Dang ei, anih jang unh điên Đắk Lắk oei vei lăng hlŏh 130.200 tŏ jrăng unh điên đei tơlei kap roi tơbăt chô̆ hơdai. Công ty hlôi tơlĕch jên pơdơ̆ng, hơtŏk ming jrăng unh điên păng pơm ‘lơ̆ng găh ki thuơ̆t, vei lăng sơđơ̆ng tơlei unh điên. Mă lei, tơdrong chô̆ tơlei kap roi tơbăt tơ̆ jrăng unh điên kư̆ kă hlôi pơm tơlĕch lơ tơdrong krê.

Dôm sơnăm âu ki, anih jang unh điên Đắk Lắk hơnơ̆ng pơgơ̆r hơmet ming, pơpôi chô̆ hơmet tơlei kap dăng hơdoi tơ̆ jrăng unh điên. Trong jang lơ̆m sơnăm 2024, công ty hơnơ̆ng hơmet pơ ‘lơ̆ng hlŏh 46 km tơlei kap roi tơbăt đei chô̆ hơdoi tơ̆ jrăng unh điên lơ̆m tŏk bŏk plt Buôn Ma Thuột, thĭ xăh Buôn Hồ păng dôm apŭng Krông Pach, Buôn Đôn, Krông Năng, Cư M’gar, Ea Kar. Mă hơdăh ‘nŏh kăt hŭt lê̆ tơlei kap kơtĕch, ưh pă đei yoa, hơdrom chô̆ hơmet tơlei kap rơkăh, dui tơtăng dơ̆ng tơlei kap rơdu.