Đunh kơ âu 1 khei, yă Phạm Thị Lệ, tơ̆ xăh Lương Phi, apŭng Tri Tôn, dêh char An Giang năm truh tơ̆ Anih iŏk pơm păng pơdreo hla ar kơ apŭng vă pơm hla ar tĕh. Kiơ̆ tơdrong hơgăt, đơ̆ng rŏng 1 khei ‘nŏh pơm đang hla ar. Mă lei đơ̆ng rŏng 20 năr, yă đĭ iŏk đei tin nhắn hla ar pơm đang bơih: “Pơtŏ tĕh đang bơih, iŏk hla ar pơkă âu. Năm tơ̆ ô kơsô̆ 2, đang kơ ‘nŏh ô kơsô̆ 5, đe ăn ba iŏk hla ar. Đe pơtho tơƀôh năm tơ̆ kơsô̆ 5 vă kla jên pơm, đang kơ ‘nŏh năm tơ̆ kơsô̆ 2 dơ̆ng. Đe duch pơm, pơtho tơƀôh ăn ba tôch hrĕnh.”

Kon pơlei năm pơm hla ar tơ̆ anih pơma hla ar apŭng Tri Tôn lăp kăl iŏk kơsô̆ pơrĕng kiơ̆ rim tơdrong đei hơmet ‘lơ̆ng hơdrol, đơ̆ng rŏng kơ ‘nŏh hôp hô sơ tơ̆ anih pơm, iŏk hla ar pơkă păng truh năr ‘nŏh kơmăy nhắn tin gơih ăn kon pơlei năm iŏk hla ar. Tơ̆ âu oei đei hloi kơmăy hơlen năng, châm điêm kăn ƀô̆ vă kon pơlei roi tơbăt jơhngâm đon bơ̆ jang đơ̆ng bơngai jang ăn tĕh đak. Kon pơlei kŭm gơ̆h nôp kơdih hô sơ hăm kơmăy điên tư ‘năi.

Ƀok Đỗ Minh Trí, Phŏ Kơdră vei lăng kon pơlei apŭng Tri Tôn ăn tơbăt: “Bơngai jang tơ̆ anih pơm hla ar 1 ƀôt bơ̆ jang tôch tơnăp hăm kon pơlei, hăm jơhngâm đon pơvih pơvăn ‘lơ̆ng ăn kon pơlei, đơ̆ng nŏh tơdrong jang pơm hla ar tơ̆ 1 anih đei chô̆ hăm kơmăy tơ̆ xăh, tơ̆ apŭng tôch hiôk hian, ưh đei tơhlăk, pơmat tat kiơ. Hrei ‘nâu apŭng, jô̆ hloi tơ̆ xăh pơm hla ar kiơ̆ 5 kơtă. Hăm kon pơlei Tri Tôn rơđăh rơđong ưh đei ôn tơdrong kiơ mưh pơm hla ar, kon pơlei vă pơm hla ar kiơ. Tơdăh kon pơlei roi tơƀôh kăn ƀô̆ yơ pơm pơmat tat ‘nŏh kơtĭt chơ chih nơ̆r hil ƀât kơmăy ming lơ̆m anih pơm hla ar 1 ƀôt.”

Oei tơ̆ Anih pơvih pơm hla ar vei lăng tĕh đak kơ dêh char Dak Lak, anih iŏk pơm păng pơdreu hla ar pơm đang kơ 20 anih jang, lơ̆m nŏh đei 2 anih jang đơ̆ng kơpal Trung ương jur ‘nŏh jĭ Công an dêh char păng Ƀao hiêm tơpôl dêh char; đĭ đăng hla ar đei iŏk pơm, pơdreu tơ̆ Anih âu pơm hăm kơmăy điên tư kơ dêh char păng kơmăy phần mềm đơ̆ng anih juăt jang ngăl. ‘Nhŏng Lương Trung Thành tơ̆ apŭng Ea Hleo tơroi: lăp hiong dang 5 pơnĭt hăm dôm hơyak pơm tôch ƀônh, ‘nhŏng pơm đang rim hla ar kăl vă apinh tơplih ming ƀăng huơ̆r gre păng răp gô iŏk kiơ̆ trong bưu điê̆n: “Sơ̆ rim ‘măng chă pơm hla ar ‘nŏh năm hơ lơ̆k hơle lơ vât, mă lei dang ei năm pơm ưh kơ đunh đang bơih. Ƀôh hrĕnh păng tôch hiôk ăn kon pơlei.”

Vă hơtŏk tơdrong ‘lơ̆ng đơ̆ng pơm Hla ar vei lăng, hrei ‘nâu, dôm anih jang đei trong iŏk pơm păng pơdreu hla ar tơ̆ Anih pơvih pơm hla ar vei lăng tĕh đak kơ dêh char Dak Lak oei hơtŏk hrĕnh tơdrong pơm hla ar kiơ̆ jơhngâm đon “ưh lê̆ gô đunh” hăm dôm kơloăi hla ar pơm ƀônh, tŏ sĕt năr, tơdrong pơm hla ar ưh đei ƀơm truh dôm anih jang nai.

Pơma găh tơdrong đei yoa đơ̆ng trong pơm hla ar tơ̆ 1 anih, pơm hăm kơmăy điên tư, PGS, TS Ngô Thành Can, sơ̆ pơm Phŏ khoa jang hanh chĭnh, Hnam hŏk Hành chính Quốc gia akhan, tơdrong tơlĕch jang, pơjing anih pơm hla ar 1 ƀôt, đei chô̆ hơmet tôm kơmăy hăm băl vang tơgop găn ƀiơ̆ tơdrong pơm hla ar pơmat tat, hơdrom băl. Khul jang pơm hla ar pơma atŭm, khul pơvih pơvăn pơma adrô̆ đei kăt tơjur pă tŏ sĕt. Păng tơdrong kăl hlŏh jĭ hơnhăk tơdrong lăp đon ăn kon pơlei: “Tơmât hơdoi pơm hla ar hmă păng pơm hăm điên tư vă pơjing tơdrong hiôk hian ăn rim bơngai, khul grŭp, pơm tơjur ƀiơ̆ jơnăr pơm hla ar vei lăng. ‘Ngoăih kơ pơm ƀônh, tŏ sĕt khei ‘năr ‘nŏh gơ̆h ‘mơ ‘met hai yoa bơ̆n tơjur đei lơ khul jang tơ̆ anih pơm hla ar 1 ƀôt, tơjur ƀiơ̆ jên pơm, jơnăr gô chang, pơm păng ‘mơ ‘met đei lơ tơdrong nai hai. Hơnhăk ba đon lui ăn kon pơlei.”

Dang ei đĭ đăng tơring kŭm tơlĕch trong bơ̆ jang kiơ̆ tơdrong jang “Tơplih ‘nao tơdrong bơ̆ jang tơ̆ “mĭnh anih”, “chô̆ tơmât hơdai kơmăy pơm hla ar tơ̆ 1 anih” mưh pơm hla ar vei lăng”, hăm đon pơhnŏng truh sơnăm 2025, chih đang kơsô̆ hô sơ, hla ar đei pơm tơ̆ đĭ đăng anih pơm hla ar “mĭnh ƀôt” kơ dôm anih jang kơpal păng dôm anih jang hanh chĭ tơ̆ apŭng, xăh.