3 ‘nu bơngai đei pôk pơ ư ‘nŏh jĭ ‘nhŏng Đặng Bá Thương (31 sơnăm, pơlei tơ̆ Thanh Hóa, oei tơ̆ trong Đào Duy Từ, phường 4, plt Đà Lạt), ƀok Lương Khánh (49 sơnăm, oei tơ̆ trong Nhà Chung, phường 3, plt Đà Lạt) păng oh Võ Quỳnh Thư, hŏk tro lăm 7A12 Hnam trưng THCS Nguyễn Du, plt Đà Lạt.

Kiơ̆ kơ ‘nŏh, pơgê ‘năr 20/2, rok trong năm hŏk tơ̆ trong Hai Bà Trưng (phường 6, plt Đà Lạt), oh Võ Quỳnh Thư dônh đei 1 pôm điên thoăi iPhone 14 Plus đei kơjă 18 triu hlak jên. Đơ̆ng rŏng kơ ‘nŏh, Thư năm pơjao ăn Công an phường 6 athei tơchă pơdreu dơ̆ng ăn bơngai tơhuŏng. Kiơ̆ đơ̆ng chă hơlen, Công an phường 6 hlôi băt hơnăn tơ ‘ngla điên thoăi âu, đang kơ ‘nŏh dơ̆ng lăng oh Thư pơdreu điên thoăi ăn bơngai tơhuŏng ‘nŏh jĭ 1 ‘nu drŏ kăn đơ̆ng plt Hồ Chí Minh năm chă tơmang lăng tơ̆ âu.

Adrol kơ ‘nŏh, kơsơ̆ 13/2, rok trong Trần Phú (phường 3, plt Đà Lạt), ‘nhŏng Đặng Bá kŭm hăm ƀok Lương Khánh dônh đei 1 pôm kơdŭng tăh jên. Tơ̆ lăm đei 2 hlak Hla ar gre păng vă jê̆ 11 triu hlak jên. ‘Nhŏng Thương păng ƀok Khánh krao điên thoăi, pơma nuh, pơjao dơ̆ng kơdŭng tăh jên, hla ar tơ̆ lăm kơdŭng ăn Công an phường 3. Đơ̆ng rŏng kơ ‘nŏh, công an chă hơlen păng băt tơ ‘ngal kơdŭng tăh jên âu păng pơdreu dơ̆ng ăn kơ sư. Bơngai tơhuŏng kơdŭng tăh jên âu ‘nŏh jĭ ƀok Nguyễn Lê Trãi, bơngai chă tơmang lăng đơ̆ng dêh char Khánh Hòa.