Lơ̆m 1 poăt sơnăm au, lơ̆m teh đak đei 23 ‘măng sar bar unh hơyuh pơm ăn 11 ‘nu kon pơlei lôch păng 23 ‘nu rơka. Tơdrong tơm kơ yuơ kon pơlei chă chô̆, pơlăp kơdih ŭnh hơyuh kơƀang pơrŏ, kơƀang tơbăt, pơm glăi tơdrong sơđơ̆ng ŭnh hơyuh, đei ‘măng kơ yuơ chă tơtông tơmam drăm hơnih jang ŭnh hơyuh.

Tơ̆ Đak Lăk, vă tang găn sar bar ŭnh hơyuh ăn kon pơlei, Hơnih jang ŭnh hơyuh Đak Lăk hlôi atŏk kơtang bơ̆ jang dăr lăng tơlei, adoi pơtruh hla bơar chih tơbăt găh tơdrong sơđơ̆ng jih tơlei ŭnh hơyuh, pơtho tơbăt iŏk yua ŭnh hơyuh sơđơ̆ng. Mă kăl ‘noh hơdrol pơyan ‘mi kial hơbut hơbông sơnăm au, rim hơnih hlôi iung jang hơdoi hăm kơdră chĕp pơgơ̆r rim tơring hơnơ̆ng pơtho tơbăt ăn kon pơlei kơchăng iŏk yua ŭnh hơyuh. Lơ̆m au, hơnih jang unh hơyuh pơkă ưh kơ chă chô̆ ăng ten tivi, chô̆ tơlei sơ̆k, pơtăm ‘long tơjê̆ tơlei unh hơyuh; ưh kơ gơ̆h chă prăh sem kôp tơ̆ tơlei unh hơyuh; ưh tơpăr klang tơjê̆ tơlei ŭnh hơyuh; ‘nĕ chă chô̆ kon tơrong tơ̆ jrăng ŭnh hơyuh …  ‘Ngoăih kơ ‘noh, rim ‘măng iung jang chă ming hơmet ŭnh hơyugh ăn kon pơlei, rim kŏng nhân jang ŭnh hơyuh jei hơnơ̆ng lăng hơlen tơlei ŭnh hơyuh vă sơđơ̆ng ăn kon pơlei iŏk yua.