Kiơ̆ tơbăt tơ̆ hop akŏm, lơ̆m 6 khei blŭng sơnăm, mŭk drăm tơpôl dêh char Đak Lăk đei sơđơ̆ng ƀiơ̆ bơih. Kơjă tơmam drăm pơm tơlĕch tĕch mơdro lơm dêh char iŏk đei vă jê̆ 24.500 ti hlak jên, tŏk 4% pơtêng hăm sơnăm 2022. Akŏp kon jên tĕch mơdro tơ̆ teh đak đe iŏk đei 810 triu dolar, tŏk 2% pơtêng hăm khei au sơnăm sơ̆. Mă lei, akŏp kon jên thuê̆ ăn hơnih mong jên bơ̆ jang teh đak tơjur 16,6% pơtêng hăm khei au sơnăm sơ̆. Găh tơlĕch jên tơmơ̆t jang đơ̆ng teh đak lăp jơnei 18,1% trong pơprŏ jang dêh char ...

Ƀok Phạm Ngọc Nghị, Kơdră chĕp pơgơ̆r Hơnih vei lăng kon pơlei dêh char Đak Lăk athei kơdră chĕp pơgơ̆r rim hơnih bơ̆ jang tơring tơrang iung jang kơtang hloh dơ̆ng lơ̆m hơlen, tơchă băt tơdrong tơm pơm ăn păng tơlĕch trong jang hơmet pơ ‘lơ̆ng rim “hơnih tơhlăk tơhlĭn” lơ̆m hơvơn tơmơ̆t jên jang, pơtrŭt kơtang tơmang pơhiơ̆ ... vă iŏk đei rim trong tơlĕch jang atŏk tơ iung mŭk drăm tơpôl 6 khei hơtuch sơnăm. Mă kăl, rim hơnih jang, tơring kăl hơmet pơ ‘lơ̆ng, xek tơklang hloh tơdrong chă tơpŭ dih băl hơnăp jang vă bơ̆ jang keh đang tĕnh koăng rim tơdrong jang.