Năr hơtuch khei 10, văjê̆ 20 ‘nu kăn ƀô̆, linh Kanh sat tang găn, pĭt unh xa păng dŏng tơgŭm Công an dêh char Đắk Lắk kŭm hăm bơngai tang măt dôm unh hnam akŏm ƀât Cham hnam B Hoàng Anh, trong Nguyễn Công Trứ, plt Buôn Ma Thuột vă pơhrăm pĭt unh, hăm tơdrong pơtih đei unh xa tơ̆ kơpal tơ̆ng kơjung. Dôm bơngai truh pơhrăm đei pơtho tơƀôh trong iŏk yoa kơ ƀĭnh pĭt unh, đing pruih đak, iŏk yoa kung tơlei vă dŏng dôm bơngai oei đom tơ̆ anih unh xa, hơmet ăn dôm bơngai răm… 

Ƀok Bùi Huy Phước – Dơ̆ng tang ăn Khul vei lăng Hnam oei hơdai Hoàng Anh ăn tơbăt, rim sơnăm anih jang hơnơ̆ng pơgơ̆r roi tơƀôh, pơtâp pơhrăm trong tang găn, pĭt unh xa păng dŏng bơngai răm ăn rim unh hnam arih xa lơ̆m Hnam oei hơdai. ‘Ngoăih kơ ‘nŏh oei roi tơbăt, krao hơvơn rim bơngai pơm kiơ̆ mă ‘lơ̆ng dôm tơdrong hơgăt păng chô̆ hơmet mă tôm dôm kơmăy, tơmam tang găn, pĭt unh xa: “Khul vei lăng Hnam oei hơdai jang hơdoi hăm Khul linh tang găn, pĭt unh xa mă mônh chă roi tơbăt, mă 2 ‘nŏh athei rim unh hnam đei hang lơng găh rŏng, ưh đei ‘măng kơdâu lĕch mưh đei unh xa, jăh pơm ming ‘măng. Brei drou lơ unh hnam tơ̆ âu pơm bơih, oei pă 1,2 unh hnam tam mă pơm ‘nŏh jĭ dôm unh hnam oei hrŭl nhôn vă hơnơ̆ng krao hơvơn, athei đe sư pơm mưh đe sư vih, vă mưh đei tơdrong ‘nŏh bơ̆n gơ̆h kơdâu lĕch sơđơ̆ng ‘lơ̆ng ăn kơdih kâu păng unh hnam”.

‘Nhŏng Nguyễn Tuấn Anh, 1 ‘nu bơngai arih xa tơ̆ Hnam B Hoàng Anh – Buôn Ma Thuột đơ̆ng vă jê̆ 10 sơnăm ‘nâu tơroi, tơdrong kon pơlei đei pơtho tơƀôh, pơtâp pơhrăm ăn trong tang găn unh xa tơ̆ Hnam oei hơdai lơ tơ̆ng ‘nŏh tôch gĭt kăl. Vă mưh ưh pŭn đei unh xa, rim bơngai gơ̆h chơ̆n jơhngâm, iŏk yoa tơdrong đei pơtâp vă vei lăng kơdih kâu, vang jang hăm khul jang kơpal tơjră hăm unh xa păng tơgŭm ăn rim bơngai lĕch vĕh tơ̆ nai.

‘Nhŏng Nguyễn Tuấn Anh ăn tơbăt: “Unh hnam nhôn oei adrin truh hăm tơdrong pơtâp pơhrăm, păng chă răt bơ̆n tơmam, kơmăy kơdih vă tang găn unh hnam, vă mưh đei unh xa ‘nŏh gơ̆h pĭt găn păng kơdâu lĕch. Inh ƀôh tơdrong pơtâp pơhrăm trong tang găn unh xa âu tôch đei yoa tơpă, kŭm hơpơi ‘mĕh đĭ đăng kon pơlei oei xa tơ̆ Hnam oei hơdai vang truh akŏm ‘năi vă Khul tang găn, pĭt unh xa păng dŏng tơgŭm bơngai răm pơtâp ăn, tơgŭm ăn đe sư hơtŏk ƀiơ̆ đon hlôh vao, mưh đei unh xa ‘nŏh vang jang hơdai, pĭt unh xa păng kơdâu lĕch sơđơ̆ng ‘lơ̆ng.”

Nơ̆r tơroi đơ̆ng khul linh Kanh sat tang găn, pĭt unh xa păng dŏng tơgŭm bơngai răm, Công an Đắk Lắk, đơ̆ng tŏk bŏk khei 12/2022 truh dang ei, tơ̆ Đắk Lắk đei 17 ‘măng unh xa, pơm ăn 1 ‘nu bơngai lôch, dôm jĭt ‘nu bơngai rơka, hiong răm găh tơmam hlŏh 5,55 ti hlak jên. Kơsô̆ unh xa pơtêng hăm khei âu sơnăm sơ̆ jur 03 tơdrong, mă lei hiong răm ‘nŏh roi tŏk, kơsô̆ bơngai rơka roi lơ. Khul jang kơpal hlôi pơgơ̆r roi tơƀôh luơ̆t, đon hlôh vao găh tang găn, pĭt unh xa păng dŏng bơngai răm ăn rơbâu ‘nu bơngai; pơih 101 lăm pơtâp pơhrăm tang găn, pĭt unh xa păng dŏng tơgŭm bơngai răm ăn dang 9.300 ‘nu bơngai jang lơ̆m khul tang găn, pĭt unh xa tơ̆ tơring…    

Trung tá Phùng Việt Đức – Phŏ Kơdră Anih Kanh sat tang găn, pĭt unh xa păng dŏng tơgŭm bơngai răm, Công an dêh char Đắk Lắk akhan, tơdrong rơbâu ‘nu bơngai đei roi tơbăt, pơtâp pơhrăm tang găn, pĭt unh xa păng dŏng bơngai răm gô pơm hơtŏk đei đon hlôh vao păng trong jang ƀơm truh tơdrong tang găn, pĭt unh xa, kơdâu lĕch đơ̆ng unh xa kŭm nhen trong hơmet ăn bơngai răm blŭng a. Đơ̆ng noh, pơm tơjur ƀiơ̆ hiong răm găh bơngai păng tơmam lơ̆m dôm ‘măng unh xa.

Trung tá Phùng Việt Đức ăn tơbăt: “Kiơ̆ đơ̆ng dôm tơdrong pơtâp pơhrăm tang găn, pĭt unh xa, kon pơlei păng đe hŏk tro, sinh viên, bơngai jang hlôh vao ƀiơ̆ hơnăp jang đơ̆ng kơdih lơ̆m tơdrong tang găn, pĭt unh xa păng băt hơdăh dôm tơdrong kăl găh tang găn, pĭt unh xa hăm hnam oei hơdrô̆, hnam tơpôl, dôm Hnam oei hơdai dăh mă tơ̆ ký túc xá kơ đe ŏh hŏk tro, sinh viên. Kiơ̆ đơ̆ng âu, băt hơdăh dôm trong tang găn, pĭt unh xa mă loi jĭ tơdrong hơmet pơ ‘lơ̆ng mưh đei unh xa đôh.”

Unh xa, đôh ‘nŏh jĭ tơdrong đei ưh ê, ưh đei bu ‘mĕh, sư gơ̆h đei rim jơ năr. Tơdrong hlôh vao kơjăp, sơđơ̆ng jơhngâm mưh tang găn, pĭt unh xa ƀât ‘nao dơ dă đei hloi kŭm nhen hơmet ‘lơ̆ng rim trong kơdâu lĕch mưh đei unh xa ‘nŏh jĭ tơdrong tôch gĭt kăl hăm rim bơngai. Đơ̆ng noh, gơ̆h găn tôch ai tơdrong hiong răm găh bơngai păng tơmam drăm mưh đei unh xa.