Lơ̆m 10 sơnăm tơbôl jang hadoi đơ̆ng Việt Nam - Thái Lan hlôi đei dôm hơyak kơjăp lơ̆m dôm tơdrong jang chĭnh trĭ, jang tơbôl, joh ayŏ kơdŏ suang, vei sơđơ̆ng tơpôl. Hăm pơlei tơm Đà Nẵng, dang ei đei 13 tơdrong jang đơ̆ng Thái Lan oei đei pơm jang hăm kơsô̆ jên asong jang pơhlom 60 trĭu đôlar Mih, akŏm lơ̆m dôm tơdrong jang tĕch pơdro, tĕch răt tơmam drăm, pơm tơlĕch sĭt mei hơbăn ao, ming man. Dang ei, Đà Nẵng đei 57 tơdrong jang tŏk bŏk oei đei hơvơn jang gah lơ tơdrong. Akŏm kơchơ apŭng plenh teh tĕch răt – tơmang pơhiơ̆ - asong jang Tơring mŭk drăm Đông - Tây hơnơ̆ng đei pơgơ̆r tơ̆ Đà Nẵng, hơvơn đei tơdrong vang jang kăp gĭt, tơnăp đơ̆ng dôm anih jang mŭk drăm Thái Lan.

Pơma ah hop akŏm, ƀok Hồ Kỳ Minh, Phŏ Kơdră Anih vei lăng kon pơlei pơlei tơm Đà Nẵng hơpơi 'meh, Hop akŏm jing gơng tơroh kăp gĭt truh dôm anih asong jang Thái Lan păng dôm anih asong jang lơ̆m teh đak truh hăm Đà Nẵng. Đe Kơdră pơlei tơm Đà Nẵng sơkơ̆t tơgŭm, pơm trong hiôk hloh vă rim anih asong jang Thái Lan păng dôm anih asong jang lơ̆m teh đak tơlĕch pơm jang tĕch pơdro đei jơnei tơ̆ Đà Nẵng.