Tơlĕch jang dôm tơdrong hơgăt khôi luơ̆t găh teh, dêh char Đắk Lắk dăr hơlen đei hloh  188.000hek tar teh đơ̆ng dôm mir đak lar găh teh pơjao ăn apŭng vei lăng. Mă đơ̆ng thoi noh ră, truh khei 7/2024, dêh char ‘nao lăp kĭ ăn đei 2 trong jang iŏk yua teh đei tơm a đơ̆ng choh jang sa, mir đak lar yua đơ̆ng Anih vei lăng kon pơlei dôm apŭng, thị xăh, pơlei tơm pơjing, 20 trong jang uơ oei dơ̆ng tŏk bŏk lơ̆m jăl jang hơmet ming, tơmơ̆t dơ̆ng pơ ‘lơ̆ng, tam mă pơtruh kĭ ăn.

Ƀok Nguyễn Thiên Văn, Phŏ Kơdră Anih vei lăng kon pơlei dêh char Đắk Lắk tơbăt, tơdrong pơ hiơ̆ kĭ ăn dôm trong jang iŏk yua teh hăm hơgăt teh đei tơm a đơ̆ng choh jang sa, mir đak lar ƀơm ưh kơ ‘lơ̆ng truh sơng iŏk tơmơ̆t jên jang, vei sơđơ̆ng tơdrong hơrih sa tơpôl, hơtŏk tơiung mŭk drăm tơ̆ tơring. Yua thoi noh, vă Luơ̆t teh 2024 yak mơ̆t lơ̆m yan âu, hơmet pơ ‘lơ̆ng đei yua dôm tơdrong ƀơm truh hloh 1 puăt triệu héc-ta teh đei tơm a đơ̆ng choh jang sa, mir đak lar, athei đei tơdrong jang hơdai kơjăp đơ̆ng rim anih jang păng khŭl kơdră chĕp kơ̆l tơ̆ apŭng.