdrong roi tơbăt, pơtho đon ăn kon pơlei pơm kiơ̆ mă ‘lơ̆ng, mă loi hăm bơngai huơ̆r gre athei hao gre kơdâu lơlăp păng pơm kiơ̆ dôm tơdrong hơgăt đei ƀơm truh tơdrong vei sơđơ̆ng tơ̆ trong nơnăm. Khul jang kơpal athei hơtŏk tơdrong dăr joang, tơtom chă ƀôh dôm tơdrong pơm glăi, sek tơlang tơpăt kiơ̆ tơdrong hơgăt. Vă găn tôch tơdrong ‘nâu, athei tơlĕch dơ̆ng jên pơm hơmet trong. Pơtih gia nhen pơih xă trong ƀât dôm anih krê hơmơt, pơm chơnĕng hơlam trong, athei bơ̆ jang hrơ̆ch ‘lơ̆ng lơ trong jang.”  

Dêh char Đắk Nông đei 3 tŏ trong gre teh đak kơdâu klĕch ‘nŏh Trong 14, 14C, 28. Anih jang kơpal tơ̆ tơring chih hơdăh tơ̆ dôm trong tơm âu păng 1,2 trong dêh char oei đei 18 “anih đa đei gre tâm preh băl”. Lơ̆m 1 puăt blŭng sơnăm ‘nâu, tơ̆ Đắk Nông đei 57 ‘măng gre tâm preh băl, pơm ăn 43 ‘nu bơngai lôch, 53 ‘nu bơngai rơka. Pơtêng hăm khei âu sơnăm sơ̆, gre tâm preh băl jur 12 tơdrong, jur 2 ‘nu bơngai lôch, mă lei tŏk 18 ‘nu bơngai rơka. Thượng tá Văn Ngọc Lập, Phŏ Kơdră Kanh sat vei lăng tơ̆ trong nơnăm Công an dêh char Đắk Nông ăn tơbăt, gre tâm preh băl jur mă lei dôm ‘măng gre tâm preh băl dêh roi tŏk, mă lơ ‘nŏh đei tơ̆ dôm “anih đa đei gre tâm preh băl ngăl”.

Vă găn ƀiơ̆ gre tâm preh băl, khul linh kanh sat vei lăng tơ̆ trong nơnăm hơtŏk tơdrong dăr joang, sek tơlang tơpăt dôm tơdrong pơm glăi: “Tơ̆ hơnăp kơnh, Anih kanh sat vei lăng tơ̆ trong nơnăm hơnơ̆ng bơ̆jang dăr joang prăt măng, prăt năr, păng bơ̆ jang kiơ̆ tơdrong chă pơtŏ hơyuh tơdrô hăm dôm bơngai huơ̆r gre chơ tơmoi, gre container, gre tih… tơ̆ jơ̆p trong, mă loi jĭ ƀât dôm trong gre đa đei gre tâm preh băl. Hơdai hăm ‘nŏh, jang hơdoi hăm công an xăh, khul dăr hơlen tơ̆ trong gre, roi tơbăt vă kon pơlei tơ̆ tơring đei kơchơ jê̆ trong hơtŏk đon pơm kiơ̆ luơ̆t vei lăng sơđơ̆ng tơ̆ trong nơnăm, găn ƀiơ̆ gre tâm preh băl.”  

Vă hơmet pơ ‘lơ̆ng dôm “Anih đa đei gre tâm preh băl” tơ̆ dôm jăl trong gre teh đak, trong gre dêh char, Anih vei lăng sơđơ̆ng tơ̆ trong gre dêh char Đắk Nông athei dôm khul jang kơpal vang jang hơdoi hăm dôm tơring hơtŏk tơdrong roi tơbăt, pơtho đon pơm kiơ̆ Luơ̆t vei sơđơ̆ng tơ̆ trong teh, bơ̆ jang hrơ̆ch ‘lơ̆ng dôm trong jang, sek tơlang tơpăt dôm bơngai pơm glăi luơ̆t mưh hao gre kơdâu tơ̆ trong. Atŭm hăm ‘nŏh, hơnơ̆ng dăr joang, hơlen năng, roi tơƀôh ăn Anih vei lăng kon pơlei dêh char Đắk Nông, anih vei lăng dôm jăl trong gre BOT tơmât dơ̆ng jên pơm hơmet trong, hơmet pơ ‘lơ̆ng dôm anih “đa đei gre tâm preh băl” tơ̆ dôm jăl trong, mă loi jĭ tơ̆ trong gre 14 (trong Hồ Chí Minh) păng Trong gre 28./.