Kiơ̆ hla ar chih kơsô̆ pơjei kơ dêh char sơnăm 2022, Dak Lak đei 60,91 điêm, dơ̆ng mă 60/63 dêh char, dơ̆ng mă hơtuch tơ̆ tơring Tây Nguyên. Kiơ̆ trong jang ‘nao tơlĕch, Anih vei lăng kon pơlei dêh char Dak Lak vă hơtŏk CPI đơ̆ng sơnăm 2023 – 2025 kơ dêh char, dơ̆ng đơ̆ng păh lăp tŏk tơ̆ kơpal păng dôm kơsô̆ hơgăt nai đei kơpal kơ 6 ngăl.

Atŭm hăm ‘nŏh roi tơbăt 7 grŭp trong jang kăl tơlĕch bơ̆ jang mă pran. Lơ̆m nŏh, hơtŏk hơnăp jang, đon kơchăng đơ̆ng dôm anih jang kơpal, Anih vei lăng kon pơlei dôm apŭng, thĭ xăh păng pơlei tơm; hơtŏk tơdrong hơmet ming trong pơm hla ar, tơjur ƀiơ̆ năr pơm hăm dôm hla ar ƀơm truh tơdrong tơmât jên jang, tĕch mơdro, tơjur jên pơm, jên truh tĕch mơdro xa, chă thuê tĕh ƀônh, hơtŏk tơdrong tơƀâp, pơma nuh, sek tơlang dôm tơdrong pơmat tat, tơhlăk tăk đơ̆ng anih tĕch mơdro.