Hơmet tŏk oei hnam ‘nao, pơmai Nguyễn Thị Diệu Linh, jang tơ̆ Anih pơgơ̆r linh apŭng Krông Bông chơt hơ-iă tơroi, hơpơi đei hnam kơjăp ‘lơ̆ng đơ̆ng lơ xơnăm kơ âu hlôi jing tơpă. Tơdrong hơrih tơnap tap ăh klo năm jang tơ̆ ataih, rong 2 ‘nu kon iĕ, lơ̆m noh đei 1 ‘nu mon noh jĭ jăn. Mưh ưh đei tơdrong tơgŭm đơ̆ng bôl boăl păng 50 trĭu hlj đơ̆ng Jên mong pơm kiơ̆ nơ̆r Ƀok kơyươ Hwên wi Krông Bông axong ăn noh tam mă băt lai yơ mă unh hnam kĕ man đei hnam ‘nao: Inh ƀôh xô̆ hơ-iă kơlih đei iŏk tơgŭm đơ̆ng anih jang kơpal, đe ‘nhŏng pơmai oh lơ̆m anih jang, pơjing đei hnam oei nhen dang ei vă xơđơ̆ng jơhngơ̆m pơm jang. Inh ƀôh tơdrong jang âu noh kăp gĭt, pơm ăn kơ inh lui ngeh, da ƀiơ̆ tơnap tap, tơgŭm inh xơđơ̆ng kơ đon rong ‘me kon hơ-ioh.

Adoi chơt hơ-iă đei iŏk 20 trĭu hlj đơ̆ng Jên mong pơm kiơ̆ nơ̆r Ƀok, pơmai Trần Thị Vân, oei tơ̆ thôn 2, xăh Hòa Thành, apŭng Krông Bông hlôi bơ̆ bơbŭng cham hnam, đei anih ăn kon drănglo pơchơt, pă đei oei lơ̆m kơnong ‘long hrăt hrot to bơih.

Kon drănglo pơmai hiong đon kơyươ đơ̆ng pơlŏ tô̆ jĭ ‘ngok, tŏk 7 xơnăm mă lei tơdrong hlôh vao nhen đe hơ-ioh minh ƀar khei đĕch: Lơ xơnăm kơ âu chă kơdâu ming hơmet tơ̆ lơ tơring noh mŭk drăm adoi đĭ, yơ̆ng âu ki đei iŏk tơgŭm đơ̆ng tơdrong jang noh xô̆ hơ-iă tơpă, vă bơ̆ bơbŭng păng man chơnĕng kơjung hloh ăn kơ mon chă kơdâu pơxuh tăp dăr hoai kơ răm. Mon oei tơ̆ hnam prăt năr, rim ‘măng mĕ vih đơ̆ng jang noh xô̆ dêh, unh hnam inh hmach bơnê tôch lơ.

Pơmai Linh păng pơmai Vân jing 2 lơ̆m kơsô̆ kơ hrĕng đảng viên, kon pơlei đei iŏk tơgŭm đơ̆ng Jên mong pơm kiơ̆ nơ̆r Ƀok tơ̆ apŭng Krông Bông. ‘Nâu jing jên mong kơyươ Hwên wi Krông Bông tơlĕch jang đơ̆ng xơnăm 2016. Kiơ̆ kơ noh, rim anih jang, jơnŭm tơpôl, chi ƀô̆ hơvơn kang ƀô̆, đảng viên, kon pơlei pơm kiơ̆ mong ƀiơ̆ đơ̆ng 2.000 hlj truh 20.000 hlj 1 khei vă pơjing jên mong, tơgŭm dôm bơngai tơnap tap hloh lơ̆m apŭng. Hăm trong jang âu, tơdrong jang hlôi tơra đei jê̆ 4 tih hlj.

Truh dang ei, Hwên wi Krông Bông hlôi axong tơgŭm 100 tŏ rơmo yŏng, tơgŭm man 14 tŏ hnam, man 1 pôm hnam bơ̆ jang tơ̆ hnam trưng Ea Rớt (xăh Cư Pui), tơgŭm unh hnam ƀơm răm đơ̆ng ‘mi kial đak hơbông, dôm bơngai tơnap tap hloh, bơngai ƀơm tơdrong jĭ hlăm... Yă Hồ Thị Thảo, Phŏ Kơdră Anih jang Twên yăo Hwên wi Krông Bông ăn tơbăt, tơdrong jang âu jing kăp gĭt hŏk pơhrăm păng pơm kiơ̆ đon bơnôh trong jang ‘lơ̆ng Hồ Chí Minh, tơgop pơlan xă Tơchơ̆t 05 đơ̆ng Anih tơm Chĭnh trĭ truh hăm tôm kon pơlei. Lơ̆m tơlĕch jang, kiơ̆ kơ rim jăl, Anih juăt jang Hwên wi xơkơ̆t hơdăh rim bơngai yơ đei xa tơgŭm vă chă tơgŭm ăn. Jên mong đei axong hơbĕch hơdăh, pơih xă bơngai đei iŏk tơgŭm păng hơmet mă trŏ ƀlep. Gơnơm thoi noh, tơdrong jang đei lơ kon pơlei, kang ƀô̆, đảng viên hăt hot vang jang: Lơ̆m khei năr truh, lăng tơdrong jang âu tơpă kăp gĭt vă chă tơgŭm ăn rim bơngai tơnap tap lơ̆m tơring teh kơ apŭng. Kơchĕng đơ̆ng rŏng kơ axong tơgŭm jên mong âu noh ăh blŭng khei 7/2023 noh Anih jang Twên yăo gô pơtoi tơgŭm ăn Đảng ƀô̆ tơlĕch tơdrong jang mong răk ‘nao vă xơng kơ kuh kơ Hop akŏm Đảng dôm jăl xơnăm 2025 - 2030.

Ưh hơdrô̆ tơgop jang tơnăp Tơchơ̆t 05 đơ̆ng Anih tơm Chĭnh trĭ truh hăm tôm kon pơlei, tơdrong jang Mong răk kiơ̆ nơ̆r Ƀok pơtho tơ̆ Krông Bông hlôi đei iŏk jơnei hơdăh, tơgŭm ăn lơ bơngai đei xa tơgŭm. ‘Nâu jing tơdrong jang kăp gĭt vă rim kon pơlei atŭm jơhngơ̆m, pơlan xă tơdrong jang ‘lơ̆ng lơ̆m hŏk pơhrăm păng pơm kiơ̆ trong jang ‘lơ̆ng Hồ Chí Minh, ăn tơdrong hơrih roi năr roi ‘lơ̆ng rŏ hloh.