Mă hơtuch, ƀok Tô Lâm – Kơdră jang lơ̆m Anih tơm Chinh trĭ, Kơdră tơm vei lăng Công an, Bơngai tang măt Quốc hội jăl XV găh Khul tang măt Quốc hội dêh char Hưng Yên đei Quốc hội pôk pơm Kơdră teh đak CHXNCN Việt Nam, jăl jang đơ̆ng 2021-2026. Tơdrong tơchơ̆t găh pôk ƀok Tô Lâm pơm Kơdră teh đak kŭm đei dôm bơngai tang măt Quốc hội drơ̆ng nơ̆r, hăm 472/473 ‘nu bơngai tang măt drơ̆ng nơ̆r (iŏk đei 96,92% akŏm đĭ đăng kơsô̆ bơngai tang măt Quốc hội). Kơdră ‘nao kơ teh đak gô pơma nơ̆r pơsĭt, hơnơ̆ng mĭnh jơhngâm đon hăm Teh đak, Kon pơlei păng Khôi luơ̆t tơm tơ̆ hơnăp Quốc hội mưh iŏk kơchư̆k.

Đại tướng Tô Lâm rơnĕh sơnăm 1957, pơlei tơ̆ xăh Nghĩa Trụ, apŭng Văn Giang, dêh char Hưng Yên; jĭ Giáo sư Khoa hŏk găh Tơdrong sơđơ̆ng, Tiến sĩ Luơ̆t. Ƀok jĭ Kơdră jang lơ̆m Trung ương Đảng jăl XI, XII, XIII; Kơdră jang lơ̆m Anih tơm Chinh trĭ jăl XII, XIII păng Bơngai tang măt Quốc hội jăl XIV, XV. Đơ̆ng 1988-1993, ƀok Tô Lâm pơm Phŏ Kơdră, đang kơ ‘nŏh Kơdră Anih Vei lăng sơđơ̆ng Chinh trĭ I, găh Anih tơm vei lăng Công an. Lơ̆m 13 sơnăm đơ̆ng rŏng dơ̆ng, ƀok pơm Phŏ Kơdră Anih vei lăng sơđơ̆ng Chinh trĭ I, đang kơ ‘nŏh pơm Kơdră Anih vei lăng sơđơ̆ng Chinh trĭ III, găh Anih tơm vei lăng Công an. Đơ̆ng sơnăm 2006-2009, ƀok Tô Lâm pơm Phŏ Kơdră Anih vei lăng tơdrong sơđơ̆ng, găh Anih tơm vei lăng Công an. Lơ̆m 2 sơnăm đơ̆ng rŏng, ƀok vei lăng, đang kơ ‘nŏh tŏk pơm Kơdră Anih vei lăng tơdrong sơđơ̆ng I, găh Anih tơm vei lăng Công an. Ƀok Tô Lâm pơm Phŏ Kơdră tơm vei lăng Công an đơ̆ng khei 8/2010 truh khei 4/2016. Đơ̆ng rŏng kơ ‘nŏh, ƀok pơm Kơdră tơm vei lăng Công an truh dang ei.