Mă hơdăh ‘noh, lơ̆m 9 khei sơnăm 2023, khŭl linh kanh sat vei lăng trong nơnăm Kŏng an dêh char Dak Lak hlôi chă ƀôh păng pơm hla ar biên bản 36.258 ‘nu pơm glăi tơ̆ trong nơnăm, lơ̆m noh đei 8.650 ‘nu huơ̆r gre ô tô, gre hon đa đei chă ƀôh lơ̆m hơ kâu đei tơdrô hơlăk, ƀier mưh hao gre tơ̆ trong ( đei vă jê̆ 23,9% akŏp kơ sô̆ bơngai pơm glăi). Kăl kơ lăng truh đei lơ bơngai et tơdrô soai huơ̆r gre ô tô đei khŭl linh kơpal phak lơ hloh hăm kơ sô̆ jên 40 triệu hlak jên.

Lơ̆m kơ sô̆ dôm bơngai pơm glăi đei bơngai ‘noh kang ƀô̆, đảng viên, bơngai jang teh đak. Vă vei sơđơ̆ng trong nơnăm truh đĭ sơnăm 2023, khŭl linh kanh sat vei lăng trong nơnăm Kŏng an dêh char Dak Lak hlôi pơjing dôm trong tơlĕch jang hơmet ăn bơngai jang, gre, tơmam tŭn pran tơdrong jang dăr joang, vei lăng tơ̆ dôm trong gre tih, dôm hơ nih ưh kơ ‘lơ̆ng trong nơnăm; hơnơ̆ng tơlĕch jang dôm hơnih răp hơlen lăng pơm glăi găh tơdrô hơlăk, ƀier, ma túy…. Kiơ̆ kơ ‘noh, sek phak tơpăt bơngai huơ̆r gre et tơdrô hơlak, ƀier, ma túy, vă tang găn tŏ sĕt hloh gre tơ̆m pơ̆k preh băl ƀơm truh tơdrong ‘nâu.