Kŭm hăm dôm tơdrong jang lăng truh pơyua pơvăn ăn kon pơlei păng tơmoi tơmang lăng lơ̆m năr hơtuch sơnăm, pơlei tơm Đà Lạt hơmet ăn pơgơ̆r lơ tơdrong jang hơdăh ‘lơ̆ng vă kơkuh chơt hơiă 130 pơjing păng hơtŏk tơiung, nhen: Lêh joh ayŏ kơdŏ soang apŭng plĕnh teh sơnăm 2023; gơmăng joh ayŏ kơdŏ soang Việt Nam - Hàn Quốc; pơdă tơƀôh jơnei mŭk drăm - tơpôl kơ pơlei tơm Đà Lạt; lêh tơbăt 130 sơnăm Đà Lạt pơjing păng hơtŏk tơiung, sơng iŏk hơnăn pơlei tơm pơcheh hơgei găh tơdrong joh hơri hơsoang yua đơ̆ng UNESCO drơ̆ng ăn.

Ƀok Đặng Quang Tú, Kơdră anih vei lăng kon pơlei pơlei tơm Đà Lạt tơbăt, dôm tơdrong jang âu adoi tơrih pơgơ̆r lơ̆m khei 12, khei ‘năr kăl kơ pơyan tơmang lăng Đà Lạt – Lâm Đồng. Kiơ̆ đơ̆ng noh, tôch kơ hơmĕng gô sơng đei lơ tơmoi, tơgop hơtŏk tơiung anih jang tơmang lăng pơma hơdrô̆, mŭk drăm - tơpôl kơ tơring pơma atŭm.