Kiơ̆ tơroi ah Hop akŏm, đơ̆ng sơnăm 2021 truh dang ei, Đăk Lăk hlôi ƀôh băt, rôp vei jê̆ 1 rơbâu ‘măng glăi hăm hloh 1.400 ‘nu bơngai pơm glăi luơ̆t pơkăp gah ma tuý; thu iŏk hloh 3 kĭ heroin păng jê̆ 6 kĭ ma tuý kơluăi nai. Jâ̆p dêh char đei 445 ‘nu bơngai et glăi kơchơ̆t ma tuý, 866 ‘nu gronh et ma tuý đei hô sơ vei hơlen. Lơ̆m 3 sơnăm, tơlĕch jang kiơ̆ Tơdrong jang, kơjăp lơ̆m tơroi tơbăt tang găn păng tơjră ma tuý đei hơtŏk. Lơ tơdrong chă tơroi tơbăt đei iŏk jang.

Ah pơma đam, rim bơngai tang măt akhan, tơdrong pơm glăi ma tuý roi năr roi tơnap kơ băt, tơdrong tơroi tơbăt hơvưn kon pơlei kơchăng, tơjră hăm tơdrong glăi ma tuý duh athei đei hơtŏk păng đei tơdrong tơplih mă trŏ ƀlep. Lơ̆m noh, athei iŏk tơdrong tơgŭm đơ̆ng đe kră pơlei, kơdră pơlei, bơngai đei kon pơlei lui yom păng dôm bơngai pơgơ̆r dôm tơdrong khop vă tơroi ăn kon pơlei băt gah tơdrong kơnê̆ đơ̆ng pơm glăi ma tuý.