Kơsơ̆ 6/6, tơ̆ hơnih 1187, găh Pơgar bri ‘long kơ teh đak Chư Yang Sin, Hơnih vei lăng Rôih, Dŏng tơgŭm sem bri brăh păng Vei lăng bri Đắk Lắk, jang hơdai hăm Pơgar bri ‘long Chư Yang Sin, anih jang vei lăng Bri ‘long apŭng Krông Bông pơgơ̆r hơchăng 7 tŏ sem tơrong bri brăh kăp gĭt vih hăm cham char bri brăh.

7 tŏ sem tơrong bri ‘noh đei 3 tŏ klăn bơnga (trăp dang 30 kg), 1 pôm klăn tŭng (trăp 14kĭ), 1 pôm đŏk (trăp 8kĭ)  păng 2 tŏ pơnhoăl (trăp 2,6kĭ). ‘Nâu jĭ dôm sem tơrong bri brăh kăp gĭt đei dôm anih jang kơpal lơ̆m dêh char Đắk Lắk krao hơvơn kon pơlei năm pơjao nôp vă hơchăng vih hăm cham char bri brăh. Hloh 1 khei ‘năr vei lăng păng rong ‘me tơ̆ Hơnih vei lăng Rôih, Dŏng tơgŭm sem tơrong păng Vei lăng bri Đắk Lắk, dôm sem bri brăh hlôi pran jăng, vei sơđơ̆ng tơdrong ‘lơ̆ng vă hơchăng vih hơrih lơ̆m cham char bri brăh.