Vă Tết Nguyên đán Giáp Thìn 2024 “Rim hnam, rim bơngai đei Tết ngăl”, dêh char Kon Tum ‘măn lơ tơdrong pơngơ̆t, chă hơmet têt ăn dôm unh hnam bơngai đei kŏng hăm kăch mang, bơngai kră, unh hnam tơnuh, unh hnam vă jê̆ tơnuh, bơngai jang đei tơdrong arih xa pơmat tat dêh hloh, dôm bơngai ưh pŭn ai lơ̆m tơpôl...Lơ̆m noh dêh char tơchơ̆t tơlĕch hlŏh 8 ti hlak jên tơgŭm hlŏh 16.780 unh hnam tơnuh, vă jê̆ tơnuh ngôi pơchơt pơyan puih mak, sơng xa têt, hăm jên tơgŭm ăn 1 unh hnam tơnuh 600.000 hlak, 1 unh hnam vă jê̆ tơnuh 300.000 hlak. Kŭm hăm ‘nŏh Anih MTTQ Việt Nam păng dôm khul grŭp tơ̆ jơ̆p tơring kŭm mong akŏm truh rơbâu tơpu tơmam vă hơmet têt ăn kon pơlei.

‘Nhŏng A Định, Bí thư Chi ƀô̆ pơm hloi Ƀok pơgơ̆r plei Đăk Bung, xăh Đăk Rơ Nga, apŭng Đăk Tô, tơroi: Chi ƀô̆ plei Đăk Bung đei 14 ‘nu đảng viên, vă têt gơ̆h truh hăm rim bơngai, rim hnam, đe đảng viên lơ̆m Chi ƀô̆ đei pơjao hơlen năng rim unh hnam, lăng năng tơdrong arih xa kơ 161 unh hnam hăm 885 ‘nu bơngai lơ̆m pơlei vă hơmet têt ăn rim unh hnam: “Adrol kơ Tết, nhôn pơgơ̆r hơlen năng rim unh hnam tơnuh păng dôm unh hnam pơmat tat vă chă tơgŭm ăn kon pơlei đei 1 pơyan têt phĭ tơnŏ, hiôk chơt, bu bu kŭm đei têt ngăl. Nhôn ƀôh tơdrong vei lăng bri tôch đei yoa ăn kon pơlei, yoa đe mih ma duch nă đei xa yoa dôm tơdrong tơgŭm đơ̆ng vei lăng bri, kon pơlei đei dơ̆ng tơdrong chơt hơiă vă xa Tết. Rim sơnăm, Công ty jang ‘long Đăk Tô jang hơdoi hăm pơlei chă hơlen năng dôm unh hnam tơnuh, pơmat tat vă chih măt tơgŭm phe păng dôm tơmam yoa kăl ăn kon pơlei, Công ty tôch pơngơ̆t ăn kon pơlei ƀât lêh têt, sơnăm yơ kŭm hơpăh tơmam ăn kon pơlei”.

Vă jê̆ 230 ŭnh hnam bơngai Bana tơ̆ plei Dơk Rơng – plei tơring tơrang ‘nao tơ̆ xăh G’lar, apŭng Đak Đoa, dêh char Gia Lai sơng pơyan puih mak ‘nao 2024 ƀĕnh tơdrong hiôk chơt ƀơ̆t jang sa đei iŏk yua lơ, kơjă tơmam đơ̆ng choh jang sa tŏk lơ, mă loi ‘noh jĭ cheh phe. Đĭ đăng ŭnh hnam kon pơlei lơ̆m pơlei tă kơ đei pơgar cheh phe, tiu, gui yuăn ngăl...ŭnh hnam tŏ sĕt kŭm 2,3 sào, ŭnh hnam lơ ‘noh 4-5 hek tar... Sơnăm âu ki, vă jê̆ 20 ŭnh hnam kon pơlei đei iŏk yua hloh 1 ti hlak jên đơ̆ng ‘long cheh phe păng lăp jô̆ đơ̆ng phĕ đang cheh phe, kon pơlei lơ̆m pơlei hlôi răt ‘nao hloh 50 tong gre hon đa măk jên.

Yak mơ̆t lơ̆m sơnăm ‘nao, kon pơlei Dơk Rơng lui ngeh jang sa hơnơ̆ng ăn iŏk yua lơ. Ƀok Vut kră pơlei, pơma: “Sơnăm truh kơnh, kon pơlei gô hơdrin tơplih đon tơchĕng găh trong jang, vei lăng ‘long pơtăm, athei pơnam kơ săy phŏng mă ‘lơ̆ng vă cheh phe roi đei plei lơ. Kon pơlei tôch kơ chhôk ‘nă, ƀơ̆t iŏk đei tơroi, dang ei đĭ đei hơdrĕch phe ‘nao plei lơ hloh, hơdrol sơ̆ ‘meh cheh phe TR4 kon pơlei chhôk ‘nă bơih, dang ei đei dơ̆ng hơdrĕch ‘nao ‘noh cheh phe Lá-xoài, cheh phe Xanh-lùn plei tôch kơ lơ, kĕ tơ jră hơdrông, pơrang jĭ ‘lơ̆ng kơna kon pơlei tŏk bŏk hơdrin pơtăm dôm hơdrĕch ‘nao âu. Kon pơlei lui ngeh tơplih hơdrĕch ‘nao gô đei iŏk yua lơ hloh, tơdrong arih sa hiôk jơ nap ƀiơ̆, măh tôm ƀiơ̆.”

Thĭ xăh An Khê jĭ 1 thĭ xăh đei Thủ tướng teh đak chih tơbăt jĭ tơring hlôi jang đang tơdrong pơjing tơring tơrang ‘nao. Đơ̆ng rŏng kơ jang kĕh đĭ đăng 19 tơdrong hơgăt tơring tơrang ‘nao, thĭ xăh An Khê hlôi tơplih ‘lơ̆ng, pơjing tơring kơdrâm hrĕnh, jang tŏk mŭk drăm pran, kơjă tơmam jang đei jô̆ păh lăp đơ̆ng 2016 - 2020 đei 12,75% 1 sơnăm. Trong jang mŭk drăm đei tơplih roi ‘lơ̆ng. Dôm anih gru groa so, anih jŏh ayŏ kơ dŏ xoang hơnơ̆ng đei chĕp vei kơjăp…

‘Nhŏng Hồ Văn Hay, tơ̆ plei Pơ Nang, xăh Tú An, thĭ xăh An Khê, dêh char Gia Lai pơma: “Unh hnam nhôn chă pơtăm bơ̆n ‘long, pơtăm kơtao, pơtăm ƀum. Unh hnam nhôn jang xa 1 sơnăm iŏk đei đơ̆ng 50-60 triu, lăp măh chă rong ‘me băl, rong kon hŏk, pơma atŭm măh tôm mơ̆n, arih xa huei mơ̆n. Lơ̆m sơnăm ‘nao inh vă adrin jang xa păng sơnăm ‘nao âu apinh hmach thơ thou ăn kơ mih ma duch nă pran jăng, jang xa đei ƀôh vă gơ̆h klăih đơ̆ng tơnuh hin păng adrin chĕp vei kơjăp dôm tơdrong juăt  joh ayŏ kơ dŏ xoang tơ̆ pơlei.”

Đắk Gằn jĭ xăh hơtăih hơtŏ kơ apŭng Đắk Mil, dêh char Dak Nông. Năr Têt sơnăm ‘nâu, kơdră Đảng, khŭl kơdră chĕp kơ̆l păng rim khŭl jang chĭnh trĭ, tơpôl kơ xăh akŏm lơ trong jang hơvơn lơ kon jên, tơmam vă vei lăng Têt ăn bơngai dơnuh hin păng kon pơlei kon kông tơ̆ pơlei pơla. Ƀok Y Srao, Kơdră khŭl jang ‘long pơglang ƀrê xăh Đắk Gằn tơbăt, tơdrong jang đơ̆ng xăh ‘noh jĭ ưh kơ lê̆ ŭnh hnam kon pơlei hơyơ yua kơ mơmat tat mă ưh kơđei Têt: “Khŭl jang ‘long pơglang ƀrê xăh jang hơdai hăm kơdră đảng, kơdră tơring păng rim khŭl tơpôl akŏm krao hơvơn, tơgop vă vei lăng Têt ăn bơngai dơnuh hin, dôm ŭnh hnam teh đak tơgŭm păng asong tơmam ăn kon pơlei tơ̆ dôm pơlei lơ̆m xăh. Nhôn hơdrin vă kon pơlei sơng Têt tơnŏ hiôk, chơt hơiă, ưh kơ lê̆ ŭnh hnam kon pơlei hơyơ ưh kơ đei Têt. Ƀlep ƀơ̆t sơnăm ‘nao hmach thơ thâu kơ đĭ đăng kon pơlei pran jăng grăng hơkâu, jang đai iŏk yua lơ, mĭnh jơhngơ̆m đon hloh dơ̆ng lơ̆m tơpôl, ‘noh jĭ tơdrong mă ĭnh ‘meh vă hloh”.

Xăh sơlam Quảng Trực, apŭng tơnuh hin 30a Tuy Đức jĭ 1 lơ̆m dôm xăh oei đei lơ tơdrong pơmat tat kơ dêh char Đắk Nông. Ƀok Điểu Khanh, Phŏ Kơdră vei lăng kon pơlei xăh tơroi, xăh đei unh hnam tơnuh oei lơ đĕch. Mă loi, sơnăm 2023 âu ki, tơ̆ xăh đei ƀôh teh hlŭn hơlih pơm ăn lơ unh hnam jing huŏng lơ̆m tơdrong pơmat tat. Yoa thoi nŏh, tơdrong hơmet têt ăn kon pơlei tơ̆ tơring đei Anih chĕp kơ̆l Đảng, khul kơdră pơgơ̆r xă tôch tơrek, hăm đon tơchĕng rim bơngai, rim unh hnam đei xa têt ngăl.“Ƀât têt ‘nâu xăh Quảng Trực nhôn adrin krao hơvơn dôm anih tĕch mơdro, bơngai đei đon ‘lơ̆ng vang tơra tơgop vă hơmet têt ăn kon pơlei, mă loi jĭ unh hnam tơnuh, unh hnam pơmat tat, Nhôn adrin vă rim bơngai, rim unh hnam đei sơng xa têt chơt hơiă ‘nă hal ngăl.”

Yak mơ̆t lơ̆m sơnăm ‘nao Giáp Thìn 2024, vă kơ rim bơngai, rim hnam đei Têt ngăl,rim khŭl jang, anih jang, tơpôl pơgơ̆r lơ tơdrong jang sơng Têt, hlôi vang hơdai băl hăm khŭl kơdră tơring dôm dêh char Tây Nguyên vei lăng têt ăn kon pơlei, mă loi ‘noh jĭ bơngai dơnuh hin, bơngai mơmat tat, kŏng nhân jang... sơng têt phĭ tơnŏ, hiôk hăm hơdrin ưh kơ lê̆ ŭnh hnam hơyơ đei pơngot lơ̆m năr Têt Nguyên đán Giáp Thìn 2024:

Âu ki, dôm kơđông lĭnh vei lăng tơring sơlam kơ Anih tơm pơgơ̆r Ƀô̆ đô̆i vei lăng tơring sơlam dêh char Gia Lai hlôi pơgơ̆r tơdrong jang “Pơyan puih mak tơring sơlam - Pơhiôk jơhngơ̆m kon pơlei” tơ̆ dôm xăh sơlam apŭng Ia Grai, Đức Cơ, Chư Prông.  Tơ̆ tơdrong jang, rim khŭl lĭnh ƀô̆ đô̆i vei lăng tơring sơlam kŭm hăm kon pơlei nŭng ƀĕng chư̆ng, tôn chĭng chêng, hơri hơsoang vă tơklep tơdrong ‘mêm lĭnh-kon pơlei. Hơdai hăm ‘noh, dôm bơngai đei jơhngơ̆m đon ‘lơ̆ng pơgơ̆r dôm kơdeng tơmam 0 hlak jên, kiơ̆ đơ̆ng noh pơjao ăn kon pơlei kơhrĕng tơpu tơmam ‘noh đei bơ̆n khăn, kơmŭng, phe păng hla ar chih, tơmam yua hŏk pơhrăm ăn kơ hŏk tro.

Thượng Uý Siu Thương- Kơđông lĭnh vei lăng tơring sơlam Ia O tơroi găh tơdrong vei lăng Têt ăn bơngai dơnuh hin, hơioh, bơngai kon kông tơ̆ dôm xăh Ia O, Ia Chía: “Rim sơnăm mưh năr têt truh pơyan puih mak vih kơđông lĭnh vei lăng tơring sơlam Ia O, dêh char Gia Lai ‘noh jur pơgơ̆r têt, chơt hơiă sơnăm ‘nao kŭm hăm kon pơlei, păng kŭm jing ‘măng kơđông lĭnh vei lăng tơring sơlam păng kon pơlei đei tơƀơ̆p băl. Anih tơm pơgơ̆r khŭl lĭnh vei lăng tơring sơlam dêh char kŭm athei kơđông lĭnh vei lăng tơring sơlam Ia O lơ̆m dôm năr sơng sơnăm ‘nao truh asong tơmam ăn kơ dôm ŭnh hnam mơmat tat. Đang kơ ‘noh, dôm kră pơlei, bơngai pơgơ̆r pơlei ‘noh jĭ dôm bơngai tơgŭm ‘lơ̆ng ăn kơđông lĭnh vei lămg tơrring sơlam lơ̆m tơdrong jang tơroi tơbăt. Lơ̆m năr Têt Nguyên đán sơnăm ‘nâu, Kơđông lĭnh vei lăng tơring sơlam kŭm hlôi năm asong tơmam ăn dôm ŭnh hnam đei kŏng hăm kach mang, 1 tơpu tơmam đei kơjă 300.000 hlak jên, tơgop hơnhăk truh têt phĭ tơnŏ, hiôk chơt, vă kơ kon pơlei kŭm hăm lĭnh vei lăng tơring sơlam tơklep hơdai hloh lơ̆m tơdrong jang pơjing vei tơdrong sơđơ̆ng tơring sơlam”.