Xơnăm âu, Đăk Lăk đei hloh 21.100 'nu chih măt pơlong, lơ̆m noh đei hloh 610 'nu kơdih chih măt pơlong. Dêh char Đăk Lăk pơtoi pơkăp 32 anih pơlong tơm hăm 886 lăm pơlong lơ̆m tơring teh kơ 15 apŭng, thĭ xăh păng pơlei tơm. Truh khei năr âu, Anih jang vei lăng kon pơlei dêh char Đăk Lăk hlôi pơjing Jơnŭm pơgơ̆r pơlong tơ̆ dêh char păng pơgơ̆r dôm tơring pơjing Jơnŭm pơgơ̆r pơlong tơ̆ apŭng, thĭ xăh, pơlei tơm; keh đang dôm hla bar chih hơlen, hơmet kơtơ̆ng ang bơngai pơlong kiơ̆ trŏ khei năr tơchơ̆t; hơmet dôm tơdrong kăl găh tơmam drăm anih hơkŏm, bơngai jang ăn 'măng pơlong... Yă H’Yim Kđoh – Phŏ Kơdră Anih jang vei lăng kon pơlei dêh char Đăk Lăk, Kơdră Jơnŭm pơgơ̆r pơlong kơ dêh char pơkăl, rim jăl jang, rim tơring athei hơtŏk kơjăp jang hadoi, kơchăng tơlĕch trong pơlong hơdăh, tơnăp, vei xơđơ̆ng ăn 'măng pơlong gơh đei jơnei trŏ nhen tơchơ̆t tơlĕch. Tơrĕk hloh dơ̆ng truh tơdrong jang tơroi tơbăt găh 'măng pơlong: “Tơroi tơbăt tơtom, tôm tơdrong hơdăh dôm tơchơ̆t kăl tơrĕk truh 'măng pơlong. Mă kăl vei xơđơ̆ng ăn bơngai pơlong tŏ tơring ataih yaih gơh băt tôm kơtơ̆ng ang găh 'măng pơlong vă đei trong tơgŭm ăn đe oh gơh tom băt păng hơmet tơnăp ăn 'măng pơlong”.

Xơnăm hŏk 2022-2023 tơ̆ Đak Lak hlôi pơtôch bơih. 'Nâu adoi jing khei năr mă đe hŏk tro lăm 9 pơtoi rơih jăl trong hơyak ăn kơ po. Pơlong mơ̆t hŏk lăm 10 dôm hnam trưng chwên, nôp hô sơ vă mơ̆t hŏk kiơ̆ tơdrong jang dăh mă rơih hŏk kiơ̆ pơhrăm pơm jang adoi đei tơrĕk truh. Anih jang pơtho pơhrăm Đăk Lăk adoi oei tơgŭm ăn tơdrong jang iŏk bơngai mơ̆t hŏk lăm 10 păng asong tơdrong kăl pơhrăm ăn đe hŏk tro đơ̆ng rŏng kơ hŏk đang trung hŏk kơ sơh.

Hnam trưng THPT Chwên Nguyễn Du, pơlei tơm Buôn Ma Thuột jing minh lơ̆m dôm hnam trưng đei lơ hŏk tro rơih vă chih măt pơlong mơ̆t hŏk. Kiơ̆ tơlĕch jang, xơnăm hŏk 2023-2024, hnam trưng gô iŏk 405 hŏk tro lăm 10, đei 9 lăm chwên păng 2 lăm ưh đei chwên. Khei năr iŏk hô sơ noh đơ̆ng năr  25 truh năr 31/5.  Ƀok Nguyễn Đăng Bồng – Kơdră Hnam trưng THPT chwên Nguyễn Du, dêh char Đăk Lăk ăn tơbăt: “Hŏk tro đei 2 'măng hơlen, mă 1 noh hơlen hô sơ, đe oh athei đei ƀlep 2 tơdrong pơkăp: mă mônh noh găh hŏk pơhrăm păng đon bơnôh lơ̆m 4 xơnăm hŏk athei đei đơ̆ng khă tŏk tơ̆ kơpal păng mă 2 noh tôt ngĭp trŭng hŏk kơ sơh kơ đe oh athei đei jơnei kơluăi khă tŏk tơ̆ kơpal. Ăh mă đe oh đei tôm 2 tơdrong pơkăp âu noh gô đei tơmơ̆t hơlen 'măng mă 2 vă hơkŏm pơlong 4 môn: Toán Ngữ Văn, Nơ̆r teh đak đe păng 1 môn chwên”

Adoi kiơ̆ pơkăp iŏk mơ̆t hŏk lăm 10 xơnăm hŏk 2023 – 2024 kơ dêh char Đăk Lăk, atŭm hăm Hnam trưng THPT chwên Nguyễn Du noh dôm hnam trưng THPT Kon kông hŏk oei hadoi N’Trang Lơng păng Hnam trưng THPT Kon kông hŏk oei hadoi Đam San adoi gô pơkăp pơlong vă rơih bơngai hŏk. Rim hnam trưng THPT kŏng lâ̆p nai noh tơlĕch set twên. Oei hăm dôm hnam trưng THPT, hnam trưng đei lơ jăl hŏk tơ-'ngla pơm tơm, pơkăp iŏk bơngai hŏk kiơ̆ trong kơdih rok kiơ̆ Tơchơ̆t iŏk bơngai hŏk đơ̆ng Anih jang vei lăng kon pơlei dêh char.

Hăm đe oh đơ̆ng rŏng hŏk đang trung hŏk kơ sơh mă ưh đei tôm ƀlep nhen pơkăp mơ̆t hŏk dôm hnam trưng THPT noh adoi oei đei lơ tơdrong rơih ƀơ̆t dôm anih jang pơtho tơdrong jang tơ̆ dêh char đei tôm tơdrong pơkăp hŏk pơhrăm hadoi hăm hŏk tơdrong jang. Ƀok Đỗ Tường Hiệp, Phŏ Kơdră Anih Pơtho Pơhrăm Đăk Lăk ăn tơbăt: Tơdrong asong tơdrong hŏk ăn đe hŏk tro đơ̆ng rŏng kơ hŏk đang Trung hŏk kơ sơh tơ̆ Đăk Lăk noh lơ hloh, đei truh 80% lơ̆m kơsô̆ hŏk tro lăm 9: “Hăm dôm hŏk tro ưh đei vei xơđơ̆ng vă chă hŏk pơhrăm lơ̆m dôm hnam trưng trung hŏk phôh thŏng, dôm anih pơtho tơdrong jang, yăo yŭk tương xwên noh tơroi găh tơdrong jang ăn đe oh gô akŏm hŏk tơ̆ dôm hnam trưng pơtho tơdrong jang, hnam trưng trung kâ̆p, kao đẳng păng đei dôm tơdrong rơih ăn kơdih po. Kơyuơ noh tơdrong jang pơtho pơm jang lơ̆m hnam trưng đei hơtŏk pran vă pơtho ăn đe oh pơyua lơ̆m tơdrong hơrih păng hŏk pơhrăm, ưh kơsĭ hơdrô̆ đei hnam trưng THPT mă hăm lơ trong jang nai noh adoi gơh hŏk pơhrăm tơnăp păng đei tơdrong hơrih xơđơ̆ng khei năr anô̆ anăp kơnh”.

Lơ̆m dôm xơnăm kơ âu, dôm hnam trưng trung hŏk păng Anih Yăo yŭk thương xwên  tơ̆ Đăk Lăk jang hadoi kơjăp lơ̆m tơdrong pơtho tơdrong jang ăn đe hŏk tro. Rim xơnăm đei pơhlom 3.000 'nu bơngai hŏk găh yăo yŭk thương xwên, đơ̆ng 30.000 truh 35.000 'nu kiơ̆ hŏk đei pơtho tơdrong jang, hŏk tơdrong jang kiơ̆ tơdrong gơh jang kơ po, tơdrong lăp đơ̆ng kơdih po păng tơdrong kăl lơ̆m tơring pơm jang. Tơdrong pơtho pơhrăm tơguăt hăm pơtho tơdrong jang tơ̆ dôm anih pơtho Yăo yŭk thương xwên đei tơlĕch jang, tơgop kăp gĭt lơ̆m pơkăp asong tơdrong kăl pơhrăm ăn đe hŏk tro đơ̆ng rŏng hŏk đang THCS kiơ̆ Tơchơ̆t jang “Yăo yŭk thương xwên păng tơchơ̆t asong tơdrong kăl pơhrăm ăn đe hŏk tro lơ̆m pơtho hŏk phôh thŏng jăl xơnăm 2018-2025”.