Yă H’Hương H’Wing, bơngai Rađe, tơ̆ plei M’Blốc B, xăh Krông Jing, apŭng M’Drắk, dêh char Đắk Lắk lơ sơnăm hloi đei pôk pơm Bí thư Chi ƀô̆. Kŭm hăm tơdrong tơroi tơbăt, krao hơvơn kon pơlei bơ̆ jang ‘lơ̆ng dôm trong jang đơ̆ng Đảng păng tĕh đak, yă H’Hương oei jing 1 ‘nu bơngai jang rơgei lơ̆m tơdrong tơplih ming kon tơrong, ‘long pơtăm, jang atŏk tơiung mŭk drăm lơ̆m unh hnam.

Yă tơroi, gơnơm vang truh hăm dôm tơdrong pơtho pơhrăm pơhlôh đon ăn kăn ƀô̆ tơ̆ tơring kon kông, mă yă hŏk đei lơ tơdrong hơiă, đei yoa vă pơvih ăn tơdrong jang kơdih kâu: “Tơdrong jang sut pơđĭ pơngot, tơjur tơnuh hin lơ̆m pơlei jĭ 1 tơdrong jang tôch gĭt kăl. Pơlei hơnơ̆ng akŏm jơ hngâm jang kiơ̆ tơdrong tơchơ̆t đơ̆ng Kơdră pơgơ̆r, pơtho ăn đe kăn ƀô̆ athei hơnơ̆ng oei xa hơdai hăm kon pơlei, oei jê̆ kon pơlei, pơtho ăn kon pơlei jang atŏk tơiung mŭk drăm, tơpôl, băt tơmât yoa khoa hŏk ki thuơ̆t lơ̆m tơdrong rong rơmo, rong nhŭng. Băt choh jang rei pơtăm trŏ pơyan, dar dĕh vă pơlei pơla gơ̆h sut đei tơdrong tơnuh hin”.

Gơnơm hlôh vao hơdăh tơdrong arih xa, tơdrong juăt đơ̆ng kon pơlei, hăm tơdrong, mưh tơchĕng ‘nŏh jang hloi, chu pŭ hơnăp jang đơ̆ng kơdih, đe kăn ƀô̆ đảng viên bơngai kon kông hlôi jang ‘lơ̆ng tơdrong jang đei pơjao. Kiơ̆ đơ̆ng noh, vang tơgop vei kơjăp tơdrong sơđơ̆ng tơ̆ tơring, hơtŏk tơdrong jang tơjur tơnuh hin, atŏk tơiung mŭk drăm, tơpôl tơ̆ tơring.

Ƀok Trần Hồng Tiến, Bí thư đảng apŭng Krông Pach akhan: “Hăm kăn ƀô̆, nhôn chă rơih đe kăn ƀô̆ oei mơlôh, bơngai kon kông kơtă tơ̆ tơring, gơ̆h hơgei vă ăn bơ̆ jang dôm kơchư̆k gĭt kăl tơ̆ tơring, blŭng a kŭm ƀôh lơ tơdrong ‘lơ̆ng, nhôn ƀôh lơ bơngai đei rơih ‘nŏh jang ‘lơ̆ng dôm tơdrong đei pơjao păng đei kon pơlei lui yom”.

Lơ̆m dêh char Đắk Lắk hrei ‘nâu, kơsô̆ kăn ƀô̆, bơngai jang ăn tĕh đak jĭ bơngai kon kông đei hlŏh 13%. Tiến sĩ Nguyễn Thành Dũng, Hiê̆u trơng Hnam trưng Chinh trĭ dêh char Đắk Lắk ăn tơbăt, đe kăn ƀô̆ bơngai kon kông đei pơtho pơhrăm vă hơtŏk đon hơgei, jang gơ̆h păng hlôh vao chinh trĭ: “Lơ̆m 10 sơnăm âu ki, kơsô̆ bơngai hŏk đei hlŏh 25.000 ‘nu bơngai, lơ̆m noh bơngai kon kông đei hlŏh 4.500 ‘nu. ‘Nâu jĭ tơdrong jang đei mưh pơtho pơhrăm đơ̆ng hnam trưng vang tơgop ‘lơ̆ng ăn tơdrong pơtho, pơjing khul jang rơgei, tơgŭm ăn khul chĕp kơ̆l đảng tơ̆ rim anih jang pơjing đei khul kăn ƀô̆, jang rơgei đei yoa ‘lơ̆ng”.

Kiơ̆ ƀok Lê Nam Cao, Phŏ Kơdră Anih pơgơ̆r đảng dêh char Đắk Lắk, pơjing trong  jang, tưk tơiung khul kăn ƀô̆, đảng viên, bơngai jang kơ tĕh đak jĭ bơngai kon kông ‘nŏh jĭ tơdrong jang tôch gĭt kăl đơ̆ng tơdrong jang kăn ƀô̆, dêh char ‘moi kiơ̆ tơdrong Tơchơ̆t đơ̆ng Hop akŏm mă XIII kơ Đảng păng dôm tơdrong tơchơ̆t đơ̆ng tơring, tơlĕch jang hrơ̆ch ‘lơ̆ng hăm dôm tơdrong tơgŭm tôch lăp. Tơdrong ‘nâu pơjing đei jơhngâm pran, pơm ‘lơ̆ng vă bơ̆ jang đei dôm tơdrong pơhnŏng găh pơjing khul kăn ƀô̆, bơngai jang ăn tĕh đak jĭ bơngai kon kông. Ƀok Lê Nam Cao ăn tơbăt:

“Pơjing dôm kơchư̆k jang lơ̆m rim anih jang chinh trĭ, lơ̆m noh pơ ‘nhŏ ăn dôm kơchư̆k gĭt kăl, kăl đei kăn ƀô̆ bơngai kon kông ‘nŏh athei iŏk kăn ƀô̆ bơngai kon kông. Dêh char kŭm jang kiơ̆ trong tơgŭm chă rơih, ăn đe kon hơ ‘lơ̆p bơngai kon kông năm hŏk kiơ̆ tơdrong tơgŭm đơ̆ng tĕh đak ‘năi”.

Kiơ̆ tơdrong tơchơ̆t đơ̆ng Đảng ƀô̆ dêh char Đắk Lắk ‘măng mă 17, jăl jang đơ̆ng 2020-2025, tơdrong atŏk tơiung kăn ƀô̆, đảng viên bơngai kon kông hơnơ̆ng đei tơrĕk truh. Dêh char adrin truh sơnăm 2025, kơsô̆ kăn ƀô̆, bơngai jang kơ tĕh đak jĭ bơngai kon kông lơ̆m kơsô̆ akŏm đĭ đăng kăn ƀô̆, bơngai jang kơ tĕh đak tơ̆ dêh char đei đơ̆ng 15% tŏk tơ̆ kơpal.