Tơdrong tơlĕch jang gô đei pơm jang tơ̆ 15 xah kơ 4 apŭng đei M’Drak, Ea Kar, Krông Bông păng Lăk. Tơdrong asong jang đei jên pơkăp pơhlom 19,53 trĭu đôlar, hơtŏ hăm pơhlom 468,73 tih hlj, kơyuơ Anih mong jên apŭng plenh teh gah hơtŏk choh jang xa păng Anih mong jên gah tŏ 'mi kial jơk sơđơ̆ng tơgŭm.

Tơchơ̆t kơ tơdrong vă jang noh tơgŭm ăn jơnŭm pơgơ̆r tơring tơlĕch dôm trong jang kăp gĭt đơ̆ng teh đak păng jang hơdah lơ̆m tơdrong jang vă tơjur ƀiơ̆ rơ̆m rĕk hơyuh 'mê̆ đei đơ̆ng hiong bri, răm bri păng hơdrin hơmet pơ-'lơ̆ng bri vă pơm trong hiôk ăn kon pơlei pơm jang păng hơtŏk hlôh vao ăn tơpôl. Tơdrong jang đei hơnăn krao “Tơjur rơ̆m rĕk hơyuh 'mê̆ tơ̆ tơring Tây Nguyên păng Tơring tơter đak dơsĭ gah Pơbah Tŏk bŏk Việt Nam vă tơgop jang kiơ̆ dôm Tơchơ̆t jang kơ teh đak noh REDD + tơ̆ dêh char Đak Lăk”, đei pơm jang lơ̆m 3 sơnăm (đơ̆ng sơnăm 2025 truh 2028).