‘Nâu jĭ 1 lơ̆m dôm tơdrong jang chă hơpăh Tơmam têt ‘mêm mơnat Pơyan puih mak Giáp Thìn. Tơ̆ âu, anih pơgơ̆r hơpăh 100 tơpu tơmam, 1 tơpu đei kơjă 500 rơbâu hlak jên (đei 200 rơbâu jên măt păng dôm tơmam yoa kăl hai). Yă Ayun H’Hương, Kơdră Jơnŭm ‘long pơglang ƀrê dêh char Đắk Lắk ăn tơbăt: tơdrong jang iŏk đei đon pơngơ̆t, vang tơgŭm tôch pơnĕh đơ̆ng dôm anih tech mơdro, khul grŭp, rim bơngai lơ̆m păng ‘ngoăih kơ dêh char.

Truh dang ei, đĭ mong akŏm đei hlŏh 2.600 tơpu tơmam, akŏm đĭ đăng đei kơjă vă jê̆ 1,3 ti hlak jên. Tơdrong jang vă bơ̆ jang truh đĭ ‘năr 4/2 âu kơnh vă tơiung jơhngâm hưch hanh kơ têt ăn rim bơngai, mă loi jĭ hăm dôm bơngai pơmat tat, ưh pŭn ai lơ̆m tơpôl.