Pơjao Tơchơ̆t păng plang pơkao thơ thâu hơ-iă hăm ƀok Nguyễn Minh Huấn iŏk jang sơnong 'nao, ƀok Võ Văn Cảnh, Phŏ Kơdră Anih Pơgơ̆r vei lăng kon pơlei dêh char Đăk Lăk ră hơdah: Mŭk drăm – Cham char jing tơdrong jang tih să, tơnap tap hloh. Kơyuơ noh, hăm sơnong jang 'nao, Kơdră Anih jang Mŭk drăm păng Cham char Đăk Lăk kăl pơtoi chĕp vei kơ̆l 'ngok, hơtŏk hlôh vao, hơnơ̆ng hŏk hơlen păng hơtŏk sơnong jang tơnăp lơ̆m tơdrong jang vă keh đang sơnong jang, pơjing anih jang roi năr roi hơtŏk tơ-iung.

Iung pơma ah jơ iŏk jang, ƀok Nguyễn Minh Huấn hmach bơnê ah đei đe kơdră dêh char lui ngeh, pơjao sơnong jang 'nao. Hăm kơchư̆k jang 'nao păng sơnong jang trăp trĭn, Kơdră 'nao kơ Anih jang Mŭk drăm păng Cham char sơkơ̆t gô pơtoi hŏk hơlen pơ-'lơ̆ng đon bơnôh chĭn trĭ, tơdrong hlôh vao juăt jang, sơnong jang tơnăp, kơchăng pơm jang; hơtŏk tơguăt tơguăl atŭm hăm anih jang keh đang 'lơ̆ng tơdrong jang đei pơjao.