Dak Lak dang ei đei 2 tơdrong jang FDI yua đơ̆ng bơngai tơmơ̆t jên jang Nhật Bản bơ̆jang. Hơdai hăm ‘noh, Anih jang hơdai apŭng plĕnh teh Nhật Bản (JICA) hlôi tơgŭm ăn dêh char Dak Lak bơ̆jang kiơ̆ 21 tơdrong jang ODA hăm akŏp jên hloh 24 triệu USD, akŏm lơ̆m dôm tơdrong jang ŭnh điên, trong nơnăm, pơtruh đak păng dơnâu mong đak. Đơ̆ng sơnăm 2001 truh dang ei, dêh char hlôi sơng iŏk 22 tơdrong tơgŭm ‘ngoăih kơ khŭl kơdră teh đak đơ̆ng 3 anih tơgŭm Nhật Bản hăm akŏp kơjă hloh 1,6 triệu USD. Dôm anih mơdro sa kơ Dak Lak dang ei tĕch tơlĕch tơ̆ anih tĕch mơdro Nhật Bản lơ tơmam nhen cheh phe găr, cheh phe hach, sal kơ drot, ca cao, mắc ca.

Lơ̆m 5 sơnăm âu ki, Khŭl tơbôl Việt Nam – Nhật Bản dêh char Dak Lak hlôi tơgoăt hơdai, krao hơvơn tơgŭm ưh kơ đei đơ̆ng khŭl kơdră teh đak kơ teh đak đe hăm akŏp jên vă jê̆ 4 ti 600 triệu hlak jên. Tơ̆ hop akŏm, Khŭl tơbôl Việt Nam – Nhật Bản dêh char Dak Lak jăl jang 2023-2028 băt hơdăh, lơ̆m jăl jang truh, Khŭl akŏm hơtŏk loi dơ̆ng roi tơbăt jang tơbôl, hơtŏk ‘lơ̆ng đei yua dôm tơdrong jang rơngei, tơgoăt tơgoăl, tơbôl păng jang hơdai Việt Nam – Nhật Bản tơ̆ tơring; hơnơ̆ng hơtŏk ‘lơ̆ng đei yua dôm tơdrong jang tơgŭm đơ̆ng teh đak đe.