Hrei au, rim hơnih jang ming man tŏk bŏk tơlĕch jang kơtang ming man trong vă keh đang ƀlep hăm nơ̆r pơkăp. Tơdrong jang trong glung rĕnh Khánh Hòa - Buôn Ma Thuột đei hơtăih kơjung dang 117km 500met tơƀưh ƀar păh dêh char Khánh Hòa - Đak Lăk. Trong glung au să ăn 4 tong gre nơnăm tingring, tơmơ̆t jên jang đơ̆ng sơnăm 2021-2025. Kon jên tơmơ̆t jang vă jê̆ 22.000 ti hlak jên đơ̆ng jên teh đak.

Lăp đơ̆ng rŏng đei Khul Kơdră teh đak, rim hơnih tơm, hơnih jang hơmet pơ ‘lơ̆ng tơnap tap đei ƀơm truh, truh dang ei bơ̆ jang iŏk tơvih, pơjao teh ăn rim hơnih ming man hlôi jơnei 97%, pă tŏ sĕt gô iung jang pơjao ăn hơdrol kơ năr Têt Nguyên đán 2024. Tơdrong tơchă hơnih kôch iŏk teh, tơmo ăn ming man au hlôi bơ̆ jang đang.