Pơgê năr 18/5, Anih jang tuyên yăo Tỉnh ủy Dak Lak pơgơ̆r hơpăh ăn tak phâm văn hŏk, joh ayŏ kơdŏ suang, ƀăo chĭ hơgei hloh chih găh tơdrong “Hŏk pơhrăm păng pơkiơ̆ đon bơnôh, trong jang ‘lơ̆ng Hồ Chí Minh”, ‘măng mă 1 (2021-2023). Đei 28 tak phâm hơgei hloh đei iŏk hơpăh lơ̆m ‘măng âu. Đơ̆ng rŏng 2 sơnăm tơlĕch, Tơmam hơpăh chih pơcheh âu vă tơroi găh tak phâm văn hŏk, joh ayŏ kơdŏ suang, ƀăo chĭ găh tơdrong Hŏk pơhrăm păng pơm kiơ̆ đon bơnôh, trong jang ‘lơ̆ng Hồ Chí Minh dêh char Dak Lak ‘măng mă 1 hlôi đei vă jê̆ 100 tak phâm đei tơmơ̆t châ̆m hơlen ăh ‘măng hơtuch.

Dôm tak phâm đei asong jĭ 3 tơdrong noh văn hŏk đei (tơroi kơđeh, nơ̆r pơđơ̆k, ƀai chih tơroi tơbăt), găh joh ayŏ noh đei (tông, pơm phim, tơdra hơri, mi thuơ̆t) păng ƀăo chĭ đei (ƀăo in, ƀăo rŭp). Kiơ̆ tơchơ̆t đơ̆ng jơnŭm pơgơ̆r, mă lơ noh tak phâm pơtruh pơlong adoi ‘lơ̆ng, lơ tơdrong, đei hloi tơdrong pơtho pơhrăm. Jơnŭm pơgơ̆r pơlong rơih pôk hơpăh hăm  28 tak phâm hơgei hloh, đei 1 hơpăh A, 5 hơpăh B, 10 hơpăh  C păng 12 hơpăh pơtrŭt jơhngơ̆m.