Tơroi tơ̆ hop akŏm, jăl jang âu, Anih chĕp kơ̆l đảng dêh char Dak Lak tơlĕch 6 tơdrong jang tơm, 3 tơdrong jang kăl vă atŏk tơiung mŭk drăm, tơpôl. Hlŏh 2 sơnăm 1 puăt bơ̆ jang truh dang ei, dôm tơdrong jang đei jang lăp hăm nơ̆r hơgăt ngăl. Jang tŏk mŭk drăm tŏk pran, jô̆ păh lăp tŏk 7,07% 1 sơnăm (trong vă jang đơ̆ng 2020-2025 jô̆ păh lăp tŏk 7,01% 1 sơnăm); akŏm đĭ đăng kơjă tơmam jang đei truh 56% nơ̆r hơgăt; tơdrong jang mŭk drăm sơnăm 2023 tŏk 1,2 ‘măng pơtêng hăm sơnăm 2020. 

Hơdai hăm dôm tơdrong jang đei, tơ̆ Hop akŏm, dôm bơngai tang măt hlôi pơma tơƀôh dôm tơdrong tam mă pran ‘lơ̆ng mưh bơ̆ jang Tơdrong tơchơ̆t đơ̆ng Đảng ƀô̆ dêh char Dak Lak ƀât tŏk bŏk jăl jang nhen tơdrong chĕp kơ̆l pơgơ̆r đơ̆ng 1,2 anih chĕp kơ̆l đảng, khul kơdră tơring oei tam mă pran, tam mă tơtom. Tơdrong jang đơ̆ng rim anih jang chinh trĭ ƀât lăp tam mă hrơ̆ch ‘lơ̆ng, tơdrong jang hơdoi tơ̆ tơring tam mă gan ‘lơ̆ng, tơdrong sơđơ̆ng chinh trĭ, sơđơ̆ng lơ̆m tơpôl oei đei lơ tơdrong krê, tơdrong vei lăng bri tơ̆ 1,2 tơring bơ̆ jang tam mă gan ‘lơ̆ng ‘năi…