Pơgê năr 27-9, Jơnŭm chĕp pơgơ̆r păng Bơngai mơlôh jang mơdro sa lơ̆m plei teh (JCI) tơ̆ Việt Nam jang hơdoi hăm Khul drŏ kăn jang Mơdro sa pơlei tơm Buôn Ma Thuột păng Hơnih Đoàn apŭng Cư Mgar pơgơ̆r pôk ăn kmăi tinh păng kơsơ̆p hla bơar ăn hŏk tro Hnam trương jăl kơđeh Y Jut, tơring Ea Hđing, apŭng Cư Mgar, dêh char Đăk Lăk. Tơdrong jang hlôi pôk ăn 30 tŏ kmăi tinh păng 2.000 kơsơ̆p hla bơar hŏk kơjă kơjên 200 triu hlak jên.

Kiơ̆ đơ̆ng ƀok Nguyễn Xuân Nhạc, Kơdră chĕp pơgơ̆r Hnam trương jăl Kơđeh Y Jut, hnam trương đei 670 ‘nu hok tro, lơ̆m au hŏk tro kon kông 70%, dôm kmăi tinh păng kơsơ̆p hla bơar hŏk păng kơsơ̆p hla bơar rup gô tơgŭm ăn hŏk tro hŏk pơhrăm tin hŏk, kmăi kmŏk kơtơ̆ng ang gơ̆h ƀiơ̆ păng atŏk jơhngơ̆m đon tơnăp chă đŏk hla bơar. Đơ̆ng noh hơnơ̆ng pơjing đei dơ̆ng jơhngơ̆m hưch an vă rim năr đe oh sa roi hơdrin hŏk pơhrăm hloh dơ̆ng. Atŭm hăm bơ̆ jang pôk ăn kmăi tinh păng kơsơ̆p hla bơar hŏk ăn hŏk tro hnam trương jăl kơđeh Y Jut, lơ̆m gơmăng năr 27/9, hơnih au oei pơgơ̆r “Trung thu ăn kơ oh” păng pôk ăn 400 tơnô̆ tơmam drăm ăn rim đe hơ ioh tơ̆ ƀuôn Đrao, tơring Cư Dle M’nông, apŭng Cư M’Gar.