Kiơ̆ kơ ‘noh, đơ̆ng năr 20/11/2023 truh đĭ năr 29/2/2024, rim khul vei lăng Mơdro sa găh Hơnih vei lăng mơdro sa dêh char Dak Lăk gô dăr lăng hăm 111 hơnih, tơngla jang pơm tơlĕch, tĕch mơdro lơ̆m dêh char.

Bơ̆ jang dăr lăng, lăng hơlen akŏm lơ̆m rim tơmam drăm răt yua lơ lơ̆m khei ‘năr hơtuch sơnăm păng Têt Nguyên đán nhen ƀĕng keo, sĭk, hơlăk, ƀier, hơ̆t kơret, đak ‘ngam, tơmam điên tư, hơtuh sơngiĕo, hơbĕn ao, chơkhŏ, xem bri brăh păng tơmam drăm đơ̆ng xem bri brăh, kơmlăi, rim kơ loăi pơkao plei ‘long…. Atŭm hăm ‘noh rim Khul gô pơgơ̆r dăr lăng kơjăp tơdrong tĕch mơdro đak xăng đa dau, ưh kơ lê̆ đei pơ ‘ngơ̆m vă hơtŏk kơjă, vă tơgop pơm sơđơ̆ng kơjă tĕch mơdro ăn kon pơlei lơ̆m khei năr Têt.