Đơ̆ng rŏng tơmơ̆ng kơdră dêh char Kon Tum tơroi gah tơdrong jang hơmet ăn Năr akŏm Joh ayŏ, Tơplŏng kơdâu păng Tơmang pơhiơ̆ kon kông tơring Tây Nguyên ‘măng mă I, sơnăm 2023, Ƀô̆ trương Anih tơm Kŏng an, Đăi tươ̆ng Tô Lâm sơkơ̆t hơdah, tơdrong pơgơ̆r đei jơnei Năr akŏm Joh ayŏ, Tơplŏng kơdâu păng Tơmang pơhiơ̆ kon kông tơring Tây Nguyên ‘măng mă I, sơnăm 2023 tơ̆ dêh char  Kon Tum ‘noh kăp gĭt tơpă, tơgop vei răk tơƀăk mong mŭk drăm joh ayŏ Tây Nguyên.

Năr akŏm kơyuơ Anih tơm Joh ayŏ, Tơplŏng kơdâu păng Tơmang pơhiơ̆ jang atŭm hăm minh ƀar Anih jang tơm, anih jang Trung ương păng 5 dêh char tơring Tây Nguyên, đei: Kon Tum, Gia Lai, Đăk Lăk, Đăk Nông păng Lâm Đồng atŭm pơgơ̆r. Vang năm akŏm đei pơhlom 1.000 ngê̆ nhơ̆n, bơngai joh ayŏ, bơngai tơplŏng kơdâu păng tang măt ăn bơngai kon kông tŏk bŏk oei hơrih jang xa tơ̆ 5 dêh char Tây Nguyên. Lêh pơtơm năr akŏm đei pơgơ̆r ah kơmăng ‘năr brei 29/11 tơ̆ Cham pơhiơ̆ 16/3, pơlei tơm Kon Tum, dêh char Kon Tum.