Hơdăh, dôm jăl jang đoan lơ̆m dêh char hlôi man đei 17 tŏ hnam 'mêm kơ-eng, hnam kơn chô̆ brê, pơm keh đang 17km tơdrong jang Tơ̆k ang hơdăh trong pơlei pơla, 23 Anih pơchơt ăn đe hơ-ioh; tơgŭm lơ kơtuh săch ăn đe hơ-ioh; xơng, hơmet dôm jĭt tŏ hnam akŏm joh ayŏ, hnam hơkŭm tơpôl. Dôm tơdrong jang “ 'Năr tơdrâu iung jang”, “ 'Năr tơpơh (giĕng) jơk jâ̆p teh đak” đei pơgơ̆r hrơ̆p minh 'măng, hơvơn lơ đoan viên hơdruh tơdăm vang jang vei xơgaih cham char, tơjră hăm hơyuh tô̆ 'mi tơplih tơ̆ dôm tơring.

Yak hadoi pơm jang vei xơđơ̆ng pơyua ăn tơpôl, iung jang kơyuơ kon pơlei, rim jăl jang đoan dêh char hlôi axong ăn hloh 20 rơbâu tơpu tơmam, jê̆ 3.000 suâ̆t jên hŏk, gre tang wang, ăn kon pơlei, ăn đe hơ-ioh; pơgơ̆r khăm hơmet jĭ ưh iŏk jên tơ̆ dôm tơring ataih yaih, tơring tơnap tap. Akŏp kơjă kơ dôm tơdrong iung pơm jang noh hloh 10 ti hlj.