
Bơ̆ jang kiơ̆ đon pơhnŏng đơ̆ng Anih tơm Chinh trĭ, khei 3-1975, tơdrong iung tơblăh đơ̆ng khul linh păng kon pơlei bơ̆n lơ̆m Pơyan Puih mak sơnăm 1975 pơtơm pơgơ̆r păng iŏk đei jơnei hơnơ̆ng. 3 tơdrong tơblăh gĭt kăl ‘nŏh: Tơblăh Tây Nguyên pơih blŭng hăm tơdrong tơblăh iŏk rơngei Buôn Ma Thuột, tơdrong iŏk rơngei Tây Nguyên; Tơblăh iŏk rơngei Huế - Đà Nẵng păng tơdrong tơblăh Hồ Chí Minh iŏk rơngei Sài Gòn - Gia Định.
Dôm năr hơtuch kơ tơdrong tơblăh, mă đơ̆ng khul linh hơyăt đei tơblăh kơdâu dih dih bơih ră, mă lei lu sư oei chă trong ôn vă tơblăh găn trong khul linh bơ̆n. ‘Năr 26-4-1975, đơ̆ng rŏng 1 khei ‘năr iung tơblăh tôch hrĕnh, vang tơblăh hai, yak drŭt hai, iŏk tơmât thim khul linh hai, 5 binh đoàn tơm kơ Khul linh tơblăh iŏk rơngei klăih song pơm 5 trong 1 ‘măng vang tơblăh mât lơ̆m plt Sài Gòn - Gia Định.

Truh 11 jơ 30 pơnĭt ‘năr 30/4/1975, Kơdră tơm Dương Văn Minh păng đĭ đăng Khul kơdră chĕp kơ̆l Việt Nam Cộng hòa athei kŭp kơ̆l yơ̆r ty đĭ. Tơdrong tơblăh Hồ Chí Minh iŏk đei jơnei đĭ đăng.
Tơdrong tơblăh jơnei tih pơyan Puih mak 1975 chih tơbăt 1 khei ‘năr tôch gĭt kăl, hơnhăk hơdrĕch hơdrung bơ̆n yak mât lơ̆m chăl “Rơngei hiôk hian, pơjing đei mĭnh teh đak kơjăp ‘lơ̆ng, chĕp kơ̆l pơgơ̆r kiơ̆ trong xã hội chủ nghĩa”, atŭm hăm ‘nŏh pơlung jơhngâm ăn rim khul iung tơblăh iŏk rơngei hơdrĕch hơdrung păng tơblăh yoa tơdrong rơngei hiôk hian, gơ̆h hơgei kơ apŭng plenh teh.
Đại tướng Phan Văn Giang, Kơdră jang lơ̆m Anih tơm Chinh trĭ, Phó Bí thư Quân ủy Trung ương, Kơdră tơm vei lăng khul linh teh đak bơ̆n pơma hơdăh: “Ƀlep ƀât 11 jơ 30 pơnĭt ‘năr 30/4/1975, Tơdrong tơblăh Hồ Chí Minh iŏk jơnei đĭ đăng, pơtôch tơdrong iung tơblăh Mi, dŏng teh đak. ‘Nŏh jĭ tơdrong jơnei tôch gĭt kăl ăn jăl trong iung tơblăh tôch pơmat tat, pơlong nol hăm lơ tơdrong lôch tang, hiong răm tôch tih đơ̆ng khul linh păng kon pơlei bơ̆n. Tơblăh jơnei tih Pơyan puih mak 1975 jĭ 1 tơdrong tơƀôh hơdăh trong jang kăch mang tôch kơ chăng, gơ̆h hơgei, trong chĕp kơ̆l pơgơ̆r tôch trŏ đơ̆ng Đảng; jĭ tơdrong jơnei đơ̆ng jơhngâm pran mưh iung tơblăh đơ̆ng kon pơlei, tơƀôh hơdăh tơdrong ‘lơ̆ng đơ̆ng jơhngâm đon ‘mêm kơ teh đak hơdai hăm đon adrin pơjing đei 1 teh đak kơjăp ‘lơ̆ng păng hơpơi ‘mĕh arih xa rơngei hiôk hian, đơ̆ng tơdrong tơguăt đĭ đăng hơdrĕch hơdrung, tơmât hơdai hăm jơhngâm pran chăl ‘nao.”
Đơ̆ng rŏng hlŏh 50 sơnăm, jơ̆p lơ̆m teh đak oei hơnơ̆ng tưk tơiung tơdrong jơnei păng ƀai hok kăp gĭt đơ̆ng Tơblăh jơnei tih Pơyan Puih mak 1975, yak mât lơ̆m chăl ‘nao, jang tŏk hơnŭk hơnoa, pran kơtang, “Kon pơlei pơdrŏng, teh đak pran, kon pơlei pơm tơm, hơtŏ băl, gơ̆h hơgei”./.
Viết bình luận