Năr 30 khei 12 sơnăm 2023, Thủ tướng teh đak hlôi kĭ pơkăp atŭm dêh char Đăk Lăk lơ̆m jăl jang 2021-2030, sơkơ̆t jang truh 2050. Kiơ̆ tơchơ̆t, sơnăm 2030 dêh char Đăk Lăk jing anih kăp gĭt, hơvơn lơ tơmoi lơ̆m teh đak păng đơ̆ng teh đak đe truh tơmang; pơlei tơm Buôn Ma thuột jing minh anih hơtŏk tơ-iung kơ tơring Tây Nguyên, jang hadoi păng tơroh kiơ̆ trong hiôk hăm tơring păng lơ̆m apŭng plenh teh; hơtŏk pran tơplih jang mŭk drăm kiơ̆ trong hơgei hloh, hơtŏk tơ-iung kơjăp sơđơ̆ng. Lơ̆m noh, hơdrin hơtŏk rim sơnăm đơ̆ng 2021 - 2030 noh 11% minh sơnăm, tơdrong pơyua GRDP hăm rim bơngai jang truh sơnăm 2030 đei jơnei hloh 130 trĭu hlj.

Dôm tơchơ̆t âu đei sơkơ̆t noh trŏ ƀlep kiơ̆ tơdrong tơgop đơ̆ng lơ bơngai juăt jang, bơngai jang khua hŏk, kơdră kơ dôm anih jang, rim tơring păng tôm kon pơlei pơla lơ̆m dêh char. Ƀok Võ Ngọc Tuyên, Kơdră Anih Asong jang dêh char Đăk Lăk ăn tơbăt: “Pơkăp dêh char Đăk Lăk noh tơbang đei tơdrong jơnei gah kơ̆l ‘ngok hơgei kơ khul jang, sơnong jang kơ tôm anih jang chĭnh trĭ păng kon pơlei lơ̆m dêh char. Mă 2 noh gơh akhan pơkăp dêh char Đăk Lăk ‘măng mă âu đei pơgơ̆r tơnăp, kơchăng, tơguăt hăm dôm tơchơ̆t jang kơ teh đak, hơlen chih akŏm rơih iŏk dôm tơdrong hlôh vao đơ̆ng teh đak đe păng lơ̆m teh đak, iŏk yua trŏ ƀlep tơdrong đei ƀôh tơ̆ tơring kiơ̆ đơ̆ng noh iŏk jang tơnăp mŭk drăm hlôi đei păng băt hơdah tơdrong tơnap tap lơ̆m khei năr truh. Đơ̆ng noh tơlĕch sơnong jang, trong jang vă hơmet jang tơnăp tơdrong pơkăp jang”

Sơkơ̆t jang truh sơnăm 2050, Đăk Lăk jing dêh char đei cham char ‘lơ̆ng tơguăt hăm joh ayŏ, tơroh gơh hơgei, jing anih truh tơmang ‘lơ̆ng lăp hloh. Hơtŏk lơ̆m grŭp 25 dêh char hơtŏk tơ-iung pran kơ jâ̆p teh đak. Pơlei tơm Buôn Ma Thuột noh “Pơlei tơm kaphê apŭng plenh teh”, anih tơm kơ tơring kơdrâ̆m, anih tơm joh ayŏ, vei rong lơ cham char ‘lơ̆ng kơ tơring Tây Nguyên păng lơ̆m tơring kơlang 3 hơtŏk tơ-iung Việt Nam – Lào – Campuchia, anih tơm hơlen khua hŏk păng trong choh jang xa ‘nao đơ̆ng apŭng plenh teh. Vă jang keh tơdrong âu, kiơ̆ kơ ƀok Vũ Văn Hưng, Kơdră Anih jang vei lăng kon pơlei pơlei tơm Buôn Ma Thuột, dêh char Đăk Lăk noh: “Kiơ̆ tơdrong pơkăp kơ dêh char, pơlei tơm Buôn Ma Thuột gô drŭt tenh hơmet pơkăp atŭm kơ pơlei tơm Buôn Ma Thuột kiơ̆ tơchơ̆t đơ̆ng Thủ tướng hlôi asong. Atŭm hăm noh tơlĕch pơm kiơ̆ Tơchơ̆t 07 đơ̆ng Thủ tướng gah iŏk yua trong jang kăp gĭt hăm pơlei tơm Buôn Ma Thuột tơ̆ minh ƀả tơdrong jang kăp gĭt hlôi tơroi hăm Anih jang vei lăng kon pơlei dêh char vă pơtruh ăn Anih juăt jang Tĭnh uy vă đơ̆ng noh gô tơlĕch pơm kiơ̆ dôm hơyak đơ̆ng rŏng. Mă 2, kiơ̆ kơ tơdrong pơkăp atŭm noh pơlei tơm gô chih hơnăn asong jang vă tơroi hăm dêh char tơmơ̆t lơ̆m hơnăn asong jang lơ̆m pơlei tơm, gô đei hơtŏk vei lăng teh ming man vă vei lăng tơnăp dôm tơdrong jang hlôi đei kĭ lơ̆m pơkăp. Kiơ̆ đơ̆ng noh pơm trong hiôk ăn dôm anih asong jang păng dôm anih pơgơ̆r pơm kiơ̆ pơkăp ning nai kơnh”.

Kiơ̆ kơ ƀok Nguyễn Tuấn Hà, Phŏ Kơdră juăt jang kơ Anih jang vei lăng kon pơlei dêh char Đăk Lăk, dôm tơchơ̆t tơlĕch jang đunh sơnăm lơ̆m Pơkăp kơ dêh char noh tơdrong jang chĭnh trĭ, khôi lươ̆t pơkăp kơjăp pơih trong jang ‘nao, ăn hơtŏk tơ-iung tenh păng kơjăp sơđơ̆ng. Vă kơchăng sơng dôm trong jang hiôk, dêh char hlôi tơlĕch 4 sơnong jang tơm noh jing: hơmet pơ-‘lơ̆ng dôm tơdrong choh jang xa, jang kŏng ngĭp; hơtŏk tơring kơdrâ̆m; iŏk yua trŏ ƀlep mŭk drăm cham char; hơtŏk tơguăt dôm tơring, dôm dêh char; păng 5 tơdrong tơ-iung noh: hơmet pơ-‘lơ̆ng hanh chĭnh, cham char asong jang tĕch pơdro; hơmet pơ-‘lơ̆ng trong nơnăm; hơtŏk iŏk yua khua hŏk trong jang ‘nao păng tơplih gơh hơgei; pơm hơtŏk dơnơm gah pơtho pơhrăm păng hơmet jĭ jăn; ming man anih jang hnam oei kiơ̆ trong ‘nao kơjăp. Ƀok Nguyễn Tuấn Hà ăn tơbăt:  “Thủ tướng teh đak kĭ tơchơ̆t pơkăp dêh char Đăk Lăk hlôi pơih dôm trong hiôk vă hơtŏk tơ-iung ‘nao hăm sơkơ̆t kơjă kăp gĭt ‘nao ăn dêh char. Kiơ̆ tơdrong vei lăng trŏ ƀlep tơnăp dôm mŭk drăm teh, mŭk drăm cham char, tơmo kăp gĭt, bri kơdrơ̆ng, đak ăn tơdrong hơtŏk tơ-iung kơjăp sơđơ̆ng, hơtŏk tơ-iung pơtrŏ hăm hơyuh tŏ ‘mi tơplih, tơtom băt dôm trong hiôk lơ̆m teh đak păng đơ̆ng teh đak đe, mă kăl noh tơdrong jang kăch mang kŏng ngĭp ‘măng mă 4, vă dah tom kiơ̆ trong jang tơplih kơsô̆ hơ-‘nhăk Đăk Lăk hơtŏk tenh kơjăp sơđơ̆ng păng hơyak ah anih dơ̆ng ‘nao”

Tây Nguyên đei hơnih dơ̆ng kăp gĭt gah chĭnh trĭ, mŭk drăm, joh ayŏ, sơđơ̆ng tơpôl jang hadoi lơ̆m jâ̆p teh đak. Lơ̆m noh, Đăk Lăk đei jing anih tơm kơ tơring Tây Nguyên. Tơ̆ hop akŏm tơbang tơchơ̆t pơkăp dêh char Đăk Lăk ‘nao âu, minh ‘măng dơ̆ng Phŏ Thủ tướng Trần Hồng Hà sơkơ̆t, Đăk Lăk đei anih dơ̆ng kăp gĭt, pơdrŏng gah mŭk drăm cham char, đei lơ um ai joh ayŏ. Pơkăp dêh char Đăk Lăk jing minh hơyak hơdah vă pơm kiơ̆ trong tơlĕch jang tih đơ̆ng Anih tơm Chĭnh trĭ ah Tơchơ̆t kơsô̆ 23 gah trong jang hơtŏk mŭk drăm – tơpôl păng vei sơđơ̆ng tơpôl tơring Tây Nguyên truh sơnăm 2030, sơkơ̆t truh sơnăm 2045. Kơyuơ noh, Phŏ Thủ tướng Trần Hồng Hà pơkăl:  “Sơnong jang mă blŭng lơ̆m sơnong jang pơkăp noh jing tơdrong gô jang hăm dôm tơring nai kơ Tây Nguyên hơlen pơkăp tơring Tây Nguyên, tơdrong mă âu jing kăp gĭt tơpă. Kơlih gô ƀôh lơ̆m um rŭp Đăk Lăk  lơ̆m tơroh hăm dôm tơring dih băl. Ƀôh đei anih dơ̆ng dơnơm kơ Đăk Lăk lơ̆m tơdrong tơroh hăm dôm tơring tơ̆ Tây nguyên, hăm dôm tơring tih să nhen tơring tơter đak dơsĭ tŏk bŏk, hlĕch pơbah dah mă apŭng plenh teh nhen Campuchia păng dôm teh đak hơlĕch pơbah nai. Atŭm hăm tơdrong hơtŏk kơ tơring nhôn kơchĕng, gô pơjing đei minh Tây Nguyên đei mŭk drăm ang hơdah hơtŏk tenh kuăng”

Jah vă akhan, tơdrong sơkơ̆t, băt hơdah păng iŏk jang tơnăp dôm mŭk drăm atŭm hăm pơkăp atŭm kơ dêh char, Đảng ƀô̆, jơnŭm pơgơ̆r tơring, kon pơlei kon kông dêh char Đăk Lăk gô pơtoi hơtŏk tơdrong pran, pơgenh iŏk tơdrong tơgŭm đơ̆ng ‘nguaih vă pơjing jơhngơ̆m pran hơtŏk tơ-iung đơ̆ng  “sơnăm ‘Nă Grai 2024” hơtŏk mŭk drăm tơpôl kơ dêh char tŏk pran, hơtŏk tenh păng kơjăp sơđơ̆ng kiơ̆ jăl trong jang ‘nao.