Hnam trưng tơchĕng hơdrol rơih 2.900 ‘nu hŏk tro hŏk đại học chính quy ăn 35 tơdrong jang hŏk pơhrăm, găh dôm grŭp tơdrong jang: Jơhngơ̆m pran, choh jang sa bri ‘long, sư phạm, mŭk drăm. Lơ̆m noh đei 1 tơdrong jang ‘nao pơm lăp hăm ‘meh vă bơ̆jang đơ̆ng tơpôl ‘noh jĭ tơdrong jang Sư phạm Khoa học Tự nhiên. Sinh viên tốt nghiệp tơdrong jang âu pơtho môn Khoa học tự nhiên jăl 2 kiơ̆ tơdrong pơtho pơhrăm ‘nao.

Hnam trưng Đại học Tây Nguyên tơmơ̆t yua 4 trong set rơih ‘noh: Set kiơ̆ điêm pơlong tốt nghiệp jăl 3 sơnăm 2023, set học bạ jăl 3, set kiơ̆ điêm pơlong hơlen lăng hŏk gơh đơ̆ng Đại học Quốc gia pơlei tơm HCM păng set tơpăt kiơ̆ tơdrong hơgăt đơ̆ng Anih tơm vei lăng găh pơtho pơhrăm. Tơdrong pơm lơ dôm trong rơih hŏk tro vă pơm tơdrong hiôk, hơtŏk dơ̆ng tơdrong hiôk gơh năm hŏk ăn kơ đe hŏk tro. Hơdai hăm ‘noh, tơgŭm hnam trưng rơih iŏk đei dôm hŏk tro đei gơh hŏk păng lăp hăm tơdrong pơtho pơhrăm.