Ƀok Nguyễn Tài tơ̆ thôn 15, xah Ea Yông, apŭng Krông Pach, dêh char Đăk Lăk truh pơm hla bar hanh chĭn tơ̆ anih jang “Pôm 'măng” tơ̆ Anih jang vei lăng kon pơlei xah Ea Yông. Ƀok Nguyễn Tài akhan, tơdrong mă dôm jăl pơgơ̆r tơring hơtŏk pran pơ-'lơ̆ng pơm hla bar hanh chĭn lơ̆m khei năr âu ki hlôi pơyua kăp gĭt ăn kon pơlei, anih jang mŭk drăm. Lơ̆m noh, tơdrong tơplih tơgăl kơ pôk bơnê noh  “Pơkăp  kiơ̆ Zalo tơroh truh tôm kon pơlei” lơ̆m sek tơlang pơm hla bar hanh chĭn tơ̆ tơring: “Ah mă inh truh pơm hla bar kăl tơ̆ anih jang hanh chĭn kơ xah. Inh ƀôh hơdah noh jing tơdrong jang hơgei tơnăp đơ̆ng đe kan ƀô̆ lơ̆m anih jang hanh chĭn kơ xah. Ah kon pơlei đei tơdrong apinh gah dôm hla bar hanh chĭn noh gơh chă pơma dơnuh lơ̆m grŭp Zalo”

Atŭm hăm trong jang “Pơkăp  kiơ̆ Zalo tơroh truh tôm kon pơlei”,  khei năr âu ki, dôm trong jang nhen: “ 'Năr pêng trư̆k tuyê̆n”, “ 'Năr ưh đei chih”, “ 'Năr ưh đei pơkă” hlôi đei rim tơring lơ̆m dêh char Đăk Lăk tơlĕch jang hiôk gah hla bar hanh chĭn. Ah kon pơlei năm truh anih jang “Pôm 'măng” vă pơm hla bar kăl nhen sao y, kĭ tơchơ̆t hla bar kăl; pơm hla bar chih măt tơ-oei unh om; hla bar chih măt hơ-ioh đei rơneh păng hla bar tơroi gah lôch hơchăng gô đei pơm tơ̆ minh anih hăm tơchơ̆t 5 tơdrong: Tơroi, sơng iŏk, hơmet pơm, kĭ tơchơ̆t păng asong hla bar pơkăp. Yă  Nguyễn Thị Thúy Sinh, kan ƀô̆ Anih jang – Chih hơlen kơ Anih jang vei lăng kon pơlei xah Ea Yông, apŭng Krông Pach, dêh char Đăk Lăk ăn tơbăt: “Anih jang vei lăng kon pơlei xah hlôi jang lơ tơdrong pơtruh hăm kon pơlei. Jang atŭm hăm jơnŭm pơgơ̆r tơdrong jang 06, jơnŭm pơgơ̆r hơmet pơ-‘lơ̆ng hanh chĭn tơlĕch tơdrong jang “1000 kon pơlei kơsô̆” lơ̆m tơring teh kơ xah Ea Yông. Kon pơlei ah truh pơm dôm hla bar kăl hanh chĭn tơ̆ tơring noh kơdih nôp hô sơ trư̆k tuyê̆n vă da ƀiơ̆ huach jên păng jơ ‘năr”

Tơdrong tơlĕch kiơ̆ trong jang âu hlôi tơjur ƀiơ̆ jơ ‘năr pơm hla bar hanh chĭn tơ̆ anih jang xah, phương. Kon pơlei năm truh minh ‘măng, oei gô lơ̆m tŏ sĕt jơ noh đei bơih hla bar kăl pơm. Dôm tơdrong jang âu ưh hơdrô̆ tơgŭm pơ-‘lơ̆ng tơdrong pơm hla bar hanh chĭn tơ̆ xah, phương đei pơm trŏ khei năr pơkăp, tơgŭm ăn kon pơlei, anih jang mŭk drăm da ƀiơ̆ huach jơ vih vơ̆t, da ƀiơ̆ huach jên lơ̆m tơdrong pơm hla bar hanh chĭn mă oei pơjing đei kan ƀô̆, bơngai jang tơnăp hăm sơnong jang, đei đon 'lơ̆ng lơ̆m pơm jang. Ƀok Nguyễn Thanh Vũ, Kơdră Anih jang vei lăng kon pơlei apŭng Krông Ana sơkơ̆t hơdah: “Tơdrong tơplih ‘nao gơh hơgei lơ̆m pơm hla bar hanh chĭn, kơdră kơ dôm anih jang kơchăng pơgơ̆r chă hơlen lăng, pơgơ̆r jang hăm kan ƀô̆ bơngai pơm jang kiơ̆ tơchơ̆t hanh chĭn, kiơ̆ tơchơ̆t anih pơm jang păng athei băt hơdah tơdrong tơroi đơ̆ng kon pơlei gah đon bơnôh pơm jang adoi nhen nơ̆r pơma xa hăm kon pơlei”

Kiơ̆ sơkơ̆t tơ̆ “Hop akŏm pơkăp 9 khei jang găh tơdrong tơplih pơ-‘lơ̆ng hanh chĭn kơ dêh char Đăk Lăk sơnăm 2023”, kơyuơ đei tơdrong vang jang drơ̆ng minh, kơjăp đơ̆ng dôm anih jang, khei năr âu ki hlôi tơgŭm ăn tơdrong jang pơ-‘lơ̆ng hanh chĭn kơ dêh char đei hơmet tơnăp, pơm jang tơnăp hloh kiơ̆ tơdrong kăl đơ̆ng kon pơlei păng anih jang mŭk drăm. Tơdrong sơng iŏk, pơm hla bar hanh chĭn lơ̆m tơdrong vei lăng kơ dêh char đei pơm jang tơnăp, pơm tơjur tơdrong klui adar lơ̆m pơm hla bar kăl; athei pơtruh nơ̆r hnơi hăm kon pơlei mưh đei pơm adar hla bar pơkă. Tơdrong chih akŏm ăn ƀôh, tơdrong pơm hla bar kăl trŏ pơkăp lơ̆m tơring teh kơ dêh char đei jơnei hloh 99%. Vă pơtoi hăm tơchơ̆t “Iŏk kon pơlei păng anih jang mŭk drăm pơm tơm vă pơm jang”, ƀok Nguyễn Tuấn Hà, Phŏ Kơdră Anih jang vei lăng kon pơlei dêh char Đăk Lăk sơkơ̆t hơdah: “Khei năr truh gô pơgơ̆r minh tơdrong Hop akŏm vă hơlen lăng tơdrong tơlĕch jang adoi nhen hơlen lăng dôm tơdrong tơnap tap bơh ƀơm vă chă trong pơklaih. Mă 2 noh chih hơlen vă pơdrơ̆ng kơsô̆ pơkăp hla bar hanh chĭn đei tơbang lơ̆m pơkăp chih akŏm kơ teh đak. Mă 3 noh tơlĕch tơgŭm ăn Anih jang vei lăng kon pơlei dêh char gah hla bar pơgơ̆r jang dôm sơnong jang pơ-‘lơ̆ng hanh chĭn đơ̆ng dang ei truh đĭ sơnăm 2023. Hơlen sơkơ̆t ôm tơdrong jang teh đak kiơ̆ trŭk tuyê̆n vă đơ̆ng noh rơih dôm tơdrong jang kơ teh đak trŏ ƀlep, đei iŏk yua lơ, tơguăt hăm tơdrong kăl rim năr đơ̆ng kon pơlei, anih jang mŭk drăm”

Tơdrong mă Đăk Lăk khŏm mă hơtŏk pran pơ-'lơ̆ng pơm hla bar hanh chĭn đei ƀôh tơplih kăp gĭt, pơm trong ăn dêh char hơtŏk pran păng kơjăp sơđơ̆ng, trŏ hăm tơdrong pơkăl hơtŏk tơ-iung atŭm kiơ̆ Tơchơ̆t kơsô̆ 23-NQ/TW năr 06/10/2022 kơ Anih tơm Chĭnh trĭ gah trong jang hơtŏk mŭk drăm – tơpôl păng vei sơđơ̆ng tơpôl teh đak tơ̆ tơring Tây Nguyên truh sơnăm 2030, sơkơ̆t truh sơnăm 2045.