Hơ ‘nhoi ưh kơ hiôk, blĕk jơhngâm, ‘mêm kơ jên hiong ‘nŏh jĭ tơdrong đei ƀôh hăm yă Lê Thị Linh, tơ̆ phường Tân Lợi, plt Buôn Ma Thuột, dêh char Đắk Lắk dôm năr âu ki. Yă ‘nao put kơ bơngai kơchu hơlĕnh 80 triu hlak jên hăm zalo. Yă tơroi, hlŏh 1 khei adrol ki yă năm tơ̆ anih pơm Hla ar plt Buôn Ma Thuột vă pơm hơmet ming hla ar teh. Pơgê ‘năr 2/10, hla ar đei gơih ăn anih thuê̆, jô̆ hơlen jên athei nôp. Vă ƀônh hiôk, yă athei kăn ƀô̆ thuê̆ đei hơnăn T. hơlen năng, pơm tơgŭm ăn yă. Bơngai ‘nâu drơ̆ng nơ̆r păng akhan vă tơl tơblang ăn yă 2,3 năr truh. 2 năr đơ̆ng rŏng, 1 kơsô̆ zalo ưh băt bu krao akhan T., jĭ kăn ƀô̆ thuê̆ athei nôp hơdrol 1 păh 80 triu hlak jên vă pơm hla ar. Kơtơ̆ng thoi noh, yă gơih jên ăn bơngai krao yă hloi mă ưh đei hơlen năng yă kiơ. Truh pơgê 6/10, sô̆ zalo âu krao kơ yă dơ̆ng, athei nôp thim 100 triu. Ƀôh ưh gan lui yoa năr 7, anih Thuê̆ pơdơ̆h jang, yă krao điên thoăi ăn kăn ƀô̆ T., ‘nŏh đei băt, sư ưh kơ đei krao zalo athei nôp jên thuê̆. Băt kơdih kâu pŭh ƀơm nơ̆r đe hơlĕnh, yă năm tơroi ăn công an.

Yă Linh tơroi: “Ưh băt lơ liơ mă hăp băt inh vă nôp thuê̆ păng băt hơnăn kăn ƀô̆ thuê̆ ‘nŏh vă hơlĕnh krao kơ inh, đang kơ ‘nŏh sư gơih số tài khoản athei inh gơih jên. Ƀôh sô̆ tài khoản hơnăn T. inh lui hloi, ưh đei hơlen năng kiơ, kư̆ gơih jên ăn đe hloi. Klo inh ‘mêm jên hăt hot năm tơ̆ ngân hang hơlen năng ‘nŏh hơnăn T. lei lăi hăm hơnăn kăn ƀô̆ thuê̆, mă lei ưh kơ trŏ hŏ, păng bơngai jang tơ̆ anih mong jên akhan, kơsô̆ jên 80 triu âu đĭ gơih truh tơ̆ tài khoản tơ̆ Campuchia.”

Đơ̆ng blŭng sơnăm 2024 truh dang ei, Công an dêh char Đắk Lắk hlôi tơkêng 25 tơdrong yoch hăm kơmăy kơmŏk ‘nao chă hơlenh, tơgar iŏk jên đe hăm 75 ‘nu bơngai pơm glăi. Akŏm đĭ đăng kơsô̆ jên đe iŏk pơgâm truh mơjĭt ti hlak jên. Trung tá Nguyễn Huy Nam – Kơdră Anih vei sơđơ̆ng mang păng tang găn tơdrong yoch hăm kơmăy kơmŏk ‘nao công an dêh char ăn tơbăt, tơdrong hơlĕnh pơdăr đơ̆ng dôm bơngai pơm glăi ‘nŏh ya pơm kăn ƀô̆ bơ̆ jang luơ̆t nhen: Công an, anih sek tơlang, anih tơkêng tơdrong yoch, bơngai jang tơ̆ ngân hang krao điên thoăi, zalo, facebook athei nôp jên phak yoa pơm glăi luơ̆t hao gre kơdâu tơ̆ trong, nôp jên pơm the kăn kươk, jên hơmet jĭ, jên ƀao hiêm dăh mă dôm kơloăi thuê̆, jên nôp nai; pơhlŭ đe tơlĕch jên tĕch tơmam hăm điên tư, jên ya. Hơdai hăm ‘nŏh lu bơngai kơchu oei chă trong iŏk tơtông hơnăn tài khoản facebook, zalo chih tin gơih ăn kơtum kơtŏng ‘nhŏng oh vă hơlenh apinh mơng jên; pơm lơ trang web tĕch tơmam trư̆k tuyê̆n vă hơlĕnh pơdăr; pơm boăl, chih nơ̆r tơhưch đang kơ ‘nŏh athei gơih jên vă pơm hla ar năm oei tơ̆ teh đak đe; asong tŏk iŏk jên hăm jên kon tôch lơ kiơ̆ app lơ̆m mang; hơpăh tơmam athei gơih hơdrol jên gơih đơ̆ng teh đak đe…

Trung tá Nguyễn Huy Nam, đei nơ̆r tơtă: “Athei kon pơlei mă kơchăng, vei lăng ‘lơ̆ng rim tơdrong ƀơm truh kơdih kâu. Mưh yoa mang tơpôl, lê̆ chih tơroi rim tơdrong đơ̆ng kơdih kâu. Mưh vă pơm kiơ ƀơm truh tơdrong gơih jên ‘nŏh athei hơlen năng mă nhen. Hơnơ̆ng chă đŏk hơlen năng rim tơdrong, trong hơlĕnh pơdăr đơ̆ng lu bơngai pơm yoch hăm kơmăy kơmŏk ‘nao lơ̆m ƀăo, đai vă gơ̆h băt.”

Ƀok Trần Thế Việt – Phŏ kơdră Anih Viettel Đắk Lắk akhan, tơplih hăm kơmăy sô̆ oei bơ̆ jang tôch pran vă năm truh đon pơhnŏng pơm hơtŏk tơdrong đei yoa đơ̆ng bơ̆ jang lơ̆m jơ̆p tơpôl; rim tơdrong jang tŏk bŏk đei tơplih hăm kơmăy sô̆, rim kơsô̆ đei chih akŏm, ming tơ̆ anih ‘măn răk tôch lơ. Mă lei, năm hơdoi ‘nŏh jĭ tơdrong yoch găh kơmăy kơmŏk rơgei, kiơ̆ mang tơpôl kŭm ƀôh roi lơ. Dôm bơngai pơm yoch hơnơ̆ng chă trong tơgar tài khoản zalo, facebook, viber, tơdrong chih tơroi kơdih, iŏk yoa sim kư̆ kă… vă hơlĕnh pơdăr tơgar iŏk jên đe. Vă găn ƀiơ̆ dôm tơdrong yoch lơ̆m mang tơpôl, athei hŭt pơđĭ sim kư̆ kă păng pơjing trong găn lê̆ đĭ đăng kơsô̆ điên thoăi ưh băt đơ̆ng yơ krao, chih tin nhăn lơ vât vă hơlĕnh đe.

Ƀok Trần Thế Việt, ăn tơbăt: “Viettel vă kơchăng chă hơlen năng sim yơ ưh đei hơnăn bơngai răt, gơih ăn khul jang tơ̆ pơlei pơla, đei bơngai jang ăn Viettel kŭm hăm dôm bơngai jang lơ̆m Khul tơplih hăm kơmăy sô̆ lơ̆m tơpôl vă pơm VneID păng chih hơmet sim. Kơmăy đơ̆ng Viettel oei vă hơlen năng dôm sim đa krao ăn dôm kơsô̆ điên thoăi nai hai, kơmăy âu gô gơih truh kơmăy đe krao, tơdăh bơngai yoa akhan ‘nŏh jĭ sim kư̆ kă nŏng krao pơgleh kơ sư ‘nŏh vă găn lê̆ hloi.”

Tơ̆ hơnăp tơdrong hơlĕnh pơdăr tôch hơmơt đơ̆ng khul pơm yoch hăm kơmăy kơmŏk ‘nao kiơ̆ đơ̆ng mang, ‘ngoăih kơ hơtŏk trong tang găn, anih jang kơpal, kon pơlei athei hơtŏk đon kơchăng hai, pơm kiơ̆ rim nơ̆r pơtho đơ̆ng công an, ưh đei roi tơƀôh dôm tơdrong ƀơm truh kơdih kâu vă huei đei bơngai hơlĕnh pơdăr băt. Kiơ̆ đơ̆ng noh, tơgŭm ăn rim bơngai tang găn đei tơdrong, bơngai hơlĕnh pơdar iŏk nơ̆r chih tơroi đơ̆ng kơdih kâu vă hơlĕnh, tơgar iŏk jên đe, vă huei puh lơ̆m tơdrong jên hiong, tơdrong ơh truh./.