Iung jang ‘lơ̆ng tơdrong jang dăr lăng tơdrong tĕch răt ŭnh hơyuh, lơ̆m 9 khei sơnăm 2024, hnam kmăi ŭnh hơyuh Dak Lăk hlôi sek tơlang vă jê̆ 920 ‘măng pơm glăi găh ŭnh hơyuh hăm akŏp kon jên phak kăp truh 1 ti 700 triu hlak jên.  

Sơnăm sơ̆, Dak Lăk jei dơ̆ng hơlou kơ rim hơnih jang lơ̆m Hơnih tơm hnam kmăi unh hơyuh Miền Trung (EVNCPC) găh kon jên kăp pơm glăi iŏk yua ŭnh hơyuh hloh 2 ti 100 triu hlak jên. Vă bơ̆ jang dăr lăng iŏk jơnei, rim hơnih jang ŭnh hơyuh lơ̆m dêh char hlôi tơlĕch jang lơ trong jang trŏ lăp hăm tơring. Rim tơring să, đei hơnih kmăi ƀôm đak tơruih ‘long pơtăm să nhen Ea Kar, Ƀuôn Hồ, Cư M’gar… ngăl đei pơm glăi tơtông iŏk ŭnh hơyuh kơtang hloh tơring anai. Kơ yuơ lơ loh, lơm pơyan phang, khei ‘năr tơruih ‘long pơtăm, rim hơnih jang ŭnh hơyuh jei hơnơ̆ng năm dăr lăng prăt măng prăt năr, lăng hơlen kơ jăp iŏk yua ŭnh hơyuh, bơ̆ jang hăm kmăi kmŏk hơgei vă kơ ƀôh hrôih đe pơm glăi ... Hnam kmăi ŭnh hơyuh Dak Lăk jei iung jang dăr lăng hăt hot găh bơ̆ jang tĕch mơdro ŭnh hơyuh, jơ ŭnh hơyuh, tơtom ƀôh, hơmet pơ ‘lơ̆ng dôm tơlei ŭnh hơyuhg pă gan ‘lơ̆ng.