Lơ̆m jơva kơmăy ot ‘long ơ ong păng bơngai, gre yak vih vât pơsưt pơsat, 5 ‘nu công nhân đơ̆ng Công ty tơring kơdrâm Đak Lak oei chre hơmet lơ dơng ‘long kơjung ăn ‘long tih tơter trong Mai Hắc Đế, plt Buôn Ma Thuột. Gre kăt ‘long gơ̆h tưk kơjung truh 25 mét, vă tưk 2 ‘nu công nhân tŏk chre hơmet dơng sơdrai, tơjur hơmet mă ‘lơ̆ng tơ̆ jih trong. 3 ‘nu công nhân tơ̆ hơla ‘nŏh lăng răh gre, tăh hơmet dơng ‘long đei chăl hơmet tơ̆ gre tih hai.

Đơ̆ng rŏng vă jê̆ 3 jơ, bơ̆ jang hơnơ̆ng, công nhân Trần Văn Tuyến kŭm hăm bôl boăl ‘nao jang đang tơdrong chre hơmet dơng ‘long tih, kơjung truh 30 mét jur pă 15 mét. Bơngai oei hơmik hŭl hang păng tơklep ƀĕnh ‘mui ƀruih ‘long đơ̆ng ot, ‘nhŏng Tuyến tơroi: “Hmă hmă tơdrong jang nhôn chre hơmet ‘long prăt sơnăm. Mă lei adrol kơ pơyan ‘mi kial ‘nŏh tơdrong jang roi lơ ƀiơ̆, athei kŏh tơjur ƀiơ̆ dôm tơm ‘long tih, kơjung krê hơmơt. Tơdrong jang đơ̆ng inh đa bơ̆ jang tơ̆ kơpal kơjung ngăl, tôch hơmơt, kơna bơ̆ jang athei tôch kơchăng, bơ̆ jang mă ‘lơ̆ng ăn kơdih.”

Tơdăh dôm công nhân nhen ‘nhŏng Trần Văn Tuyến prăt sơnăm bơ̆ jang krê hơmơt, kăl đei jơhngâm pran ‘lơ̆ng păng ưh kơ hli kơjung, kŭm hăm đon răng kơchăng mă ‘lơ̆ng, ‘nŏh đe công nhân tơ̆ 4 Tô vei lăng pơkao, pơgar ‘long kơ Khul vei lăng ‘long, Công ty jang hơdoi găh cham char tơring kơdrâm Đăk Lăk ‘nŏh hơnơ̆ng phang kơdih kâu tơ̆ tŏ, pơdŏ kơ dih kâu tơ̆ ‘mi kial vă vei lăng bơ̆n pơkao, ‘ngiĕt pơtăm pơrŏ.

Kŭm hăm đe bôl boăl drŏ kăn jang hơdoi vei lăng pơkao pơtăm pơrŏ tơter trong tơ̆ Trong tih Võ Nguyên Giáp, mŏ Trần Thị Nga ăn tơbăt: lơ̆m khul đei hlŏh 20 ‘nu, rim khei bơ̆ jang tơ̆ trong gre âu, mă lei tơdrong jang oei tôch lơ. Mă loi, đơ̆ng ‘mi jruh blŭng đunh kơ âu 1 giĕng, ‘ngiĕt chăt tôch hrĕnh, công nhân athei chih hơmet ‘ngiĕt tôch hơlen tơ̆ dôm jĭt héc-ta teh pơtăm ‘long pơrŏ tơter trong: “Nhen ‘nâu, ‘ngiĕt pơrŏ đei pơtăm đơ̆ng sơnăm sơ̆, truh dang ei ‘nao chăt đei thoi âu, yoa tŏ phang tôch dêh. Mă lei mưh ‘mi jur ‘ngiet chăt răih kơdih chăt tôch hrĕnh. Jang hơnơ̆ng mă lei ‘ngiĕt chăt răih oei tơgar đĭ teh ‘ngiĕt pơtăm pơrŏ đĕch. Tơdăh đe jang mir roh ‘nŏh đe pruih pơgang ‘ngiĕt bơih. Mă lei ‘nâu jĭ trong, ưh gơ̆h pruih pơgang. Đĭ đăng athei jang hăm ti ngăl.”

Buôn Ma Thuột jĭ 1 lơ̆m dôm tơring kơdrâm đei tơm ‘long lơ hlŏh lơ̆m teh đak, hăm dang 26 rơbâu tơm ‘long tih, iŏk đei 17,4m2/1 ‘nu. Hơnih pơtăm pơkao, ‘ngiĕt pơrŏ tơ̆ âu kŭm xă truh kơhrĕng ha păng đei vei lăng tôch ‘lơ̆ng, ‘long pơkao đei kăt hơmet tôch ‘lơ̆ng, nhen ‘mĕh roi tơbăt tơdrong juăt ‘lơ̆ng đơ̆ng sơ̆ tơ̆ tơring teh âu.

Kŭm hăm lơ bơngai bơngai yak ngôi jơ̆ng hŏh tơ̆ pơgar pơkao jê̆ hnam sư, ƀok Trần Đức Hoà, phường Tân Thành akhan, tơm ‘long Buôn Ma Thuột kŭm jing tơmam tôch đei yoa mă kon pơlei oei xa yoa, păng ƀok ƀôh tơm ‘long tơ̆ plt kơdih kâu tôch ‘lơ̆ng: “Kon pơlei đei anih pơtâp hơkâu jăn, đei anih ăn mih ma duch nă, kon sâu ngôi pơchơt, pơdơ̆h ngôi đơ̆ng rŏng kơ bơ̆ jang gleh hrat. Inh chă năm tơ̆ lơ tơring bơih mă lei oei pơ̆n pơma Buôn Ma Thuột đei ‘long pơrŏ ‘lơ̆ng hlŏh”.

Kiơ̆ tơdrong tơproh trong jang truh sơnăm 2030, trong vă jang truh sơnăm 2050 ‘nao đei Anih vei lăng kon pơlei dêh char Đăk Lăk roi tơbăt, Buôn Ma Thuột gô đei pơih xă truh 500km2, pơting hăm 377km2 hrei ‘nâu, atŭm hăm ‘nŏh khŏm druh kiơ̆ trong jang pơjing tơring kơdrâm rơgŏh ‘lơ̆ng, gơ̆h hơgei păng chĕp vei kơjăp rim tơdrong juăt; “Lơ̆m bri đei tơring kơdrâm, lơ̆m tơring kơdrâm đei bri”.

Ƀok Nguyễn Trung Hiếu, Bơngai pơgơ̆r Khul vei lăng ‘long, Công ty jang hơdoi cham char tơring kơdrâm Đăk Lăk tơroi, anih jang dang ei đei hlŏh 250 ‘nu bơngai, kŭm hăm gre, kơmăy kơmŏk ‘nao. Hơdai hăm ‘nŏh, đei lơ công nhân tôch hưch tơdrong jang, adrin hŏk pơhrăm-hŏk iŏk dôm tơdrong kăl, kơna gơ̆h jang đang ‘lơ̆ng đon pơhnŏng pơtăm, vei lăng ‘long đơ̆ng plt: “Mă lơ ‘nŏh đe ‘nhŏng ŏh chă hŏk pơhrăm đơ̆ng băl, vă gơ̆h pơjing đei cham char ‘lơ̆ng rŏ. Hăm đe công nhân mât jang đơ̆ng rŏng, ‘nŏh hơnơ̆ng đei công nhân jang hơdrol, jang gơ̆h pơtho ăn, kiơ̆ khei ‘năr bơ̆ jang roi đunh roi gơ̆h.”

Đơ̆ng sơnăm 2011, Buôn Ma Thuột đĭ đei năng jĭ 1 lơ̆m 10 tơring kơdrâm rơgŏh ‘lơ̆ng hlŏh kơ Việt Nam. Truh dang ei, plt pơtăm chĕh phe tơm kơ teh đak âu jang tŏk roi ‘lơ̆ng hlŏh dơ̆ng. Kơmâu jơk ƀlĭk đơ̆ng tơm ‘long lơ̆m plt roi xă, roi hơƀơ̆l, roi ‘lơ̆ng hơiă, gơnơm đơ̆ng đe công nhân vei lăng ‘long bơ̆ jang roi gơ̆h păng tôch tơnăp.