Kiơ̆ kơsô̆ chih jô̆ đơ̆ng Anih vei lăng bri ‘long dêh char Đắk Lắk, đơ̆ng blŭng sơnăm 2020 truh dang ei, lơ̆m hơgăt teh kơ Công ty jang ‘long Buôn Ja Wầm đei hlŏh 500 ‘măng kŏh phă bri, hăm hơgăt tĕh đei đe tơgar iŏk tŏk truh 360ha. Ƀok Nguyễn Quốc Hưng, Kơdră Anih vei lăng bri ‘long dêh char Đắk Lắk pơma hơdăh, Công ty jang ‘long Buôn Ja Wầm ưh đei tôm bơngai jang vei lăng bri. Mă hơtuch bri ‘long hơnơ̆ng răm kơ đe kŏh phe lơ̆m khei ‘năr âu ki, hơgăt tĕh bri găh công ty jur tôch hrĕnh.

Lơ̆m kơsô̆ 8.800ha công ty âu vei lăng, dang ei lăp oei đei dang 3.000ha đei ‘long bri păng mă lơ ‘nŏh jĭ ‘long bri iơ iĕ ngăl. Anih vei lăng bri ‘long oei hơtŏk khul jang păng pơtho ăn anih vei bri apŭng Cư M’Gar jang hơdoi hăm tơring, tơ ‘ngla bri tơlĕch trong jang mă pran vă găn pơđĭ tơdrong kŏh phă bri ‘long tơ̆ âu.