Hrei au dêh char Đăk lăk đei dang 460.000 ‘nu hơdruh tơdăm đơ̆ng 16 - 30 sơnăm, lơ̆m au đei 116.000 ‘nu hơdruh tơdăm kon kông. Đơ̆ng sơnăm 2021 truh dang ei, dêh char hlôi pơjing đei tơdrong jang ăn vă jê̆ 61.000 ‘nu hơdruh tơdăm; tơgŭm djru hloh 10.200 ‘nu hơdruh tơdăm tŏk iŏk jên; pơtho tơdrong jang ăn hloh 1.000 ‘nu tơdăm ‘nao lĕch đơ̆ng pơm ƀô̆ đô̆i.

Tơ̆ Hop akŏm, khul bơ̆ jang hlôi pơma dơnuh, tơgop nơ̆r rim trong jang kơ dêh char lơ̆m tơdrong jang kiơ̆ Khôi luơ̆t Hơdruh tơdăm păng Trong jang atŏk tơ iung hơdruh tơdăm lơ̆m kghei năr au ki. Đơ̆ng noh akŏm lơ̆m mĭnh ƀar tơdrong tơm nhen: Bơ̆ jang hơdoi hăm Hơnih vei lăng kon pơlei dêh char, rim hơnih bơ̆ jang hăm Hơnih Đoàn hơdruh tơdăm; hơnăp jang kơ khul kơdră chĕp pơgơ̆r tơring hăm bơ̆ jang hơdruh tơdăm. Găh tơdrong pơtho tơdrong jang, tơdrong pơjing tơdrong jang, tơgŭm djru jang sa hơrih sa kơ hơdruh tơdăm đơ̆ng rŏng brŏk đơ̆ng pơm ƀô̆ đô̆i. Bơ̆ jang tơbăt ăn, pơtho tơbăt, pơrô̆ pơrôp, pơchoh trong hưch hanh ăn hơdruh tơdăm; lăng ba tơdrong jang păng pơjing tơdrong jang ăn hơdruh tơdăm.